24 ساۋىردە Freedom House حالىقارالىق قۇقىق قورعاۋ ۇيىمى وتكەن جەكسەنبىدە الماتى مارافونىندا "شىندىقتان قاشىپ قۇتىلمايسىڭ" دەگەن باننەرمەن اكتسيا وتكىزگەن بەلسەندىلەردىڭ ۇستالۋىن ايىپتادى. ۇيىم قازاقستان بيلىگىن ولاردى بوساتۋعا شاقىردى.

ء"ادىل سايلاۋ وتكىزۋگە شاقىرىپ، پلاكات ىلگەنى ءۇشىن عانا ۇستاۋ مەن قاتاڭ جازالاۋ قازاقستاندا اشىق پرەزيدەنت سايلاۋى وتەدى دەگەن ءۇمىتتى سەيىلتەدى. Freedom House ۇستالعان بەلسەندىلەردى جەدەل بوساتۋعا شاقىرىپ، قازاقستان ۇكىمەتىنە ازاماتتارىنىڭ ساياسي پىكىرىن قورىقپاي ايتۋىنا مۇمكىندىك بەرۋىن سۇرايدى" دەپ مالىمدەگەن ۇيىمنىڭ ەۋروپا جانە ەۋرازيا باعدارلامالارى بويىنشا ديرەكتورى مارك بەرەندت.

22 ساۋىردە الماتى اكىمشىلىك سوتى قالاداعى مارافون كەزىندە "شىندىقتان قاشىپ قۇتىلمايسىڭ" دەگەن جازۋى بار پلاكات ۇستاپ، اكتسيا وتكىزگەن بەلسەندىلەر ءاسيا تولەسوۆا مەن بەيبارىس تولىمبەكوۆتى 15 تاۋلىككە قاماۋعا قاۋلى ەتكەن. اكتسيانى كامەراعا تۇسىرگەن تاعى ءۇش بەلسەندى - سۇيىنبيكە سۇلەيمەنوۆا، ايدوس نۇربولاتوۆ جانە ايگۇل نۇربولاتوۆانى دا "ميتينگ وتكىزۋ ءتارتىبىن بۇزدى" دەپ تانىپ، ايىپپۇل سالعان.

اپتا باسىندا قازاقستان ىشكى ىستەر ءمينيسترى ەرلان تۇرعىمباەۆ بەس بەلسەندى "زاڭدى بۇزدى" جانە "مارافوندى وتكىزۋگە كەدەرگى جاسادى" دەپ مالىمدەگەن. Amnesty International حالىقارالىق ۇيىمى ءاسيا تولەسوۆا مەن بەيبارىس تولىمبەكوۆتى "ار-وجدان تۇتقىنى" دەپ تانىدى.

Abai.kz