الماتى وبلىسىنىڭ ورتالىعى تالدىقورعان قالاسىنا جاڭا اكىم تاعايىندالدى. وبلىس باسشىسى اماندىق باتالوۆ مىرزا قالا اكتيۆىنە جاڭا اكىمدى تانىستىردى. ول - عالىمجان رايىمۇلى ءابدىرايىموۆ. بۇل تۋرالى "اباي-اقپارات" پورتالى حابارلايدى.

اۋەلى وبلىس اكىمى اماندىق باتالوۆ قالالىق ءماسليحات دەپۋتاتتارىمەن كەزدەسىپ، اقىلداستى. پرەزيدەنت اكىمشىلىگىنىڭ كەلىسىمى بويىنشا قالا باسشىلىعىنا ءابدىرايىموۆتىڭ كانديداتۋراسىن ۇسىناتىنىن جەتكىزدى. ال ءماسليحات دەپۋتاتتارى بۇل ۇسىنىستى ءبىراۋىزدان قولداپ، داۋىس بەردى.

سونان سوڭ وبلىس اكىمى ءماسليحات ماقۇلداپ بەكىتكەن جاڭا اكىم عالىمجان ءابدىرايىموۆتى قالا اكتيۆىنە تانىستىرىپ، جاڭا تاعايىندالعان اكىمگە بىرقاتار مىندەتتەر جۇكتەدى.

"داستان شالتاباەۆ قالانىڭ دامۋىنا، ونىڭ قۇرىلىسىنا، اباتتاندىرىلۋىنا ءوز ۇلەسىن قوستى. كوپ ۇيرەندى، تاجىريبەسى بار، وزىنە جۇكتەلەتىن جاڭا قىزمەتكە بار ءبىلىمى مەن بىلىگىن باعىتتايدى دەپ سەنەمىن. ال عالىمجان رايىلۇلى بۇعان دەيىن دە ءبىزدىڭ وبلىستا جاۋاپتى قىزمەتتەر اتقارعان.

تالدىقورعاندى زامان تالابىنا ساي دامىتۋ مىندەتتەرىن ابىرويمەن اتقارادى دەپ ويلايمىن. وعان تاجىريبەسى دە، ءبىلىمى دە جەتەدى. وبلىستىڭ دامۋ كورسەتكىشى جىلدان جىلعا ارتىپ كەلەدى. جالپى ىشكى ءونىم، ونەركاسىپ ءوندىرىسى، اۋىل شارۋاشىلىعى ونىمدەرىن ءوندىرۋ، قاي-قايسىسىندا دا ءوسىم ايقىن بايقالادى. قالا دا ءدال وسىلاي ءوسۋى كەرەك. ءبىز وبلىس ورتالىعىنا ەرەكشە كوڭىل ءبولىپ، بارلىق جاعىنان قولداۋ تانىتىپ كەلەمىز. جولدارىن جوندەۋگە، اباتتاندىرۋ، جارىقتاندىرۋ، گازداندىرۋ ىسىنە قارجى ءبولىپ وتىرمىز.

قوعامدىق كولىكتى رەتكە كەلتىرۋ تۋرالى باياعىدان ايتىپ ءجۇرمىن. تالدىقورعاندا جولاۋشى تاسىمالداۋشى كاسىپورىندارمەن بىرلەسىپ، زامان تالابىنا ساي جاڭا اۆتوبۋستار ساتىپ الىپ، جۇرگىزسەڭدەر، يگىلىگىن حالىق كورەدى عوي. قالانىڭ ورتالىعىن عانا ەمەس، ىنتىماق اۋىلىن، سول سياقتى قالا شەتىندەگى ساياجايلىق اۋماقتاردى دامىتۋدى دا باستى نازاردا ۇستاۋ كەرەك. قالا ىشىندەگى گازداندىرۋ ءىسى باياۋ ءجۇرىپ جاتىر. وسىنىڭ ءبارىن عالىمجان ءابدىرايىموۆ ءجىتى باقىلاۋعا الىپ، بەلسەنە جۇمىس ىستەۋى كەرەك", دەدى اماندىق باتالوۆ.

ءوز كەزەگىندە عالىمجان رايىمۇلى دا ءسوز الىپ، ءوزىنىڭ ەڭبەك جولىن الماتى وبلىسىنان باستاعانىن ايتتى.

"ماعان الماتى وبلىسى بوتەن ەمەس. وسى ولكەدە العاش ەلمەن ارالاسىپ، قىزمەت باسپالداقتارىنان ءوتتىم. ماعان سەنىم ارتىپ، جاۋاپتى لاۋازىمعا تاعايىنداعانىڭىز ءۇشىن ريزاشىلىعىمدى ءبىلدىرىپ، تالدىقورعاندىقتارمەن بىرلەسە جۇمىس ىستەيمىن، تالاپ ۇدەسىنەن شىعامىن دەپ سەندىرەمىن", دەدى.

Abai.kz