2021 جىلى الماتى وبلىسىنىڭ بارلىق اۋداندارىندا انالوگتىق تەلەۆيزيا ءوشىرىلىپ، تەگىن تسيفرلىق فورماتقا كوشەدى. بۇل تۋرالى وڭىرلىك كوممۋنيكاتسيا قىزمەتىندە وتكەن ءباسپاسوز-ءماسليحاتىندا الماتى وبلىستىق راديو-تەلەحابار تاراتۋ ديرەكتسياسىنىڭ ديرەكتورى قايسار رازدىقوۆ مالىمدەدى.

ەلباسى ن.نازارباەۆتىڭ  «تسيفرلى قازاقستان» باعدارلاماسىنىڭ اياسىندا جاسالىپ جاتقان جۇمىستاردىڭ ماقساتى - حالىققا ساپالى جانە كوپ ارنالى حاباردى جەتكىزۋ.

الماتى وبلىسىندا انالوگتان تسيفرلىق تەلەۆيزياعا  كوشۋگە دايىندىق كەزىندە 90 رتس (راديو-تەلەۆيزيالىق ستانسالارى) ورناتىلدى. بۇل رتس  سانى الماتى وبلىسىنىڭ  748 ەلدى مەكەنىن تسيفرلىق ەفيرلiك تەلەۆيزيامەن قامتۋعا مۇمكىندىك بەرەدى»،-دەدى ق.رازدىقوۆ.

2018 جىلدان باستاپ قازاقستان رەسپۋبليكاسىندا تسيفرلىق ەفيرلiك تەلەۆيزياعا كوشۋ بويىنشا ءىس-شارالار جۇرگىزىلۋدە. قازىرگى ۋاقىتتا تەلەحابار تاراتۋدىڭ جەردەگى حابار تاراتۋ جەلىسىن تسيفرلىق فورماتقا كوشىرۋ ماڭعىستاۋ، جامبىل، تۇركىستان جانە شىمكەنت قالالارىندا تولىعىمەن اياقتالدى.

الماتى وبلىسىندا بۇل پروتسەسس 2019 جىلدىڭ 30 ماۋسىمىنان باستالادى. بۇگىنگى تاڭدا تسيفرلىق تەلەۆيزيادا 10 ارنا بولسا، بولاشاقتا ونىڭ سانى 30 دەيىن وسپەك. ال، 2021 جىلعا دەيىن ەل اۋماعىندا 270 راديوتەلەۆيزيالىق ستانتسيا سالىنادى.

سونداي-اق، الماتى وبلىسىندا اتاۋلى الەۋمەتتىك كومەك الۋشىلار قاتارىنان 4867 وتباسى ۇلتتىق ساندىق تەلەديدار قىزمەتىنە قوسىلدى.

تاعى ءبىر ارتىقشىلىعى – تسيفرلىق حابار تاراتۋعا كوشكەن جاعدايدا راديوجيىلىكتەر دە بوسايدى. جانە، تسيفرلىق حابار تاراتۋعا كوشۋ حالىقتىڭ يگىلىگى ءۇشىن جاسالادى.

ايتا كەتۋ كەرەك، زاماناۋي تسيفرلىق حابار تاراتاتىن قۇرال قۇنى 5000 تەڭگەدەن 3500 تەڭگەگە دەيىن ارزانداعان.

Abai.kz