مەملەكەت باسشىسى پاراليمپيادالىق جاتتىعۋ ورتالىعىنا باردى
قازاقستان پرەزيدەنتى قاسىم-جومارت توقاەۆ پاراليمپيادالىق جاتتىعۋ ورتالىعىنا باردى.
مەملەكەت باسشىسىنا حالىقارالىق قولجەتىمدى ستاندارتتار بويىنشا قايتا جاڭعىرتىلعان، مۇمكىندىگى شەكتەۋلى جاندارعا تولىقتاي ىڭعايلاستىرىلعان جاتتىعۋ، ويىن زالدارى، جۇگىرۋ جولاعى، جەكپە-جەك جانە پاۋەرليفتينگ اۋماعى بار پاراليمپيادا ورتالىعى تانىستىرىلدى.
قاسىم-جومارت توقاەۆ پاراليمپيادالىق ويىنداردى مەملەكەت قولدايتىنىن ءارى حالىقارالىق ارەنالارداعى ءبىزدىڭ سپورتشىلارىمىزدىڭ جەتىستىكتەرىن ماقتان تۇتىپ، جوعارى باعالايتىنىن ايتتى. سونىمەن قاتار، توكيودا وتەتىن پاراليمپيادالىق ويىنداردا جوعارى دەڭگەيدە ونەر كورسەتۋ ءۇشىن ۇيىمداستىرۋ جانە قارجىلىق قولداۋ كورسەتىلەتىنىن جەتكىزدى.
– وسى ورتالىقتىڭ ارقاسىندا ەلوردامىزداعى مۇمكىندىگى شەكتەۋلى جاندارعا سپورتپەن شۇعىلدانۋ تەگىن بولىپ وتىر. ەلىمىزدە 680 مىڭعا جۋىق ءارتۇرلى دەڭگەيدەگى مۇمكىندىگى شەكتەۋلى جان بار. قولىمىزداعى دەرەكتەرگە قاراعاندا سول ازاماتتاردىڭ 3 پايىزى عانا بەلسەندى تۇردە سپورتپەن اينالىسادى ەكەن. بۇل جاعدايدى وزگەرتۋ ءۇشىن جۇمىس ىستەپ جاتىرمىز. بۇگىن تۇسكە دەيىن ەڭبەك جانە جۇمىسپەن قامتۋ بويىنشا كەڭەس وتكىزدىم. سول جيىندا مۇمكىندىگى شەكتەۋلى جانداردىڭ جۇمىسقا ورنالاسۋىن ءجىتى نازاردا ۇستاۋ كەرەكتىگى ايتىلدى. بۇل – ۇلكەن الەۋمەتتىك مىندەت. ەرەكشە مۇقتاج جانداردىڭ تولىققاندى ءومىر سۇرۋىنە بار كۇشىمىزدى سالۋىمىز كەرەك، – دەدى قازاقستان پرەزيدەنتى.
كەزدەسۋ سوڭىندا مۇمكىندىگى شەكتەۋلى سپورتشىلار ءوز ونەرلەرىن كورسەتتى.
Abai.kz
