قازىر ەلىمىزدە جۇمىسشىلار تاراپىنان جالاقىنىڭ از ەكەنى ءجيى ايتىلادى. وسىعان سايكەس، ەلباسى نۇرسۇلتان نازارباەۆتىڭ باستاماسىمەن بيىلعى جىلدىڭ باسىنان باستاپ، جالاقىسى تومەن جۇمىسشىلارعا سالىناتىن سالىق مولشەرى 10 ەسەگە دەيىن ازايدى.ياعني، ەندى قاراپايىم جۇمىسشى مەملەكەتكە تەك 1 پايىز عانا سالىق تولەيتىن بولدى.

سونىمەن قاتار، پرەزيدەنتتىڭ ۇسىنىسى بويىنشا، ەلىمىزدەگى ەڭ تومەنگى جالاقى الاتىندار، ياعني، ەسەپتىك كورسەتكىشتەن 25 ەسە تومەن ايلىق يەلەرى جەكە تابىس سالىعىن تولەمەيدى. ءسويتىپ، ولار سالىق جۇكتەمەسىنەن بوساتىلادى. تيىسىنشە، سالىقتى ازايتۋدان تۇسكەن قاراجات جۇمىسشىلاردىڭ جالاقىسىن كوتەرۋگە جۇمسالادى.

ەگەر ەلباسىنىڭ وسى اتالعان باستاماسى ىسكە اسسا، ەلىمىزدەگى ەكى ميلليوننان استام ادام جۇمىس بەرۋشىنىڭ كومەگىنسىز مەملەكەت ەسەبىنەن جالاقىسىن كوبەيتە الادى. بۇل دەگەنىڭىز ەلىمىزدەگى بارشا جالدامالى جۇمىسكەرلەردىڭ  ۇشتەن ءبىرىن قۇرايدى.

بۇدان ءارى قر ۇكىمەتى تابىس سالىعىنىڭ پروگرەسسيۆتى شكالاسىن ەنگىزۋ بويىنشا بىرقاتار مۇمكىندىكتەردى زەردەلەمەك.

ەلباسىنىڭ وسى ۇندەۋى نەگىزىندە وڭىرلەردە دە قارقىندى جۇمىستار اتقارىلىپ جاتىر. ماسەلەن، قىزىلوردا وبلىسىندا “جان-اراي-جەم” دەپ اتالاتىن سەرىكتەستىك بار. كەشە قر ۇكىمەت باسشىسىنىڭ ورىنباسارى گۇلشارا ابدىحالىقوۆ مەن ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ سىر وڭىرىندەگى وسى زاۋىتتىڭ جۇمىسىمەن تانىستى. اتالعان كاسىپورىندا تاۋلىگىنە 80 توننا قۇراما جەم وندىرىلەتىن كورىنەدى. سونداي-اق، سىر ءوڭىرىنىڭ كۇرىشىندە قايتا وڭدەيتىن وسى زاۋىت. قازىر وندا جەرگىلىكتى 150 دەن اسا تۇرعىن جۇمىس ىستەيدى. زاۋىت جۇمىسشىلارىمەن كەزدەسكەن ۇكىمەت باسشىسىنىڭ ورىنباسارى ابدىحالىقوۆا حانىم ءارتۇرلى كاسىپورىندارداعى ايلىق تولەمەۋ ماسەلەسىن بولدىرماۋ جاعىنا ەرەكشە كوڭىل ءبولۋ قاجەتتىگىن ەسكەرتتى. سوندايا-اق، ايلىق مولشەرى ەڭ تومەنگى جۇمىسشىنىڭ جالاقىسىن كوتەرۋ قاجەتتىگىن دە باسا ايتتى.

ال، ەڭبەك جانە حالىقتى الەۋمەتتىك قورعاۋ ءمينيسترى بەردىبەك ماشبەكۇلى جۇمىسشىلاردىڭ ەڭبەك قۇقىقتارىن قورعاۋ مەن ولاردىڭ ءوز ۋاقىتىندا جانە ەڭبەگىنە لايىق ايلىق الىپ تۇرۋى جونىندە ايتتى.

بەردىبەك ساپارباەۆتىڭ ايتۋىنشا، قازىرگى كەزەڭدە ەل ەكونوميكاسىنىڭ ءارتۇرلى باعىتتارىندا 165 مىڭ كاسىپورىن بار. ول كاسىپورىنداردا 6,6 ميلليونعا جۋىق جۇمىسشىلار ەڭبەك ەتەدى. اتالعان مينيسترلىك ەڭ اۋەلى سول جقاراپيىم جۇمىسشىلاردىڭ ەڭبەك قۇقىقتارىن قورعايدى. ونىڭ ىشىندە جالاقىنىڭ ۋاقىتىندا تولەنۋى ماڭىزدى باسىمدىققا يە. ماسەلەن، وتكەن جىلى مينيسترلىك تاراپىنان 32 مىڭنان استام ادامنىڭ قۇقىعى قورعالعان كورىنەدى. ناتيجەسىندە، 3,2 ميلليارد تەڭگە كولەمىندە ايلىق قارىزى قايتارىلعان.

ەڭبەك جانە حالىقتى الەۋمەتتىك قورعاۋ ءمينيسترىنىڭ ايتۋىنشا، وسى جىلى ەلباسى تاپسىرماسىنا وراي، 1-شىلدەدەن باستاپ بيۋدجەتتىك سالا ماماندارىنىڭ جالاقىسى كوبەيەدى. ولاردىڭ ىشىندە ەڭ تومەنگى ايلىق الاتىنداردىڭ اقشاسى 15 تەن 30 پايىزعا دەيىن وسەتىنىن ايتتى.

ايتا كەتەيىك، ولاردىڭ ىشىندە سانتەحنيك، ەلەكترومونتەر، سلەسار سياقتى جۇمىسشىلاردىڭ ايلىعى 25 پايىزعا كوتەرىلەدى. سونىمەن قاتار، اۋىل مەن قالالىق اكىمشىلىك قىزمەتكەرلەرىنىڭ دە ايلىعى كوتەرىلەدى. ولاردىڭ سانى شامامەن 75 مىڭنان جوعارى بولماق.

سونىمەن بيىل ەلباسى تاپسىرماسىنا سايكەس ەلىمىزدە 1 ميلليوننان استام ادامنىڭ جالاقىسى كوبەيەدى. بۇل – الەۋمەتتىڭ الەۋەتىن جاقسارتۋدا جاسالاتىن ناقتى قادامدار.

ەسكە سالا كەتەيىك، بىلتىر ناۋرىز ايىندا ەلباسى نۇرسۇلتان نازارباەۆ قازاقستان حالقىنا كەزەكتى ۇندەۋىن جولداعان. ول "پرەزيدەنتتىڭ بەس الەۋمەتتىك باستاماسى" دەپ اتالدى. ونداعى نەگىزگى باعىت – ەلدىڭ ەكونوميكالىق، الەۋمەتتىك جاعدايىن جاقسارتۋ بولعان ەدى. دالىرەك ايتساق، پرەزيدەنتتىڭ  باعدارلامالىق ماقالاسىنىڭ ەكىنشى باعىتى  – “جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ”  دەپ اتالعان ەدى.

Abai.kz