مەملەكەت باسشىسى قاسىم-جومارت توقاەۆ جۇمىس ساپارىمەن جامبىل وبلىسىنا باردى. بۇل تۋرالى «اباي-اقپارات» حابارلايدى. 

پرەزيدەنت قاتىسقان القا-قوتان جيىنعا وڭىردەگى ەڭبەك ارداگەرلەرى، زيالى قاۋىم وكىلدەرى مەن جاستار دا بارىپ، ءسوز الدى.

قازاقستان پرەزيدەنتى ءبىر ميلليوننان اسا تۇرعىنى بار ايماقتىڭ ەكونوميكالىق الەۋەتى مەن جوسپارلى شەشىلۋى ءتيىس ماسەلەلەر تۋرالى ايتتى. مەملەكەت باسشىسىنىڭ ايتۋىنشا، وڭىردەگى ورتاشا جالاقى مولشەرى - ەلدەگى ەڭ تومەنگى كورسەتكىشتەردىڭ ءبىرى ەكەن. ول شامامەن 112 مىڭ تەڭگەنى قۇرايدى.

«1 ماۋسىمنان باستاپ تابىسى تومەن بيۋدجەتتىك سالا قىزمەتكەرلەرىنىڭ جالاقىسى ءوستى. ءوڭىر كاسىپورىندارى بۇل باستامادان شەت قالماۋى ءتيىس. بارلىق دەڭگەيدەگى اكىمدەردىڭ باستى مىندەتى جاڭا جۇمىس ورىندارىن اشىپ، حالىقتى قىزمەتپەن قامتۋ ەكەنىن ەسكەرتەمىن. جۇمىس ورىندارىن اشۋدا بيزنەستىڭ ءرولى جوعارى. سوندىقتان، جەرگىلىكتى كاسىپكەرلەردى قولداۋدى جالعاستىرۋ قاجەت»، – دەدى مەملەكەت باسشىسى.

جامبىل وبلىسىنىڭ ونەركاسىپ سالاسىنداعى قارقىمى مەن ينۆەستورلار تارتۋداعى مۇمكىندىگى جوعارى ەكەندىگىن ايتقان مەملەكەت باسشىسى ونەركاسىپ سالاسىنا، سونىڭ ىشىندە، حيميا كلاستەرىنە ينۆەستورلار تارتۋدى جەرگىلىكتى باسشىلارعا مىندەتتەدى. سونداي-اق، وڭىردەگى ءوندىرىس سالاسىنىڭ نەگىزگى لوكوموتيۆى بولىپ وتىرعان  «تاراز» حيميالىق پاركىن» ەكونوميكالىق ايماققا اينالدىرۋ قاجەتتىلىگى تۋرالى بىرقاتار تاپسىرمالار جۇكتەدى.

ايماقتاعى تاعى ءبىر دامۋ پەرسپەكتيۆاسى بار سالا - ول اۋىلشارۋاشىلىعى سەكتورى. وبلىستا قانت قىزىلشاسى، جەمىس جانە كوكونىس داقىلدارىنىڭ كولەمىن كوبەيتۋگە مۇمكىندىك بار. ول ءۇشىن جەرگىلىكتى شارۋالار مەن اكىمدىڭ تىعىز بايلانىستا بولۋى مىندەت.

«كەلەر جىلدان باستاپ شەتەلدەن اكەلىنەتىن قۇرعاق قانتقا يمپورتتىق باج سالىعىن سالۋ تۋرالى شەشىم قابىلدادىق. وسىعان وراي، وبلىس اكىمىنە قانت قىزىلشاسى مەن جەمىس-كوكونىس داقىلدارىنىڭ ەگىس كولەمىن ۇلعايتىپ، وڭدەۋ كاسىپورىندارىنىڭ قۋاتىن ارتتىرۋدى تاپسىرامىن»، – دەدى قاسىم-جومارت توقاەۆ.

جامبىل وبلىسىندا ەجەلگى قالالاردىڭ ءبىرى كوكنە تاراز ورنالاسقان. ايماقتىڭ تابيعي لاندشافتى، تاريحي ورىندارى شەتەلدىك تۋريستەردىڭ قىزىعۋشىلىعىن تۋعىزارلىقتاي جاعداي جاسالۋى كەرەك. وڭىردە ىشكى جانە سىرتقى ءتۋريزمدى دامىتۋدىڭ پوتەنتسيالى بار ەكەنىن ايتقان مەملەكەت باسشىسى:

«جامبىل وبلىسى تاريحي كورنەكتى ورىندارعا وتە باي. وڭىردەگى ايشا ءبيبى جانە قاراحان كەسەنەلەرى، جايساڭ كيەلى جەرى، كوكساي شاتقالى جانە باسقا دا تاريحي ورىندار – حالقىمىز ءۇشىن ورتاق مادەني قۇندىلىقتار. ۇكىمەت پەن اكىمدىك بۇل سالانى بىرلەسە دامىتۋعا كۇش سالۋى كەرەك. وعان وبلىستىڭ رەسۋرستارى جەتكىلىكتى»، – دەدى.

سونداي-اق، القا-قوتان جيىندا وڭىردەگى سىبايلاس جەمقورلىقپەن كۇرەس، مونو-قالالاردىڭ كەلەشەگى، جاستار كاسىپكەرلىگىن دامىتۋ، جۇمىس كۇشىن ارتتىرۋ، ەلدى-مەكەندەردى كوركەيتۋ سەكىلدى بىرقاتار ماسەلەلەر تالقى بولدى.

مەملەكەت باسشىسى جيىن سوڭىندا بىرقاتار ازاماتتاردى العىس حاتتارمەن ماراپاتتادى. ولاردىڭ اراسىندا دارىگەرلەر، مۇعالىمدەر مەن كاسىپكەرلەر بولدى.

Abai.kz