وڭتۇستىك كورەيا قازاقستاندا اەس قۇرىلىسىن سالۋعا ءوتىنىش ءبىلدىردى. ءسويتىپ، 29-مامىر كۇنى وك گيدروەنەرگەتيكالىق كورپوراتسياسى قازاقستاندا اتوم ەلەكتر ستانسالارىن سالۋ ءۇشىن بولاتىن تەندەرگە قاتىسۋعا مۇمكىندىك الدى.

بۇل تۋرالى وڭتۇستىك كورەيانىڭ Yonhap اقپاراتتىق اگەنتتىگى مالىمدەگەن. نەگىزىنەن،  وڭتۇستىك كورەيا ەلىمىزدە اەس سالۋ تۋرالى ۇسىنىستى قازاقستان بيلىگىنە ەكى اي بۇرىن جولداعان. ال، قازىر رەسمي تۇردە تەندەرگە قاتىسۋعا جولداما  الدى.

ايتا كەتەيىك، قازاقستاندا اەس قۇرىلىسىن سالۋعا تەندەر جاريالانىپ، وعان اقش، رەسەي، قىتاي، فرانتسيا، جاپونيا جانە وڭتۇستىك كورەيا قاتىسىپ جاتقان كورىنەدى. ال، تەندەردىڭ جەڭىمپازى الداعى قىركۇيەك ايىندا بەلگىلى بولماق.

وتكەن ايدا رەسەي پرەزيدەنتى ۆلاديمير پۋتين قر پرەزيدەنتتىگىن ۋاقىتشا اتقارۋشى ق.توقاەۆپەن كەزدەسۋ كەزىندە قازاقستاندا رەسەي تەحنولوگياسىمەن اتوم ەلەكتر ستانساسىن سالۋ تۋرالى ۇسىنىس ايتقان بولاتىن.

بۇل ۇسىنىس بويىنشا قوعامدا قىزۋ پىكىرتالاس تۋىندادى.

الايدا، رەسەي پرەزيدەنتىنىڭ بۇل ۇسىنىسىن قازاقستان تاراپى كوپ كۇتتىرگەن جوق. ەنەرگەتيكا ءمينيسترىنىڭ ورىنباسارى ماگزۋم مىرزاعاليەۆ اەس سالۋعا الماتىنىڭ ماڭىنداعى ۇلكەن اۋىلى ءتيىمدى بولاتىنىن ايتقان.

بىراق، جۋىردا قاسىم-جومارت توقاەۆ سەمەيگە جۇمىس ساپارى اياسىندا قازاقستانداعى اتوم ەلەكتر ستانساسىنىڭ قۇرىلىسىنا قاتىستى پىكىر ءبىلدىردى.

- اەس قۇرىلىسى قوعامدا ۇلكەن رەزونانس پەن پىكىرتالاس تۋدىردى. بۇل شىن مانىندە ەلىمىزدىڭ مۇدەسىن قورعاۋدا ۇلكەن ءرول اتقارادى. سوندىقتان، قوعامنىڭ پىكىرىن ەسكەرۋ قاجەت، - دەدى ول.

ق.توقاەۆتىڭ سوزىنە سەنسەك، كوپشىلىكتىڭ پىكىرىن ەسكەرمەستەن اەس سالۋ تۋرالى شەشىم قابىلدانبايدى. بىراق، توقاەۆ مىرزا ەلىمىزدە 2030 جىلعا قاراي ەلەكتر قۋاتىنىڭ جەتىسپەۋشىلىگى بولاتىنىن جانە ول ماسەلەنى قازىر شەشۋ كەرەكتىگىن ايتتى.

ال، اتالعان تەندەردە رەسەي جەڭىمپاز اتانسا، الماتىنىڭ ماڭى رەسەي اتوم ەلەكتر ستانساسىنىڭ قۇرىلىسىنا اينالىپ كەتپەي مە؟

ءبىزدى وسى وي ۇرەيلەندىرەدى...

نۇربيكە بەكسۇلتانقىزى

Abai.kz