قىزىلوردا وبلىسىندا دەنساۋلىق ساقتاۋ ۇيىمدارىن زاماناۋي مەديتسينالىق تەحنيكامەن جابدىقتاۋ 2018-2019 جىلداردىڭ وزىندە 34,9% ءوسىپ، قامتۋ 79,26% قۇراعان، - دەپ حابارلايدى اباي-اقپارات.

وتكەن جۇمادا وبلىستىق ن.بەكەجانوۆ اتىنداعى وبلىستىق مۋزىكالىق-دراما تەاترىندا مەديتسينا قىزمەتكەرلەرى كۇنىنە ارنالعان مەرەكەلىك ءىس-شارا ءوتتى. شاراعا قاتىسقان وبلىس اكىمىنىڭ ورىنباسارى رۋسلان رۇستەموۆ:

– دەنساۋلىق ساقتاۋ سالاسىنىڭ قارجىسى ءبىر جىلدىڭ وزىندە وبلىس اكىمىنىڭ قولداۋىمەن 7,2%، سونىڭ ىشىندە ماتەريالدىق-تەحنيكالىق بازاسىن ارتتىرۋعا بولىنگەن قارجى 20,2% ءوستى. اق حالاتتى ابزال جانداردى كاسىبي مەرەكەسىمەن شىن جۇرەكتەن قۇتتىقتايمىن، - دەپ اتاپ ءوتتى.

سونداي-اق، ول سالتاناتتى جيىندا ءوڭىردىڭ ۇزدىك 5 دارىگەرىنە تۇرعىن ءۇي الۋعا سەرتيفيكات تابىستادى. تۇرعىن ءۇيدىڭ باستاپقى جارناسى 1 ملن جانە 500 مىڭ تەڭگە سوماسىنداعى سەرتيفيكاتتار بەرىلدى. سونىمەن قاتار ۇزدىك دارىگەرلەرگە قۇرمەت گراموتالارىمەن جانە العىس حاتتار، «دەنساۋلىق ساقتاۋ سالاسىن دامىتۋعا قوسقان ۇلەسى ءۇشىن» جانە «دەنساۋلىق ساقتاۋ ءىسىنىڭ ۇزدىگى» توسبەلگىلەرى تابىس ەتىلدى.

ەستەرىڭىزگە سالا كەتەيىك، سوڭعى 2 جىلدا 25 مەديتسينالىق نىسان پايدالانۋعا بەرىلگەن. بۇگىنگى تاڭدا 17 نىساننىڭ قۇرىلىسى جۇرگىزىلۋدە. سونىمەن قاتار ارال، قازالى اۋداندىق اۋرۋحانالارى جاڭادان سالىنسا، شيەلى، جالاعاش اۋداندىق ورتالىق اۋرۋحاناسى قۇرىلىسى جۇرۋدە. ال 2016 جىلى بايقوڭىر قالاسىندا وبلىستىق مەديتسينا ورتالىعىنىڭ فيليالى اشىلعان بولاتىن. ارال، قازالى، قارماقشى اۋداندارىنىڭ جانە بايقوڭىر قالاسىنىڭ تۇرعىندارىنا مامانداندىرىلعان مەديتسينالىق كومەكتىڭ قولجەتىمدىلىگىن ارتتىرۋ ماقساتىندا تەرى كورونارلىق ارالاسۋ ورتالىعى ىسكە قوسىلۋعا دايىن تۇر.

ايماق تۇرعىندارىن تەگىن ءدارى-دارمەكپەن قامتاماسىز ەتۋگە قارجىلاندىرۋ 2 ەسەگە ارتسا، 8 سيرەك نوزولوگيا بويىنشا 80 پاتسيەنتتى ءدارى-دارمەكپەن قامتاماسىز ەتۋگە قاراجات قاراستىرىلعان. قابىلدانعان شارالاردىڭ ناتيجەسىندە قىزىلوردالىقتاردىڭ ءومىر ءسۇرۋ ۇزاقتىعى 1,6 جىلعا ارتىپ، ءولىم-ءجىتىم كورسەتكىشى 5,8 پايىزعا تومەندەدى. تاعى ءبىر ايتا كەتەتىن جايت، سىربويىلىق دارىگەرلەر رەسەيدە، كورەيادا جانە ەۋروپا ەلدەرىندە بىلىكتىلىكتى ارتتىرۋدا.

Abai.kz