ەلىمىزدە بيۋدجەتتىك سالا قىزمەتكەرلەرىنىڭ بىلىكتىلىگىن ارتتىرۋ ءۇشىن بارلىق جاعداي جاسالعان. ماسەلەن، ەندى سىر ءوڭىرىنىڭ اق حالاتتى ابزال جاندارى جەرگىلىكتى باسشىلىقتىڭ قولداۋىمەن الەمنىڭ وزىق كلينيكالارىندا بىلىكتىلىگىن ارتتىراماق.

ناقتىراق ايتساق، قىزىلوردالىق نەوناتولوگ جانە ونكولوگتار وڭتۇستىك كورەيادا بىلىكتىلىكتەرىن ارتتىرماق. بۇل ساپاردىڭ ماقساتى -  وتاندىق مەديتسيناعا ۇزدىك تەحنولوگيا مەن يننوۆاتسيالىق ەمدەۋ تاسىلدەرىن ەنگىزۋ.

ايتا كەتەيىك، سوڭعى ەكى جىل ىشىندە قىزىلوردا وڭىرىندە 24 مامان شەتەلدىك ارىپتەستەرىمەن تاجىريبە الماسقان. سونىڭ ناتيجەسىندە، كومەي ىسىگى دياگنوزى قويىلعان 68 جاستاعى تىنىمباي ماديەۆ حيميوتەراپيانىڭ 6 كۋرسىن قابىلداپ، بۇگىندە جاعدايى جاقسارا تۇسكەن.

«جالپى پالاتادا جاتاتىنبىز. قازىر «بوكس» دەگەن پالاتا اشىلىپ جاقسى بولدى. جاڭادان پرەپاراتتار پايدالانىپ جاتىر. دەمالاتىن بۇرىشتار جاساپ قويعان، ەركىن دەمالامىز. ەمدەيتىن قىزدار وتە جاقسى. يممۋنيتەتىمىز تومەن ەدى، جوعارىلادى. جاڭا تەحنولوگيا پايدالانىپ جاتىر. ريزامىز»، - دەيدى ناۋقاستىڭ جۇبايى كۇلپاش ابىلقاسىموۆا.

جوعارى دوزالى حيميوتەراپيانى وڭتايلى تاسىلمەن جۇرگىزۋدى ونكولوگيالىق ورتالىق ماماندارى وڭتۇستىككورەيالىق دارىگەرلەردەن ۇيرەنىپ كەلگەن. ۆيكتوريا يۋن شەتەلدىك كلينيكادا ءبىلىمىن جەتىلدىرىپ، قازىر ەم-دوم بارىسىندا قولدانىپ ءجۇر. بيىل تاعى 20 مەديتسينا قىزمەتكەرى وڭتۇستىك كورەياعا اتتانادى.

سونىڭ ءبىرى – اسەت جالماعانبەتوۆ. جاس حيرۋرگ بارياتريالىق حيرۋرگيا توڭىرەگىندە تەرەڭدەتىلگەن كۋرستان وتەدى.

 «قىزىلوردا وبلىسىندا ءالى جاسالمايدى، بارياتريالىق حيرۋرگيا دەگەن ءادىس بار. اسقازاننىڭ، سەمىزدىك جانە قانت ديابەتىن ەمدەۋ ءادىسى بولىپ كەلەدى. بۇل قازاقستاننىڭ كەيبىر قالالارىندا جاسالادى. كورەيادا جاسالىپ جاتقان وپەراتيۆتى ەمدەۋ ءادىسى. سول ءبىز باراتىن وقۋ ورنىندا وسى وپەراتيۆتى ادىسپەن جاسايدى. سول ءتاسىلدى مەڭگەرىپ، وسى جاققا ەنگىزسەك دەيمىز»، - دەيدى حيرۋرگ اسەت جالماعانبەتوۆ.

سىر ءوڭىرىنىڭ اق حالاتتى ماماندارىن وقىتۋ جوباسى وبلىستىق بيۋدجەتتەن قارجىلاندىرىلادى.

Abai.kz