مەكتەپ - ءبىلىمنىڭ استاناسى، بالالاردىڭ باسپاناسى. بۇل بارىمىزگە بەلگىلى اقيقات. ەندەشە، مەكتەپتىڭ التىن تىرەگى ارداقتى مۇعالىمدەر ەكەنى ءسوزسىز. مۇعالىم جايلى، ۇستاز جايلى ادامزات بالاسىنىڭ ايتار جىر-داستانى كوپتەپ سانالادى. "ۇستازى جاقسىنىڭ ۇستامى جاقسى" دەگەن ءسوز دە مۇعالىمنىڭ ماڭگىلىك ۇلىلىعىن ايقىنداپ تۇرسا كەرەك.

مۇعالىم مارتەبەسىن كوتەرۋ جايلى قوعامدا ءسوز كوپ. ەلىمىزدەگى ءاربىر جاقسى باستامانىڭ كوشباسشىسى نۇرسۇلتان نازارباەۆ تا ۇستاز ەسىمىن ۇلىقتاۋ جايلى از ايتىپ جۇرگەن جوق. ءتىپتى ناقتى تاپسىرمالار دا بەرگەن. ءبىز بۇل جەردەن وتكەن جىلى بەسىنشى قازاندا جاريالانعان ەلباسىنىڭ قازاقستان حالقىنا ارنالعان جولداۋى جايلى ايتىپ وتىرمىز.

اتالعان جولداۋدىڭ ەكىنشى تاراۋى "قازاقستاندىقتاردىڭ تۇرمىس ساپاسىن ارتتىرۋ" بولاتىن. ءدال وسى ءبولىمنىڭ ءتورتىنشى تارماشاسىندا ەلباسى نۇرسۇلتان نازارباەۆ ەلىمىزدەگى ۇستازداردىڭ مارتەبەسىن كوتەرۋ جايلى ناقتى تاپسىرما بەرەدى. "كەلەسى جىلى «پەداگوگ مارتەبەسى تۋرالى» زاڭدى ازىرلەپ، قابىلداۋ قاجەت دەپ سانايمىن" دەدى ەلباسى جولداۋىندا.

ەلباسىنىڭ ايتۋىنشا، بۇل قۇجات مۇعالىمدەر مەن مەكتەپكە دەيىنگى مەكەمەلەردىڭ بارلىق قىزمەتكەرلەرى ءۇشىن ءارتۇرلى يگىلىكتى قاراستىرىپ، ولاردىڭ جۇكتەمەسىن ازايتۋعا، ولاردى ءجونسىز تەكسەرىستەر مەن مىندەتتەن تىس فۋنكتسيالاردان اراشالاۋعا باعىتتالۋى ءتيىس.

ەلباسىنىڭ وسى جولداۋى جاريالانا سالا، مىڭداعان ۇستازدار قاۋىمىنىڭ توبەسى كوككە جەتكەن ەدى. بۇنداي كەرەمەت باستاما ءبىزدىڭ ارداقتى مۇعالىمدەرىمىزدىڭ قوعامداعى ورنىن بىردەن بيىككە كوتەرىپ تاستاعان. ەلباسى ءوزى ايتقانداي بيىلدان باستاپ ءدال وسى «پەداگوگ مارتەبەسى تۋرالى» زاڭ  جوباسى قوعامدا قىزۋ تالقىلانىپ جاتىر. پارلامەنت وتىرستارىندا دا بىرنەشە مارتە قارالدى. ماسەلەن اقپان ايىندا وتكەن تالقىلاۋدا ماجىلىسمەندەر بۇل زاڭنىڭ قاجەتتىلىگى مەن وزەكتىلىگى تۋرالى كوپ ايتتى. دەپۋتاتتار العاشقى كەزەكتە، مۇعالىمدەردى الەۋمەتتىك قولداۋ، ولاردىڭ كاسىبي قىزمەتىندە قۇقىقتارىن قامتاماسىز ەتۋ ماسەلەلەرىنە باستى نازار اۋداردى

ەندەشە، بۇل زاڭ مۇعالىمدەرگە قانداي جەڭىلدىكتەر بەرەدى دەگەن ساۋال توڭىرەگىندە ازىراق ايتايىق. مۇعالىم مارتەبەسى تۋرالى زاڭ ەڭ الدىمەن مۇعالىمدەردىڭ ۇستەماقىسى ءوسىرۋدى كوزدەيدى. بۇل جوبا اياسىندا ءار ۇستاز ساباق وتكەنى، ءتىپتى داپتەر تەكسەرگەنى ءۇشىن دە جوعارى اقى الاتىن بولادى. انىقىراق ايتقاندا، بۇل سوما بۇرىنعىدان تۋرا ءۇش ەسە وتەدى. تومەن جىلدىقتار ءۇشىن بۇرىن 3 500 تەڭگە تولەنگەن بولسا، ەندى 10 600 تەڭگە تولەۋ كوزدەلگە.

مۇعالىمدەر ءۇشىن بۇدان دا قۋانىشتى جاڭالىق، ولار ەندى زەينەتكە ەرتە شىعا الادى. تۇسىنىكتى ەتىپ ايتقاندا، ءبىلىم جانە عىلىم مينيسترلىگى 30 جىلدىق ەڭبەك ءوتىلى بار مۇعالىمدەردى زەينەتكە ەرتە شىعارۋدى جوسپارلاپ وتىر. باسقاشا ايتقاندا، تابان اۋدارماي شيرەك عاسىردان اسا جۇمىس ىستەگەن كەز-كەلگەن وقىتۋشى زەينەت جاسىن كۇتپەي-اق ەرتەرەك زەينەتكە شىعا الادى دەگەن ءسوز.

بۇدان بولەك، مۇعالىمدەردىڭ جالاقسىن دا ايتارلىقتاي كوتەرۋ كوزدەگەن. ماسەلەن، مۇعالىمدەردىڭ لاۋازىمدىق جالاقىسىنا الداعى ۋاقىتتا لاۋازىمدىق جالاقىنىڭ 25%-نەن كەم ەمەس مولشەردە كوەففيتسيەنت قوسىلاتىن بولادى. بۇعان قوسا، ءوزى قالاسا، عىلىمي قىزمەتپەن اينالىسقىسى كەلەتىن مۇعالىمگە بەس جىلدا ءبىر رەت كەمىندە 6 اي شىعارماشىلىق دەمالىس بەرۋ كوزدەلگەن. ەڭ جاقسىسى، بۇل ارالىقتا ونىڭ ەڭبەك ءوتىلى مەن جالاقىسى تولىق ساقتالاتىن بولادى.

بۇلاردان تىس، مۇعالىمدەردى باسپانامەن قامتۋ، مۇعالىمدەردىڭ بالالارىنا بالاباقشادان كەزەكتەن تىس ورىن بەرۋ ماسەلەسى دە قاراستىرىلعان. بۇل ىسپەن الداعى ۋاقىتتا جەرگىلىكتى اتقارۋشى ورگاندار اينالىساتىن بولادى.

كوبىمىز بىلەتىندەي، دامىعان وركەنيەتتى ەلدەردەا مۇعالىم ماماندىعى اسا بەدەلدى ءارى تابىستى ماماندىق سانالادى. كوپ ەلدەردە مۇعالىمدەر ەلدەگى ەڭ بەدەلدى ادامدار قاتارىنا جاتادى. وكىنىشكە وراي، ءبىزدىڭ ەلدە ۇستازداردىڭ بەدەلى ءسال تومەندەپ قالدى. وسى ماسەلەنى شەشۋ ءۇشىن ەلباسى ارنايى «پەداگوگ مارتەبەسى تۋرالى» زاڭ جوباسىن دايىنداۋدى تاپسىرىپ وتىر. ەگەر بۇل زاڭ قولدانىسقا ەنەتىن بولسا ەلدەگى كوپ ۇستازدىڭ كوڭىلىن كۇپتى ەتكەن كوپ ماسەلە ءوز شەشىمىن تابارىنا كۇمانىمىز جوق.

وسى ۋاقىتقا دەيىن «پەداگوگ مارتەبەسى تۋرالى» زاڭ جوباسىن ازىرلەۋ بارىسىندا سەگىز مىڭنان اسا ۇسىنىستار ءتۇسىپ، قۇجات مۇعالىمدەردىڭ قاتىسۋىمەن جان-جاقتى تالقىلانىپ جاتىر. ءارى بۇل يدەيانى قازىرگى پرەزيدەنت قاسىم-جومارت توقاەۆ تا بارىنشا قولداۋ كورسەتۋدە. ەلىمىزدىڭ تۇڭعىش پرەزيدەنتى مەن قازىرگى پرەزيدەنتى مۇعالىمدەر قاۋىمىنىڭ مارتەبەسىن كوتەرۋگە شىنداپ كىرىسىپ وتىر.

Abai.kz