ەلىمىزدىڭ ەرتەڭى، ۇلتىمىزدىڭ بولاشاعى - جاستار. بۇل ەشقاشان وزگەرمەيتىن زاڭدىلىق. ەلىمىزدىڭ تۇڭعىش پرەزيدەنتى نۇرسۇلتان نازارباەۆ ارقاشان دا جاستارعا قولداۋ ءبىلدىرىپ، قامقورلىق كورسەتىپ كەلەدى. ەگەمەن ەل بولعالى ەلباسىنىڭ ەل جاستارىنا سەنىم ارتپاعان، قولداۋ بىلدىرمەگەن كەزى جوق. وسى ۇلكەن قولداۋدى سەزىنە بىلگەن بارلىق جاس مەملەكەت ءۇشىن بارىنشا قىزمەت اتقارۋدا.

ەلباسىمىز نۇرسۇلتان ءابىشۇلى نازارباەۆتىڭ وتكەن جىلعى 5 قازانداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا 2019 جىلدى ەلىمىزدە جاستار جىلى دەپ جاريالاعان بولاتىن. وسىعان وراي بيىل ەل جاستارىنا ۇكىمەت تاراپىنان كوپتەگەن قولداۋلار كورسەتىلىپ جاتىر. ەلىمىزدە ارنايى جاستار جىلىنىڭ جاريالانۋى قۇرمەتتى ەلباسىمىزدىڭ جاس بۋىنعا ارناعان جارقىن ۇندەۋىنە اينالدى دەۋگە بولادى.

ەلباسى جاستاردىڭ بولاشاعى مەن بۇگىنگى ومىرىنە ءاردايىم كوڭىل ءبولىپ وتىرادى. ول كىسى جىل سايىنعى ءداستۇرلى جولداۋلارىندا ەلىمىزدەگى جاستار ساياساتىن جەتىلدىرە ءتۇسۋىدى ۇنەمى قاداعالاپ ايتادى. ەلىمىزدىڭ بولاشاقتا قاي دەڭگەيدە دامىپ، قانداي مەملەكەت بولاتىنى بۇگىنگى جاستاردىڭ قولىندا. سونداقتان قازىرگى جاستاردىڭ جاقسى ءبىلىم الىپ، ساپالى بۋىن بولىپ قالىپتاسۋىنا جاعداي جاسالۋى كەرەك.

جاستاردى قولداۋ دەگەندە ەڭ الدىمەن ەسە تۇسەتىنى، ولاردى تۇراقتى تۇردە جۇمىسپەن قامتۋ ماسەلەسى ەكەنى ءسوزسىز. ءبارىمىزدىڭ باستى نازارىمىزدا ەل جاستارىنىڭ جەردە قالماي جۇمىسپەن قامتىلۋى. وسى ماسەلەنىڭ وڭ شەشىم تابۋى ءۇشىن ەلباسىنىڭ باستاماسىمەن، ەلىمىزدە «جۇمىسپەن قامتۋ-2020»، «ديپلوممەن اۋىلعا»، «بيزنەستىڭ جول كارتاسى»، «جۇمىسپەن قامتۋ-2020»، «ءاربىر وتباسىنا «7-20-25» باعدارلاماسى اياسىندا باسپانا الۋدىڭ جاڭا مۇمكىندىكتەرىن بەرۋ»، «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ»، قاتارلى وتە كوپتەگەن باعدارلامالار قولعا الىنىپ، ەلىمىزدىڭ تۇكپىر-تۇكپىرىندە جەمىستى تۇردە اتقارىلۋدا.

الەمنىڭ ءار تۇكپىرىندەگى كەز كەلگەن مەملەكەتتە ادامنىڭ الاڭسىز ءومىر ءسۇرۋى مەن ەركىن دامۋىنا تولىق مۇمكىندىك بەرەتىن ءۇش الىپ كۇش بار دەۋگە بولادى. تۇسىنىكتى ەتىپ ايتقاندا، ولار – ءبىلىم، جۇمىس جانە باسپانا. وسى ۇشەۋى بىرىككەن جاعدايدا ەلدىڭ ەرتەڭى تىپتەن نۇرلى بولماق. وسىنى كوزدە ۇستاعان قازاقستان بيلىگى ءبىر قاتار ناقتى شارالار اتقارىپ، ەل جاستارىنىڭ ەڭسە تىكتەۋىنە كومەكتەسىپ كەلەدى. بۇل جەردە جوعارىدا اتاپ وتكەن بىرقانشا مەملەكەتتىك باعدارلامالاردىڭ ماڭىزىن اتاپ وتۋگە بولادى.

جاستاردى جۇمىسپەن قامتۋ جايلى ايتىپ وتىرمىز، بۇل باعىتتا مەملەكەت تاراپىنان قولعا الىنىپ جاتقان جاستاردىڭ كاسىپكەرلىكپەن اينالىسۋىن قولداۋ باعدارلامالارىن دا اتاپ وتۋگە بولادى. بۇل باعىتتا 2010 جىلدان بەرى جۇمىس ىستەپ كەلە جاتقان «بيزنەستىڭ جول كارتاسى – 2020» باعدارلاماسىنىڭ ءرولى ۇلكەن. بۇل تۋرالى ەلباسى بەسىنشى قازانداعى جولداۋىندا دا ايتتى.

"وڭىرلەرگە جۇمىس ساپارىم بارىسىندا مۇنىڭ تيىمدىلىگىنە كوز جەتكىزدىم. باعدارلامانىڭ قولدانىلۋ مەرزىمىن 2025 جىلعا دەيىن ۇزارتۋ كەرەك. وسى باعدارلامانى جۇزەگە اسىرۋ ءۇشىن جىل سايىن قوسىمشا كەمىندە 30 ميلليارد تەڭگە ءبولۋدى قاراستىرامىن. بۇل 3 جىل ىشىندە قوسىمشا كەمىندە 22 مىڭ جاڭا جۇمىس ورنىن اشۋعا، 224 ميلليارد تەڭگە سالىق تۇسىرۋگە جانە 3 تريلليون تەڭگەنىڭ ءونىمىن وندىرۋگە مۇمكىندىك بەرەدى", - دەگەن ەدى ەلباسى.

ءدال وسى «بيزنەستىڭ جول كارتاسى – 2020» مەملەكەتتىك باعدارلاماسى اياسىندا يندۋستريالىق-يننوۆاتسيالىق ماڭىزدى جوبالاردى جۇزەگە اسىرۋ ءۇشىن شاعىن كاسىپكەرلىك سۋبەكتىلەرىنە قايتارىمسىز تۇردە گرانتتار بەرۋ جۇمىسى ءجۇرىپ جاتىر. وسى باعدارلاماعا ساي، كاسىبىن ەندى باستاعان جاس كاسىپكەرلەر مەن مۇمكىندىگى شەكتەۋلى ازاماتتارعا باسىمدىق بەرىلەدى. ايتا كەتەرلىگى، جاستار قايتارىمسىز گرانتتى ۇتىپ الۋ ءۇشىن «بيزنەستىڭ جول كارتاسى – 2020» نەمەسە «ەڭبەك» مەملەكەتتىك باعدارلامالارى شەڭبەرىندە ارنايى كاسىپكەرلىك ءبىلىم الۋعا مىندەتتى.

مەملەكەتتىڭ قولداۋىمەن، شاعىن جانە ورتا كاسىپكەرلىكتىڭ دامۋى جاڭا جۇمىس ورىندارىنىڭ اشىلۋىنا جانە جاستاردىڭ جۇمىسپەن تولىق قامتىلۋىنا وڭ اسەر ەتەدى. ەلباسى ارنايى جاستار جىلى دەپ جاريالاعان 2019 جىلى وسىنداي مەملەكەتتىك باعدارلامالار اياسىندا ەلىمىزدەگى كوپتەگەن جاستار جۇمىسپەن قامتىلىپ جانە باسپانالى بولادى دەگەن سەنىمدەمىز.

Abai.kz