ءبىلىمدى ۇرپاق - بولاشاقتىڭ كەپىلى. ءبىلىمى مەن عىلىمىن قاتار دامىتقان ەل الەمدىك ارەنادا ءوز ورنىن ويىپ تۇرىپ الادى. بۇل ۇستانىم ءار دايىم مەملەكەت باسشىلارىنىڭ باستى نازارىندا بولىپ كەلەدى. العاش تاۋەلسىزدىك العان ساتتەن باستاپ ەلباسى نۇرسۇلتان نازارباەۆتىڭ جول سىلتەۋىمەن جاستار ساياساتى جاقسى جولعا قويىلىپ، ەلدىڭ ەرتەڭى بولعان جاس ۇلاندارىمىز ۇلتتىق باعىتتا تاربيەلەنىپ كەلەدى.

قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆ جاستاردىڭ ساپالى ءبىلىم الۋىنا ءار كەز كوڭىل ءبولىپ كەلەدى. بالالاردىڭ الاڭسىز ءبىلىم الىپ، ساپالى ۇرپاق بولىپ قالىپتاسۋى ءۇشىن مەملەكەت تاراپىنان توقتاۋسىز قولداۋ كورسەتىلىپ كەلە جاتقانى بەلگىلى. بۇل ءسوزىمىزدىڭ دالەلى جىل سايىن اشىلىپ جاتقان جاڭا مەكتەپتەر، بالا باقشالار مەن قۇرلىسى جىل سايىن جاڭارعان ۋنيۆەرسيتەتتەر. ەلباسى ءوزى باستاماشى بولعان "100 مەكتەپ" جوباسىنىڭ اياسىندا دا ەلىمىز كولەمىندە كوپتەگەن ءبىلىم وشاقتارى بويى كوتەردى.

ەلباسى وتكەن جىلدىڭ قازان ايىنىڭ بەسىندە قازاقستان حالقىنا ارناپ ءداستۇرلى جولداۋىن جاريالادى. كەزەكتى جولداۋدا دا ەلدەگى ەڭ وزەكتى ماسەلەلەر ءسوز بولىپ، حالىقىتڭ ءال-اۋقاتىن كوتەرۋ، حالىق تۇرمىس ساپاسىن ارتتىرۋ، ءومىر سۇرۋگە قولايلى ورتا قالىپتاستىرۋ ماسەلەلەرىن جان-جاقتى سارالاپ، ناقتى تاپسىرمالار بەردى.

اتالعان جولداۋدىڭ ەكىنشى تاراۋى "قازاقستاندىقتاردىڭ تۇرمىس ساپاسىن ارتتىرۋ" دەپ اتالدى دا، بۇل تاراۋدا ەل تۇرعىندارىنىڭ تۇرمىس ساپاسىن بۇرىنعىدان دا جوعارلاتا ءتۇسۋ ماقساتىندا ارنايى تاپسىرمالار بەرىلدى. وسى تاراۋدىڭ ءبىرىنشى، ەكىنشى، ءۇشىنشى، ءتورتىنشى، بەسىشى تارماقتارىندا ءبىلىم سالاسىنىڭ جۇمىسىن ودان ءارى جاقسارتۋ تۇرعىسىنان تاپسىرمالار بەرىلدى. اتاپ ايتقاندا، ءبىلىم بەرۋ وشاقتارىنىڭ ساپاسىن جاقسارتۋ، وقۋشىلار مەن وقىتۋشىلاردىڭ ىشكى-سىرتقى قىسىمىن ازايتۋ، سونىمەن قاتار، مەكتەپتەر مەن بالا باقشالارداعى قاۋىپسىزدىك ماسەلەلەرىن قامتاماسىز ەتۋ بويىنشا ناقتى ۇسىنىس-تاپسىرمالار ايتىلدى.

"ءبىلىم الۋدىڭ قولجەتىمدىلىگىن ارتتىرۋ ماقساتىندا وقۋشىلارعا ورىن جەتىسپەيتىنى، مەكتەپتەردىڭ ءۇش اۋىسىمدا وقىتۋ جانە اپات جاعدايىندا بولۋ پروبلەمالارى مەيلىنشە سەزىلىپ وتىرعان  وڭىرلەر ءۇشىن ۇكىمەتكە 2019-2021 جىلدارعا ارنالعان بيۋدجەتتەن قوسىمشا 50 ميلليارد تەڭگە قاراستىرۋدى تاپسىرامىن".

بۇل ەلباسى جولداۋىنان الىنعان ءۇزىندى. كورىپ وتىرعاندارىڭىزداي تۇڭعىش پرەزيدەنت  ەلىمىزدىڭ ءبىلىم سالاسىنداعى ەڭ وزەكتى ماسەلەنى ءسوز ەتىپ وتىر. ءبىزدىڭ كەي وڭىرلەردە شىنىمەن پارتا-ورىن جەتىسپەيتىن جاعدايلار بار. كەي مەكتەپتەردە وقۋشىلار بىرنەشە اۋىسىممەن وقىپ جۇرگەنى جاسىرىن ەمەس. وسى ماسەلەنى كوزدە ۇستاعان ەلباسى 2019-2020 جىلعى وقۋ جىلىندا بيۋدجەتتەن قوسىمشا 50 ميلليارد تەڭگە ءبولۋدى تاپسىرعان بولاتىن.

ودان بەرى جارتى جىلدان ارتىق ۋاقىت ءوتتى. ءبارىمىز وسى تاپسىرمالاردىڭ ناقتى جەمىسىن كورىپ ءجۇرمىز. ءسوزىمىزدىڭ دالەلى رەتىندە ايتا كەتەيىك، كۇنى كەشە قاراعاندى وبلىسى، جەزقازعان قالاسىندا 900 ورىنعا ارنالعان سۋ جاڭا مەكتەپتىڭ قۇرلىس جۇمىستارى باستالىپ كەتتى. بۇل قۋانىشتى حابار بارشا اقپارات قۇرالدارىندا جازىلىپ جاتىر. بىزدە سول اقپاراتپەن بولىسە كەتۋدى ءجون كوردىك.

بۇل مەكتەپ سالىنىپ بىتسە تەك جەزقازعان قالاسىنىڭ عانا ەمەس، كورشىلەس ۇلىتاۋ اۋدانىنىڭ دا جەتكىنشەكتەرى ءبىلىم الاتىن بولادى. قازىرگى تاڭدا مەكتەپ قۇرلىسى باستالىپ، وقۋ عيماپاتتارىنىڭ ىرگەتاسىن قۇيۋ، باعانالاردى ورناتۋ سىندى العاشقى جۇمىستارى قارقىندى جۇرگىزىلىپ جاتىر. مەكتەپتى وبلىستا بۇعان دەيىن دە بىرنەشە قالا مەن اۋدانداردا ءتۇرلى نىساندار سالۋمەن اينالىسىپ جۇرگەن «اسپاپ» وندىرىستىك كووپەراتيۆى قولعا الىپ وتىر.

جوسپار بويىنشا، جاڭا مەكتەپتە ينكليۋزيۆتى وقىتۋ جولعا قويىلماق. بۇنداي زاماناۋي ءبىلىم وشاقتارى وقۋشىلاردىڭ باپالى ءبىلىم الۋىنا مول مۇمكىندىك تۋدىرادى دەپ سەنىم ارتۋعا ابدەن بولادى. وقۋ ورداسىنىڭ قۇرلىس جۇمىستارى 2020 جىلدىڭ قىركۇيەگىنە دەيىن اياقتالدى دەپ جوسپارلانىپ وتىر. ەگەر جوسپارداعىداي بولسا 2020-2021 جىلعى وقۋ ماۋسىمىنان باستاپ وقۋشىلاردى قابىلدايتىن بولادى.

ءسوز سوڭىندا، ەلدىڭ ەرتەڭى، ۇلتتىڭ بولاشاعى بولعان جاستاردى ساپالى بىلىممەن سۋسىنداتاتىن وسىنداي ءبىلىم وشاقتارىنىڭ كوپتەپ سالىنعانىن قولدايمىز. ەلباسىنىڭ جولاۋدا ايتقان تاپسىرمالارىنا وراي، ءار وڭىردە وقۋشىلاردى تولىق قابىلداي الاتىن، اۋىسىمسىز وقىتا الاتىن ساپالى مەكتەپتەر سالىنعانى ءجون.

Abai.kz