مەملەكەت باسشىسى قاسىم-جومارت توقاەۆ قازاقستانداعى شەتەلدىك  سالىمشىلاردىڭ (ينۆەستورلاردىڭ) 32-ءشى پلەنارلىق سەسسياسىنىڭ وتىرىسىنا قاتىستى. 

القا-قوتان جيىندا ارنايى ءسوز العان پرەزيدەنت توقاەۆ الەمدە بولىپ جاتقان ساياسي ءھام الەۋمەتتىك ۇدەرىستەردىڭ ەل دامۋىنا، ونىڭ ەكونوميكاسىنا ىقپالى جايلى اڭگىمە ءوربىتىپ، ەلباسى جولداۋىندا ايتىلعان ءتورتىنشى ونەركاسىپتىك رەۆوليۋتسيا، گەوساياسي احۋال مەن ەكونوميكالىق قارىم-قاتىناس ماسەلەلەرىنە تىكەلەي اسەر ەتەتىن فاكتورلارعا توقتالدى.

"اۆتوماتتاندىرۋ جانە تسيفرلاندىرۋ جۇمىس كۇشىنىڭ قۇنىن ايتارلىقتاي ءتۇسىرىپ جىبەردى. ەكونوميكالىق ءوسىم ءۇشىن رەسۋرس رەتىندە ارزان جۇمىس كۇشىن پايدالاناتىن ەلدەر دامۋ جولىندا ەلەۋلى پروبلەمالارعا كەزدەسىپ جاتىر. قازىرگى كەزەڭدە ادام كاپيتالىنىڭ ءرولى، اسىرەسە، ءبىلىم سالاسىندا بىردەن ءوسىپ بارادى. سوندىقتان، ادام كاپيتالىنا سالىنعان ينۆەستيتسيا ەلدىڭ دامۋىنا جانە قوعامنىڭ ءال-اۋقاتىنىڭ ارتۋىنا سەپتىگىن تيگىزەدى", – دەدى قازاقستان پرەزيدەنتى.

پرەزيدەنت قاسىم-جومارت كەمەلۇلى قازاقستانداعى ادامي كاپيتالدى دامىتۋ ماسەلەلەرىنە  دە توقتالدى. پرەزيدەنتتىڭ ايتۋىنشا، قازىرگى تاڭدا مامان ازىرلەۋ، بىلىكتى كادرلار دايىنداۋ باستى مىندەتتەردىڭ ءبىرى. ەڭبەك نارىعىنداعى سۇرانىسقا ساي بىلىكتى، كاسىبي مامانداردى ازىرلەۋ ءۇشىن ەڭ الدىمەن كادرلار دايىنداۋ جۇيەسىنىڭ ساپاسىن ارتتىرۋ ماڭىزدى.

وسىعان قاتىستى مەملەكەت باسشىسى قولعا الىنۋى ءتيىس شارالارعا دا جەكە توقتالعان. اتاپ ايتقاندا، كاسىبي تەحنيكالىق ءبىلىم بەرۋ جۇيەسىن جاڭعىرتۋ، جوعارى ءبىلىم بەرۋدىڭ كاسىپورىندارمەن، بيزنەسپەن بايلانىسىن كۇشەيتۋ قاجەت. پرەزيدەنت جوعارى ءبىلىم بەرۋ جۇيەسىن جەتىلدىرىپ، شەتەلدىك جوعارى وقۋ ورىندارمەن اكادەميالىق بايلانىس ورناتۋعا شەتەلدىك ينۆەستورلار كەڭەسى ءوز ۇلەسىن قوسا الاتىنىن اتاپ ءوتتى.

"كەز كەلگەن كومپانيانىڭ باستى بايلىعى – ادام. سوندىقتان كاسىپورىننىڭ كىرىس مولشەرىنە قاراي قىزمەتكەرلەرگە سىياقىلاردى ءادىل ۇلەستىرۋ ماڭىزدى. بۇل – الەۋمەتتىك جاۋاپكەرشىلىكتىڭ نەگىزگى كىلتى. بۇل وتاندىق كاسىپورىندارعا دا، شەتەلدىكتەر قاتىسقان كومپانيالارعا دا قاتىستى. ۇلتتىق تابىستىڭ ءادىل ءبولىنۋى – ءار مەملەكەتتىڭ نەگىزگى مىندەتى", – دەدى قاسىم-جومارت توقاەۆ.

قازاقستان پرەزيدەنتى ءوز بايانداماسىندا ەلباسى نۇرسۇلتان نازارباەۆتىڭ 5 ينستيتۋتسيونالدىق رەفورماسىندا اتالعان ارنايى ماسەلەلەرگە دە توقتالعان.

ء"بىز ەكونوميكالىق ىنتىماقتاستىق جانە دامۋ ۇيىمىنا كىرەتىن ەلدەردىڭ ءومىر ءسۇرۋ ساپاسى جونىندەگى ستاندارتتارىن ەنگىزۋدى نەگىزگە الدىق. سالىق، كاسىپكەرلىك، زياتكەرلىك مەنشىك جانە قارجى سالاسىنداعى زاڭنامامىزدى دايەكتى جەتىلدىرىپ كەلەمىز. قازاقستان پوستكەڭەستىك كەڭىستىكتە بىرەگەي ينستيتۋت – «استانا» حالىقارالىق قارجى ورتالىعىن قۇردى. سونىڭ ارقاسىندا قازاقستان ءوزىنىڭ ماقساتىنا – الەمنىڭ وزىق 30 ەلىنىڭ قاتارىنا قوسىلۋعا جاقىنداپ كەلەدى", – دەدى قاسىم-جومارت توقاەۆ.