قىزىلوردا وبلىسى قازالى اۋدانى، بىرلىك اۋىلىنىڭ تۇرعىنى گۇلزات قۇتجانوۆا جوعارى ساپاداعى پوپكورن ءوندىرۋدى قولعا الدى،- حابارلايدى اباي-اقپارات.

ايتا كەتەتىن جايت، ەل نارىعىندا پوپكورن ونىمىنە سۇرانىس مول. جانە كاسىپتىڭ بۇل تۇرىمەن اينالىساتىندار بىرەڭ-ساراڭ عانا. كاسىپكەر جاڭا تاۋارعا «تومپي» دەگەن اتاۋ بەرىپتى.

- مەن «بيزنەس باستاۋ» باعدارلاماسىنىڭ وقىتۋ كۋرسىنان ءوتىپ، ايماقتىق ينۆەستيتسيالىق ورتالىعىنان نەسيە الىپ، كاسىبىمدى باستادىم. نەسيە قاراجاتىنا رەسەيدەن 3 قۇرىلعى اكەلىپ، جۇمىستى باستاپ كەتتىم. قازىردىڭ وزىندە ءۇش بىردەي قىزمەت تسەح جۇمىسىن جانداندىرۋعا اتسالىسىپ جاتىر. پوپكورننىڭ نارىقتاعى قۇنى دا قىمبات ەمەس. بار بولعانى - 80 تەڭگە. كاسىپورىن قازىردىڭ وزىندە 20 مىڭ پوپكورن ءونىمىن وندىرەدى، - دەيدى كاسىپكەر.

ونىڭ ايتۋىنشا، ونىمگە قازالى اۋدانىن قوسپاعاندا، ارال، بايقوڭىر جانە قىزىلوردا قالاسىنان سۇرانىس وتە جوعارى ەكەن. ول جاڭا باستاعان كاسىبىن برەندكە اينالدىرۋدا ويلاستىرىپ وتىر.

- «تومپي» پوپكورن ءونىمىن برەندكە اينالدىرعىم كەلەدى. ءونىمنىڭ قاپتاماسىندا تاقيا كيگەن سمايليك بەينەسى تۇر. ياعني وتاندىق ءونىم ەكەندىگىن ءبىلدىرۋ ماقساتىندا وسىلاي جاسادىق. پوپكورندى حالىققا كەڭىرەك تانىستىرۋ ءۇشىن ساۋدا ورتالىقتارىمەن كەلىسىمگە كەلۋدى جوسپارلادىق. حالىق ءجيى باراتىن «ماگنۋم» ساۋدا ورتالىعىندا پوپكورن ساتىلمايدى ەكەن. سوندىقتان ءبىزدىڭ ءونىمىمىزدى ءىرى ساۋدا نۇكتەلەرىنە شىعارۋ ءىسىن قولعا الدىق،- دەيدى گ.قۇتجانوۆا.

جالپى، قازالى اۋدانى «قازالى كامپيتى»، «ءدامدى» ساۋدا بەلگىسىمەن پاستەرلەگەن ءسۇت وندىرىسىمەن ەلىمىزگە كەڭىنەن تانىمال.

ال سوڭعى جىلدارى اۋداندا بيزنەس باستاۋعا نيەتتىلەر قاتارى ارتقان.

Abai.kz