سىر وڭىرىندە ءىت سالاسىندا ايتۋلى جاڭالىقتار بار. قىزىلوردالىق ەۆگەني دەميدەنكو الەمگە ايگىلى Youtube حوستينگىمەن باسەكەلەسە الاتىن جاڭا پلاتفورما ويلاپ تاپتى،- دەپ حابارلايدى اباي-اقپارات.

جاس دارىننىڭ جاڭا باعدارلاماسى Youtube جەلىسىندە جوق جاڭا فۋنكتسيالاردى ورىنداي الادى. اتالعان بەينەحوستينگ 2020-2021 جىلدارى تولىق تامامدالادى. بۇگىندە ەۆگەنيدىڭ جوباسى جابىق كورسەتىلىم جاعدايىندا تۇر.

سونىمەن قاتار قىزىلوردالىق ورەنگە الەمگە ايگىلى «Boeing» كومپانياسى ۇسىنىس جاساعان. قولدانىستاعى ۇشاقتاردىڭ بازاسىنا نەگىزدەلگەن جاڭا اۋە كەمەسىنىڭ جوباسىن ازىرلەگەن ونىڭ ءىت سالاسىنداعى جوبالارى شەتەلدىك كومپانيالاردان قولداۋ تابۋدا.

- ۇشاقتاعى تەحنيكالىق جانە ديزاينەرلىك راسىمدەۋدى تولىعىمەن وزگەرتىپ، ونىڭ جاڭا جانە رەۆوليۋتسيالىق مودەلىن جاساپ شىعاردىم. جوبا «Nazarbayev Foundation School Challange» بايقاۋىنىڭ بازاسىندا تانىستىرىلدى جانە مەن وندا جەڭىمپاز اتانىپ، انگليانىڭ جەتەكشى جوعارعى وقۋ ورىندارىنا بارىپ، ءبىلىمىمدى جەتىلدىرۋ مۇمكىندىگىنە يە بولدىم، - دەيدى ول.

جالپى، قىزىلوردا وبلىسىندا ءىت سالاسىندا العا جىلجۋ بار. ماسەلەن، وتكەن جىلى وبلىس ورتالىعىندا ءىت پارك ءوز جۇمىسىن باستاعان بولاتىن. ونىڭ قۇرامىندا اقپاراتتىق-تىركەۋ ءبولىمى، جۇمىس ايماعى، پرەزەنتاتسيالاۋ ايماعى، بيزنەس-كەلىسىم ايماعى، اڭگىمەلەسۋ-دەمالىس ايماعى، وقىتۋ ايماعى، تەحنو-لابوراتوريا (ماستەرسكايا), 3D ستۋديا، سەرۆەرلىك بولمە بار. ءىت-پاركتى قۇرۋ تالانتتى جاستاردى قولداپ، ولار جاساعان يننوۆاتسيالىق جوبالاردى جۇزەگە اسىرۋعا، ءتۇرلى لابوراتوريالىق سيمۋلياتور، 2D, 3D گرافيكالىق جوبالاردى ازىرلەۋ مەن وندىرىستەگى قولدانىسىن تەستىلەۋگە، اقپاراتتىق-باعدارلامالىق ونىمدەر جاساپ شىعارۋعا، ءوندىرىس جانە وبلىس دامۋىنىڭ سالالارىن اۆتوماتتاندىرۋعا جانە ولارعا قىزمەت كورسەتۋگە مۇمكىندىك بەرەدى.

Abai.kz