الماتىنىڭ اۆتوبۋستارىنا قازاق ءتىلى قاجەت ەمەس پە، ساعىنتاەۆ مىرزا؟
الماتى قالاسىندا جانە قالا ماڭى اۋىلدارىنا قاتىنايتىن قوعامدىق كولىكتەردە كەزدەسەتىن كەمشىلكتەر از ەمەس. ول جايلى ايتىلىپ تا، جازىلىپ تا ءجۇر. قالا ماڭىنا قاتىنايتىن كولىكتەردىڭ كونەلىگى، جۇرگىزۋشىلەر مەن كوندۋكتورلاردىڭ جۇمىسىنا سالعىرتتىعى ءجيى سىنعا ۇشىرايدى.
وسىنداي ولقىلىقتاردىڭ ءبىرىن جازۋشى زامانبەك ابدەشەۆ Facebook جەلىسىندەگى پاراقشاسىندا جازدى. ول كىسىنىڭ ايتۋىنشا، الماتى قالاسىنداعى № 65 اۆتوبۋس ايالدامالاردى مەملەكەتتىك تىلدە مۇلدە حابارلامايتىن بولعان.
«اعايىندار! الگىندە الماتى قالاسىنداعى ءنومىرى الپىس بەسىنشى اۆتوبۋسپەن كەلدىم. بۇرىن ايالدامالاردى ماگنيتتىك تاسپامەن قازاق جانە ورىس تىلدەرىندە حابارلاۋشى ەدى. كەيىنگى كەزدەردە سونىڭ ورىس تىلدەگىسىن عانا قالدىرىپ، قازاق تىلىندەگىسىن ءوشىرىپ تاستاپتى. كەيدە «كوشەسى» دەگەن جارىم-جارتىلاي سوزدەر ەستىلىپ قالادى دا، ورىس تىلىندەگىسى ساڭقىلداپ قويا بەرەدى. اۆتوبۋس جۇرگىزۋشىسىنەن سۇراسام، ءوزى قازاق جىگىت ەكەن، قازىر بارلىق كولىكتەردە سولاي ىستەدى عوي دەيدى. بۇل نە باسىنۋ؟! قۇرمەتتى قالا اكىمى ساعىنتاەۆ باقىتجان مىرزا، مىنا جونسىزدىككە جول بولسىن. بۇل قازاق ءتىلىن، قازاق ۇلتىن سىيلاماۋ ما؟! سەندەر، اكىم-قارالار، قوعامدىق كولىككە وتىرمايسىڭدار عوي. ءبىر ۋاقىت سوعان وتىرىپ، وسىنداي جولسىزدىقتارعا ءمان بەرسەڭدەرشى! اۆتوبۋستا وسىنى ايتىپ، بۇل قالاي دەسەم، ورىس اعايىندار ماعان قارسى سويلەپ جاتىر. ال قازاقتار اۋىزدارىنا سۋ ۇرتتاپ العانداي ۇندەمەيدى. وسى ءبىز قايدا كەتىپ بارامىز؟! شىدامنىڭ دا شەگى بار ەمەس پە؟! اينالايىن جاماعات، ءۇن قوسىڭدار! مۇنداي سۇمدىققا جول بەرمەيىك»، - دەيدى جازبا اۆتورى.
ەلىمىزدە مەملەكەتتىك تىلگە دەگەن قۇرمەتسىزدىك مۇلدە ازايماي تۇر. مەملەكەتتىك ءتىلدىڭ مارتەبەسىن كوتەرۋ جايلى كۇندە ايتىلىپ جاتسا دا، بۇل ماسەلەگە شەكەسىنەن قارايتىن شەنەۋنىكتەر از ەمەس. مەملەكەتتىك ورگانداردىڭ ءوزى ءمان بەرمەگەن سوڭ، حالىققا قىزمەت كورسەتەتىن جەكە مەنشىك مەكەمەلەر مەملەكەتتىك ءتىلدى اسا قاجەتسىنبەيدى دە.
قوعامدىق كولىكتە ايالدامالاردى قازاق تىلىندە حابارلاماۋ - مەملەكەتتىك تىلگە دەگەن قۇرمەتسىزدىكتىڭ ءبىر كورىنىسى. ەندەشە بۇعان جول بەرگەن جاۋاپتى ادامدارعا ءتيىستى شارا قولدانۋ كەرەك. الماتى قالاسى اكىمدىگى بۇل جاعدايعا نازار اۋدارادى دەگەن سەنىمدەمىز...
Abai.kz
