اقمولا پوليتسەيلەرى ءىزىن سۋىتپاي اقمولا تىرەك پۋنكتىنىڭ "وحوتزووپروم" رمقك ورتالىق ايماقتىق فيليالىنىڭ ينسپەكتورلارىنا شابۋىل جاساعان كۇدىكتىلەردى قۇرىقتادى، دەپ حابارلايدى اقمولا وبلىسى پوليتسيا دەپارتامەنتىنىڭ ءباسپاسوز قىزمەتى.

كۇدىكتىلەر اكەسى مەن ۇلى بولىپ شىقتى. ولار ارقالىق قالاسىندا تۇرادى. "45 جاستاعى كۇدىكتى مەن ونىڭ 20 جاستاعى ۇلى، ەكەۋى دە ارقالىق قالاسىنىڭ تۇرعىنى بولىپ شىقتى، پوليتسيادان جاسىرىنىپ، اۆتوكولىكتەن قۇتىلۋعا تىرىستى، الايدا، اقمولا جەدەل ۋاكىلدەرىنىڭ ۇيلەسىمدى ءىس-ارەكەتتەرىنىڭ ارقاسىندا ولار قوستاناي وبلىسىنىڭ اۋماعىندا ۇستالدى", - دەلىنگەن حابارلامادا.

ەسكە سالايىق، 23 شىلدەدە اقمولا تىرەك پۋنكتىنىڭ "وحوتزووپروم ءوب" رمقك ورتالىق ايماقتىق فيليالىنىڭ ينسپەكتورلارى جارقايىڭ اۋدانىنىڭ اۋماعىندا تابيعاتتى قورعاۋ زاڭناماسىن بۇزۋدى انىقتاۋ جانە جولىن كەسۋ بويىنشا ءىس-شارالاردى وتكىزۋ كەزىندە اقبوكەندى اتۋ فاكتىسى انىقتالعان. براكونەرلەردىڭ اۆتوماشيناسىن قۋ كەزىندە ەكى ينسپەكتور جارالانىپ، كەيىننەن بىرەۋى قايتىس بولعان. 1975 جىلى تۋعان ەكىنشى جابىرلەنۋشى اۋداندىق اۋرۋحاناعا جاتقىزىلدى.

دەرەۋ اقمولا پوليتسەيلەرى كۇدىكتىلەردى ۇستاۋ بويىنشا ءىس-شارالار كەشەنىن جۇرگىزىپ، ۇستاۋ جوسپارىن ەنگىزدى. ارنايى وپەراتسياعا جارقايىڭ، ەسىل جانە جاقسى اۋداندىق پوليتسيا بولىمدەرىنىڭ جەكە قۇرامى قاتىستى، جارقايىڭ جانە كورشىلەس اۋدانداردىڭ اۋماعىندا 10 بەكەت بلوگى قويىلدى.

بۇل قىلمىستىڭ اشىلۋى ىشكى ىستەر ءمينيسترى مەن پوليتسيا دەپارتامەنتى باسشىلىعىنىڭ باقىلاۋىندا بولدى. اتالعان دەرەككە قاتىستى قر قك 99-بابى 1-بولىگى (كىسى ءولتىرۋ) بويىنشا سوتقا دەيىنگى تەرگەۋ جۇرگىزىلىپ جاتىر.

Abai.kz