بۇگىن سەمەي قالاسىندا “قازاتومپروم” ۇلتتىق كومپانياسىنىڭ بۇرىنعى باسشىسى مۇحتار جاكىشەۆتى مەرزىمىنەن بۇرىن بوساتۋ تۋرالى سوت وتىرىسى ءوتتى. سوت بارىسىندا جاكىشەۆتىڭ ادۆوكاتى نۇرلان بەيسەكەەۆ ونىڭ دەنساۋلىعىنىڭ ناشارلىعى جانە كىناسىزدىگى جونىندە ءتۇرلى دەرەكتەر كەلتىردى. ال مۇحتار ەركىنۇلىنىڭ ءوزى “مەنى ايىپتاۋلارىڭ نەگىزسىز” دەدى.

سونىمەن قاتار ول وتىرعان تۇرمەنىڭ باسشىلىعى مەن دارىگەرلەرى دە  جاكىشەۆتىڭ بوستاندىققا شىعۋىن قولدايتىنىن ايتقان. الايدا، پروكۋرور “كىناسىن مويىنداماعانى ءۇشىن” ونىڭ بوساتىلۋىنا قارسىلىق ءبىلدىردى.

وسى ۋاقىتقا دەيىن ءباسپاسوز بەتىندە مۇحتار ەركىنۇلىنىڭ دەنساۋلىعى ناشارلاپ كەتكەنى تۋرالى بىرنەشە رەت جازىلعان بولاتىن. ال، 2017 جىلى ونىڭ اناسى رايسا جاكىشەۆا ەكس-پرەزيدەنت ن.نازارباەۆقا حات جازىپ، ۇلىن كەشىرۋدى سۇراعان. 2018 جىلى قۇقىق قورعاۋشى، قوعام بەلسەندىسى باقىتجان تورەعوجينا الەۋمەتتىك جەلىدەگى پاراقشاسىنا جاكىشەۆتىڭ دەنساۋلىعى ناشارلاپ كەتكەنىن، كۇنىنە 30 ءدارى قابىلدايتىنىن جازعان.

ايتا كەتەيىك، مۇحتار جاكىشەۆ “قازاتومپروم” كومپانياسىنىڭ باسشىلىعىنا 1998 جىلى تاعايىندالعان. وعان دەيىن بىرنەشە كومپانيالاردا باسشىلىق قىزمەتتە بولدى. ال، 2009 جىلدىڭ مامىر ايىندا تۇتقىندالىپ، “مەملەكەت مۇلكىن جەكە ماقساتىنا پايدالانىپ، قازاقساننىڭ ءىرى ۋران كەن ورىندارىنان وففشورداعى فيرمالاردىڭ م.ددەسى ءۇشىن “دوليا” الدى” دەگەن ايىپ تاعىلعان.

ال، 2010 جىلدىڭ ناۋرىز ايىندا استانا قالاسىنىڭ سارىارقا اۋداندىق №2 سوتى “قارجىنى ىسىراپ قىلىپ، پارا الدى” دەگەن ايىپپەن جاكىشەۆتى 14 جىلعا باس بوستاندىعىنان ايىردى.

بۇل شەشىممەن كەلىسپەيتىن كەيبىر ساراپشىلار جاكىشەۆ ءىسىنىڭ ساياسي استارى بار دەپ سانايدى. ال، 2013 جىلدىڭ قازان ايىندا “قۇقىق قورعاۋشىلار اليانسى” مۇحتار ەركىنۇلىن ساياسي تۇتقىندار تىزىمىنە قوستى. وعان سوت بارىسىنداعى جاكىشەۆتىڭ قۇقىعىنىڭ ورەسكەل بۇزىلۋىنا قاتىستى دالەلدەر سەبەپ بولعان. سونىمەن قاتار، جاكىشەۆ 2018 ساياسي تۇتقىنداردىڭ جاڭارتىلعان تىزىمىنە دە ەنگەن.

ال، بۇگىنگى سوت وتىرىسىندا جاكىشەۆتى قولداۋعا كەلگەن قوعام بەلسەندىلەرى مەن ونىڭ جاقتاستارى “بيلىك جاكىشەۆتى بوساتۋى ءتيىس!” دەپ تالاپ قويدى. ولاردىڭ ايتۋىنشا، جاكىشەۆتىڭ دەنساۋلىعى ناشار جانە ونى قاماۋعا ەشقانداي نەگىز جوق.ودان بولەك، الەۋمەتتىك جەلى قولدانۋشىلارى دا ونىڭ بوستاندىققا شىعۋىن تالاپ ەتكەن بولاتىن.

الايدا، بۇگىن سەمەي قالالىق №2 سوتى مۇحتار ەركىنۇلى جاكىشەۆتىڭ ءوتىنىشىن قاناعاتتاندىرمادى.

Abai.kz