بۇگىن قىزىلوردا وبلىسى ارال اۋدانىندا رەسپۋبليكا بويىنشا ءوتىپ جاتقان #Birge #TazaQazaqstan ەكولوگيالىق اكتسياسى باستالدى. وبلىس اكىمى قۋانىشبەك ىسقاقوۆ اكتسياعا قاتىسىپ، قىزىلوردالىقتاردى شارانى وتكىزۋدە بەلسەندىلىك تانىتۋعا شاقىردى.

اكتسياعا اۋداننىڭ 150 جۋىق تابيعات پايدالانۋشىسى، تابيعاتتى قورعاۋ ۇيىمدارىنىڭ قىزمەتكەرلەرى، جەرگىلىكتى تۇرعىندار جانە جاستار قاتىستى.

"وزدەرىڭىز بىلەسىزدەر، ەلباسى سىر ءوڭىرىنىڭ دامۋىنا ەرەكشە كوڭىل ءبولدى. بۇعان دالەل - "سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ" (ساراتس) جوباسى. "عاسىر جوباسىنىڭ" ءبىرىنشى كەزەڭى اياسىندا " اقلاق" جانە "كوكارال" سۋ توسپالارى سالىنعان بولاتىن. سونىڭ ناتيجەسىندە ايماعىمىزدا بالىق شارۋاشىلىعى قارقىندى دامۋدا. بارشاڭىزدى قورشاعان ورتانى قورعاۋعا جانە تۋعان ولكەمىزدىڭ تازالىعىن ساقتاۋعا بەلسەندى قاتىسۋعا شاقىرامىن!",- دەدى ايماق باسشىسى.

ەستەرىڭىزگە سالا كەتەيىك، وتكەن اپتادا #Birge #TazaQazaqstan رەسپۋبليكالىق ەكولوگيالىق اكتسياسىن قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ باستاعان بولاتىن.

ءىس-شاراعا قازاقستان رەسپۋبليكاسىنىڭ پرەمەر-ءمينيسترى جانە ونىڭ ورىنباسارلارى، مينيسترلەر مەن دەپۋتاتتار مەن قالا تۇرعىندارى قاتىستى.  1200 استام تۇرعىن قوياندى سۋ قويماسىنىڭ اۋماعىن تازالاپ، بىرنەشە ساعات ىشىندە 10 تونناعا جۋىق قوقىس جينالدى.  ءارى قاراي ەستافەتا ايماقتارعا جولدانعان ەدى.

العاشقىلاردىڭ ءبىرى بولىپ قىزىلوردا وبلىسى اكتسياعا قولداۋ ءبىلدىردى. بۇگىن قىزىلوردا وبلىسىنىڭ ارال اۋدانىندا كوكارال بوگەتىنىڭ جانىنداعى اۋماق تازارتىلىپ، #Birge #TazaQazaqstan اكتسياسى جالعاسىن تابۋدا. وبلىس اكىمى قۋانىشبەك ىسقاقوۆ ەستافەتانى ايماقتىڭ بارلىق اۋداندارى مەن ەلدىمەكەندەرىنە جولدادى.

Abai.kz