"ادام قۇقىعىنىڭ نەگىزگى تۇرلەرى رەسەي كونستيتۋتسياسىندا جازىلعان جانە بۇل قۇقىقتار قورعالادى دەپ ويلايمىز" دەدى ەۋرووداقتىڭ سىرتقى ىستەر جانە قاۋىپسىزدىك ماسەلەلەرى بويىنشا جوعارعى وكىلدىگىنىڭ ءباسپاسوز حاتشىسى مايا كوسيانچيچ.

ول ەۋرووداقتىڭ الداعى سايلاۋدا رەسەي بيلىگى ەقىۇ جانە وزگە دە حالىقارالىق ۇيىمدار الدىندا العان مىندەتتەرىن ورىندايدى دەپ ۇمىتتەنەتىنىن جەتكىزگەن.

مۇنىڭ الدىندا Amnesty International قۇقىق قورعاۋ ۇيىمى دا ۇستالعانداردى بوساتىپ، كۇشتىك قۇرىلىم وكىلدەرىنىڭ ارەكەتتەرىن زەرتتەۋدى تالاپ ەتكەن ەدى.

27 شىلدەدە ماسكەۋدە قالالىق دۋما سايلاۋىنا قاتىسقىسى كەلگەن تاۋەلسىز كانديداتتاردى قولداۋ اكتسياسى ءوتتى. ءىىم دەرەگىنشە، وعان 3 500 ادام قاتىسقان. ال "وۆد-ينفو" قۇقىق قورعاۋ پورتالىنىڭ حابارلاۋىنشا، شەرۋگە ودان دا كوپ ادام قاتىسقان، 1 373 ادام ۇستالعان، ولاردىڭ 43-ءى - كامەلەتكەن تولماعاندار. ءىىم 1074 ادامنىڭ ۇستالعانىن ايتتى. اكتسيانى تاراتۋ كەزىندە پوليتسيا شەرۋشىلەردى اياماي ۇرىپ-سوعىپ، رەزەڭكە تاياق قولدانعان. ونداعان ادام جارالانعان.

تاۋەلسىز كانديداتتار الداعى ۋاقىتتا جاڭا شەرۋ وتكىزەتىنىن ايتىپ وتىر.

بۇعان دەيىن ونداعان وپپوزيتسيالىق جانە تاۋەلسىز كانديداتتار ساياسي سەبەپپەن وزدەرىن ماسكەۋ قالالىق دۋما سايلاۋىنا جىبەرمەي وتىرعانىنا شاعىمدانعان ەدى. ولاردىڭ باسىم بولىگىنىڭ ايتۋىنشا، سايلاۋ كوميسسياسى ولاردى قولدايتىن ازاماتتاردىڭ قولىن تىركەۋدەن باس تارتقان.​

Abai.kz