كەشە پرەزيدەنت قاسىم-جومارت توقاەۆ ءبىرلى-جارىم اۋىس-ءتۇيىس جاسادى. زەينەت جاسىنا جەتكەنى بار، اسقانى بار، ءتورت-بەس سەناتوردى قىزمەتىنەن الدى. ورنىنا ەسكى ءھام جاڭا سەناتورلاردى تاعايىندادى، بىلەسىزدەر.

اكىم بالا ءابدىراحىموۆ سەكىلدى "سەنىمنەن" جۇرداي بوپ كەتپەسە دە، سەناتورلىعىنىڭ سوڭى كورىنگەندەردىڭ ءبىرى - ءايتىموۆا دەيتىن ايدىك اجە ەدى.

تۇپ-تۋرا 66 جاستاعى بىرعانىم ءايتىموۆا پالەن جىل دەپۋتات بولىپ ءداۋ كرەسلودا وتىرعان. ەلشى بولىپ ەل ارالاعان. مينيستر بولىپ مىنبەردە سويلەگەن. ۇكىمەتباسىعا كومەكشى بولعان (ورىنباسارى). ەلشى دەيتىن ديپلوماتيالىق شەنى بار. اعىلشىن ءتىلىنىڭ "سۋپەر" مامانى. ساياسي قىزمەتتەرى ءۇشىن بىرنەشە وردەن-مەدالمەن ماراپاتتالعان. ءساندى كيىم كيىنگەندى جانى سۇيەتىن، كەيدە ارتىق قىلامىن دەپ تىرتىق قىلىپ السا دا تۇك بولماعانداي جۇرە بەرەتىن، ساياساتاعى "حايىپشىل" اپالاردىڭ ءبىرى.

ءايتىموۆانىڭ ايدىك سوزدەرىن، ءبىزدى قويىپ بوتەننىڭ ازىلكەشتەرى ءاتىرىن سەپكەندەي ادەمىلەپ ءاجۋالادى دا. قويشى، مىڭ ايتقاننان ءبىر كورگەن ارتىق:

ءسويتىپ، اقپاندا الپىستىڭ التاۋىنا كەلگەن ءايتىموۆا، كەشە عانا سەناتورلىقپەن قوشتاستى. قوشتاسىپ تۇرىپ، ءوزىنىڭ ساياسي كارەراسىنىڭ اياقتالعانىن ايتىپتى. Tengrinews.kz سايتى جاريالاعان بىرعانىم اپانىڭ ورىسشا سۇحباتىن قازاقشاعا قوتارىپ بەرگەندى ءجون كوردىك.

"مەن مۇنى دۇرىس قابىلدادىم. زاڭ بويىنشا سەنات دەپۋتاتتارى مەملەكەت باسشىسىنىڭ جارلىعىمەن تاعايىندالادى. ال ماندات مەرزىمى اياقتالعاندا ولاردىڭ وكىلەتتىكتەرى توقتايدى. مۇنىڭ بارلىعى زاڭ جۇزىندە بولدى. مەن ەلباسىعا، پرەزيدەنتكە، داريعا نازارباەۆاعا مەنىڭ ساياسي كارەرامنىڭ بارلىق كەزەڭىندە ماعان مۇمكىندىك بەرگەنى ءۇشىن العىسىمدى ايتامىن", دەيدى ەندىگى ەكس-سەناتور.

ۇزاق جىلدان بەرى ساياسي قىزمەتتە بولعان بىرعانىم سارىقىزى ەندى وسىمەن ساياسات دەگەندى قويىپ، بينەزپەن اينالىسپاق كورىنەدى. ءوزى سولاي دەپتى.

ء"تىپتى، ومىرىمدە العاش رەت ءوزىمنىڭ تاڭداۋ قۇقىعىم بار دەسەم دە بولادى. قازىر ناقتى قانداي باعىتتا قىزمەت جاسايتىنىمدى كەسىپ ايتا المايمىن. بىراق، قول قۋسىرىپ قاراپ وتىرمايمىن. ءوزىمنىڭ جانىما جاعاتىن، قولىمنان كەلەتىن ءبىر ىسپەن اينالىسامىن.

مەنىڭ مەملەكەتتىك، ساياسي، ديپلوماتيالىق قىزمەتتەردە ۇلكەن تاجىربيەم بار. ەندى ءوزىمدى جاڭا ءبىر باعىتتا سىناپ كورگىم كەلەدى.

مەن ەشقاشان بيزنەسپەن، سەرۆيستىك، كونسالتينگتىك قىزمەتتەرمەن اينالىسپاعانمىن. ناقتى قاي باعىتتى تاڭدايمىن، ازىرگە ايتا المايمىن. جاھاندىق كوممۋنيكاتسيالاردىڭ مۇمكىندىگىن پايدالانىپ كورگىم كەلەدى", دەيدى بىرعانىم ءايتىموۆا.

ء"يا، مۇڭ بار. مەنىڭ سالماقتى ساياسي كارەرام اياقتالعانداي سەزىمدەمىن. سونداي ءبىر اسەردەمىن. بىراق، سوڭعى جىلدار شەنىندە مەن وسىعان دايىن بولدىم. نەشەمە جىل ءار ءتۇرلى سالادا قىزمەت جاساپ، سەناتقا قايتا كەلدىم. مەن 1996 جىلى سايلانعان ەڭ العاشقى سەناتورلاردىڭ ءبىرى بولدىم عوي. بۇل مەن ءۇشىن ۇلكەن ابىروي. مەن ءوزىمنىڭ بار ءبىلىمىمدى، تاجىربيەمدى، شەتەلدەن جيناعان تاجىربيەمدى زاڭ شىعارۋ ىسىنە پايدالاندىم", دەپ تۇيىندەپتى ەكس-سەناتور.

ەستەرىڭىزگە سالا كەتەيىك، بىرعانىم ءايتىموۆا 2013 جىلى سەنات دەپۋتاتى بولىپ قايتا تاعايىندالعان. ال كەشە پرەزيدەنت قاسىم-جومارت توقاەۆ ونىڭ وكىلەتتىگىن توقتاتۋ تۋرالى شەشىم شىعاردى. پرەزيدەنت بۇل تۋرالى ءوزىنىڭ "تۆيتتەر" جەلىسىندەگى پاراقشاسىندا جازدى.

ايتپاقشى، بۇرىنعى پرەزيدەنت نۇرسۇلتان نازارباەۆ بيىل ماۋسىمدا قازاقستاننىڭ "قۇرمەتتى سەناتورى" اتانعان ەدى. سول جيىندا ءسوز العان ەكس-پرەزيدەنت نازارباەۆ ەندىگى ەكس-سەناتور ءايتىموۆا تۋرالى دا ايتقان ەدى.

"بۇگىن ءار ءتۇرلى وقيعالاردى ەسىمە الىپ وتىرمىن. 20 ماۋسىمدا مەنىڭ مەملەكەت باسشىسى بولعانعانىما تۇپ-تۋرا 30 جىل تولادى. بۇل ەرەكشە داتا. ءدال سول كۇننەن باستاپ، سول ساتتەن باستاپ ءبىز بىرعانىم سارىقىزىمەن تانىسپىز. جاپ-جاس قىز ەدى. 1990 جىل، ەستەرىڭىزدە مە...سودان بەرى بىرعانىم جانىمدى جۇمىس جاساپ كەلەدى. مەن تاعايىنداعان ءتۇرلى قىزمەتتەردى اتقاردى. سونىڭ ىشىندە ديپلوماتيالىق قىزمەتتەردە ايتارلىقتاي جەتىستىكتەرگە جەتتى. مەن سىزدەرمەن بىرگە جۇمىس جاساعانىما رازىمىن، ءالى دە بىرگە جۇمىس جاساي بەرەمىز", دەگەن ەدى نۇرسۇلتان نازارباەۆ.

Abai.kz