ۇيگە كەلگەسىن قۇربان شالىپ، قازانعا سالعاسىن، ۇيدەگى بارلىق ادام ايت داستارحانىنىڭ باسىنا جينالاتىنبىز، اكەمىز نەمەسە داستارحان باسىنداعى ەڭ ۇلكەنىمىز قۇران وقىپ، سوسىن بارىپ ايت داستارحانىنان اسىقپاي وتىرىپ ءشاي ىشەتىنبىز. بۇل كەزگە دەيىن ساعات 11-گە جاقىندايدى. سودان بالالار 5-6-دان بىرىگىپ، ۇلكەندەر 2-3-تەن بىرىگىپ، اۋىلدىڭ ءبىر شەتىنەن باستاپ ايتتايمىز. ەكى كۇندە تۋىس-تۋعان، ناعاشىدان ەش ءۇي قالماۋ كەرەك. بالالارعا كەي ءۇي ەسىكتەن ءتاتتى ءدامدى بەرىپ، جولعا سالادى. كەي ءۇي داستارحان باسىنا وتىرعىزىپ ءشاي، ەت بەرەدى. ءشاي بەرگەن ءۇيدى ماقتاپ، قۋانا جالعاستىرامىز.

ەندى ءبىز وسكەن اۋىلدا مىڭنان استام ءتۇتىن تۇراتىن ۇلكەن اۋىلدار عوي، سونىڭ ەكى كۇندە كەمى 200-گە جۋىعىن تۇگەندەيمىز، جاڭا كيىم قارا كيىم بولادى.

"ۇياتسىزعا ءۇش كۇن ايت" دەپ، كوبىندە ءۇشىنشى كۇنى ايتتامايمىز، ءۇشىنشى كۇنى كوبىندە اۋىلدا تەك ايەلدەر ايتتايدى. ايتتا تۋىستاردىڭ ۇيىنە بارماي قالساڭ كادىمگىدەي رەنجيدى. ارالاپ شىعۋ پارىز ەدى.

ءۇش كۇن كادىمگىدەي مەرەكە، كوشە تولى ادام، داستارحان تولى ءدام. قۇرباندىققا سويىلعان قويدىڭ ەتىنەن ءۇش كۇندە ەشتەڭە قالمايدى. ءبارى قازانعا سالىنىپ اسىلادى، ءۇش كۇن ايتتاپ كەلگەندەرگە تاباققا تارتىلادى. ءتىپتى، سوڭىنا جەتپەي جاتاتىن، ىسىراپ بولعان ەت كورمەيتىنبىز. ايتتا ەشكىم "ايتتاڭىز" دەپ شاقىرمايدى، كەز كەلگەن ۇيگە ايتتاپ كىرە بەرەسىز، ايت داستارحانىن دايىنداماۋى مۇمكىن ەمەس-ءتى.

قازىر سونداي ءداستۇر ول جاقتا دا قالدى ما، جوق پا، كىم ءبىلسىن؟!

قالاعا كەلگەلى "ايتتاڭىز" دەپ شاقىراتىن بولدى، شاقىرماعان ۇيگە بارۋعا بولمايدى. سەبەبى ايت داستارحانىن جاسامايدى، ءتىپتى ايت مەرەكەسى تۋرالى تۇسىنىك باسقاشا. ايتتا مەرەكەلىك داستارحان، كوڭىل مەرەكەلىك كۇي بولمايدى. قۇربان شالۋعا دا بۇرىنعى كوزقاراستان باسقا كوزقاراس، كەيبىرىن مۇلدە قابىلداي المايسىڭ.

بۇگىن قۇربان ايت مەرەكەسىنە بايلانىستى ەسكە ءتۇسىپ جاتقان جاعدايلار عوي. قۇربان ايتتارىڭىز قۇتتى بولسىن! دۇعا تىلەكتەرىڭىز قابىل بولسىن!