«قازمۇنايگاز» ۇلتتىق كومپانياسىنىڭ جاۋاپكەرشىلىگى اياسىنداعى «سارىارقا» گاز قۇبىرىنىڭ 796,6 شاقىرىمى تارتىلدى. بۇل ايتۋلى جوبانىڭ جەلىلىك بولىگى قۇرىلىسىنىڭ 75%-ن قۇرايدى.

«سارىارقا» ەلدىڭ ەنەرگەتيكالىق قاۋىپسىزدىگى دەڭگەيىن ارتتىرۋعا، ورتالىق جانە سولتۇستىك ايماقتاردى كوگىلدىر وتىنمەن ۇزدىكسىز قامتي وتىرىپ، ەكولوگيالىق احۋالدى جاقسارتۋعا ءتيىس. بولاشاقتا جەكە-مەنشىك جانە شاعىن كوممۋنالدىق قازاندىقتاردى، جەر ۇيلەر مەن تۇرعىن ۇيلەردى، جىلۋ-ەلەكتر ورتالىقتارىن بىرتىندەپ گازعا اۋىستىرۋ جوسپارلانۋدا.

«قازمۇنايگاز» جاۋاپكەرشىلىگى شەڭبەرىندەگى قۇبىردىڭ جەلىلىك بولىگىن سالۋ جۇمىستارىن ۇستىمىزدەگى جىلدىڭ سوڭىنا دەيىن اياقتاۋ جوسپارلانىپ وتىر. سودان كەيىن جەرگىلىكتى اكىمدىكتەر ەلدى مەكەندەردى، سونىڭ ىشىندە ەلوردانى گازبەن قامتاماسىز ەتۋ جۇمىستارىنا كىرىسپەك.

بۇگىندە قىزىلوردا وبلىسىندا دانەكەرلەۋ-ءپىسىرۋ جۇمىستارى تولىقتاي اياقتالىپ، قاراعاندى جانە اقمولا وبلىستارىندا قارقىندى ءجۇرىپ جاتىر. جوبانى ىسكە اسىرۋ بارىسىندا دانەكەرلەۋ-ءپىسىرۋدىڭ ەڭ وزىق تەحنولوگيالارى قولدانىلۋدا. وزىق تەحنولوگيالار ديامەترى 820 مم قۇبىردى تاۋلىگىنە 6 شاقىرىمنان اسا جىلدامدىقپەن تارتۋعا مۇمكىندىك بەرەدى.

قازىرگى كەزدە دانەكەرلەۋ-ءپىسىرۋ كەشەندەرى:

- قاراعاندى وبلىسىندا گاز قۇبىرى جولىنىڭ 794-ءشى شاقىرىمىندا («قاراعاندى» اۆتوماتتى گاز تاراتۋ ستانتسياسىنا بۇرۋ جۇيەسىن ورناتۋ جەرىنە دەيىن 14 شاقىرىم) جانە 844 شاقىرىمىندا («قاراعاندى» بۇرۋ جۇيەسىن ورناتۋ جەرىنەن كەيىن 36 شاقىرىم);

- اقمولا وبلىسىندا گاز قۇبىرى جولىنىڭ 970-ءشى شاقىرىمىندا (قاراعاندى جانە اقمولا وبلىستارىنىڭ شەكاراسىنان سولتۇستىككە قاراي 27 شاقىرىم) جانە 1056-شى شاقىرىمىندا («استانا-1» اۆتوماتتى گاز تاراتۋ ستانتسياسىنا بۇرۋ جۇيەسىن ورناتۋ جەرىنە دەيىن 5 شاقىرىم) جۇمىس ىستەۋدە.

ماگيسترالدى گاز قۇبىرىنىڭ قۇرىلىس جۇمىستارىنا 2 مىڭنان استام ادام جانە 800 بىرلىك تەحنيكا جۇمىلدىرىلعان. جىلجىمالى ۆاحتالىق كەنتتەر جۇمىستى تاۋلىك بويى جۇرگىزۋ ءۇشىن قاجەتتى جابدىقتارمەن جابدىقتالدى. قىزمەتكەرلەر تىرشىلىگى ءۇشىن بارىنشا قولايلى جاعداي جاسالعان. وپەراتسيالىق قىزمەتتى اكتسيونەرلەرى «سامۇرىق-قازىنا» ۇاق» اق مەن «بايتەرەك» ۇبح» اق بولىپ تابىلاتىن «استاناگاز قمگ» اق جۇزەگە اسىرادى. قۇرىلىستىڭ باس مەردىگەرى بولىپ «قازقۇرىلىسسەرۆيس» مگقك» اق ايقىندالعان.

Abai.kz