مەگاپوليس اتانعان شىمكەنتتە ءبىراز ۋاقىت بۇرىن مۋنيتسيپالدى اۆتوبۋس پاركى اشىلعان بولاتىن. ۇزاق جىلدار بويى تۇرعىنداردى مازالاپ كەلگەن قوعامدىق كولىك ماسەلەسىن وسىلاي وڭ شەشىمىن تابا باستاعان ەدى.

قازىرگى اكىمدىك وكىلدەرى قالا اۆتوپاركىندەگى اۆتوبۋستار قاجەتتىلىكتى تولىق قامتاماسىز ەتەدى دەپ وتىر.

الايدا، شىمكەنت قالاسىنا قوسىلعان ەلدىمەكەندەردە اۆتوبۋس ماسەلەسى ءالى تولىق شەشىم تاپپاعان.

ءابدىراحىموۆتىڭ تۇسىندا  قالاعا قازاقستاندا قۇراستىرىلعان 300 جاڭا اۆتوبۋس جەتكىزىلگەن بولاتىن. سالقىنداتقىشتارمەن، پاندۋستارمەن، بەينەكامەرالارمەن، جولاۋشىلار اعىنىنىڭ داتچيكتەرىمەن، GPS-ترەكەرلەرمەن جابدىقتالعان جاڭا كولىكتەر شاھاردىڭ ورتالىق كوشەلەرىندەگى ەسكى اۆتوبۋستاردىڭ ورنىن اۋىستىرۋدان ارى اسقان جوق.

قالاعا قاراستى كوكبۇلاق، يگىلىك شاعىناۋدانى تۇرعىندارى قوعامدىق كولىك جىرىن كوپتەن ايتىپ كەلەدى. كوكبۇلاق شاعىناۋدانىنىڭ تۇرعىنى ءبيبىسارا بالاشوۆانىڭ ايتۋىنشا، 5 جىلدان بەرى ەلدىمەكەننەن قالاعا قاتىناۋ مۇڭ بولعان. شاعىن اۆتوبۋسقا سىيماي قالىپ قويعاندار تاكسيمەن قاتىنايدى ەكەن. ەندى مىنە، جاڭا اۆتوبۋس ءجۇرىپ، ماسەلەلەرى وڭدى شەشىلىپتى.

ال، قالا تۇرعىنى مەيرامگۇل ناسىروۆا جاڭاتالاپ اۋىلى ارقىلى ءجۇرىپ وتەتىن بۇل اۆتوبۋسقا قالا ىشىنەن مىنەتىن جولاۋشىلار كوپ ەكەندىگىن العا تارتادى. ولار وسى اۋىلعا دا باسقا باعىتتاعى اۆتوبۋس قاتىناسا، ايالدامالار ورناتىلسا دەپ وتىر.

بۇگىندە قالا ىرگەسىنە قاتىنايتىن اۆتوبۋستىڭ جيىلىگى 5-10 مينۋت ارالىعىندا. ازىرگە ون شاقتىسى قاتىناۋدا.

وسى رەتتە مەگاپوليس مارتەبەسى بەرىلگەن شىمكەنت قالالىق ءماسليحاتى قالا تۇرعىندارىنىڭ قوعامدىق كولىكتەن قيىندىق كورىپ وتىرعانىن بىلە مە، بىلمەي مە دەگەن زاڭدى ساۋال تۋادى. ءار اۋداننان سايلانعان دەپۋتاتتار ءوز اۋدانىندا تۇراتىن تۇرعىنداردىڭ مۇڭ-مۇقتاجىن جەرگىلىكتى بيلىكتىڭ نازارىنا ۇسىنىپ وتىرۋ ءتيىس. الايدا، شىمكەنت قالالىق ءماسليحات دەپۋتاتتارى قوعامدىق كولىك ماسەلەسى كورمەي وتىرعان سىڭايلى.