وزبەكستان باس پروكۋراتۋراسى 19 تامىزدا تاراتقان اقپاراتتا كاريموۆا ەكى تسەمەنت زاۋىتىنداعى مەملەكەتتىڭ ۇلەسىن "نەگىزگى قۇنىنان ارزانعا" زاڭسىز ساتىپ العان جانە كەيىن شەتەلدىك كاسىپكەرلەرگە ساتقان دەگەن كۇدىككە ىلىنگەن. پروكۋراتۋرانىڭ مالىمەتىنشە، كۇدىكتى ساتىپ الۋشىلاردىڭ "كەيىنگى زاڭسىز ءىس-ارەكەتىن قورعاشتاپ، مەملەكەتكە اسا ءىرى كولەمدە زيان كەلتىرگەن".
بۇعان قوسا باس پروكۋراتۋرا كاريموۆا "ازاماتتار مەن ءتۇرلى كومپانيالاردىڭ يەلەرىن كۇش كورسەتەمىن دەپ قورقىتىپ، ولاردىڭ مۇلكىن وزىنە تيەسىلى كومپانيالارعا اۋدارۋعا ماجبۇرلەگەن" دەپ حابارلادى.
ازاتتىق حابارلاسقان كاريموۆانىڭ ادۆوكاتى گرەگۋار مانجا كليەنتىنە قارسى تاعىلعان جاڭا ايىپتارعا بايلانىستى پىكىر بىلدىرۋدەن باس تارتتى.
بيىل ناۋرىزدا وزبەكستان بيلىگى ۇيقاماقتا وتىرعان 47 جاستاعى گۇلنارا كاريموۆانى "جازا وتەۋ شارتى مەن ءتارتىبىن قاساقانا بۇزعانى ءۇشىن" تۇرمەگە قاماعان. 2017 جىلى جەلتوقساندا وزبەكستان سوتى گۇلنارا كاريموۆانى 10 جىلعا باس بوستاندىعىنان ايىرعان. 2018 جىلى شىلدە ايىندا سوت كاريموۆانىڭ جازاسىن جەڭىلدەتىپ، بەس جىلعا باس بوستاندىعىن شەكتەۋ جازاسىنا اۋىستىرعان.
وزبەكستان بيلىگى كاريموۆانىڭ شەتەلدەگى جالپى قۇنى ءبىر جارىم ميلليارد دوللاردان استام مۇلكىن مەملەكەت يەلىگىنە قايتارعىسى كەلەدى. شىلدە ايىندا ادۆوكات مانجا شۆەيتساريا بيلىگى كاريموۆانىڭ ءىسى بويىنشا تاركىلەنگەن 555 ميلليون دوللاردى وزبەكستانعا قايتارۋدى توقتاتىپ قويعانىن حابارلاعان. زاڭگەردىڭ مالىمدەۋىنشە، مۇنداي شەشىمگە كاريموۆانىڭ قۇقىعى بۇزىلعانى جانە وعان دەر كەزىندە مەديتسينالىق كومەك كورسەتىلمەگەنى تۋرالى حابارلار نەگىز بولعان.
ماۋسىم ايىندا گۇلنارا كاريموۆانىڭ قىزى يمان قاماۋدا وتىرعان اناسىنىڭ دەنساۋلىق جاعدايى ناشارلاپ كەتكەنى تۋرالى مالىمدەمە تاراتقان.
ءبىر كەزدەرى وزبەكستانداعى ىقپالدى تۇلعالارىنىڭ ءبىرى سانالعان جانە كاسىپكەر ءارى ءانشى رەتىندە دە تانىلعان گۇلنارا كاريموۆا 2014 جىلى پرەزيدەنت اكەسىنىڭ قىرىنا ىلىنگەن سوڭ كوپشىلىككە كورىنبەي كەتكەن. يسلام كاريموۆ وزبەكستاندى 1989 جىلدان باستاپ 2016 جىلى قايتىس بولعانعا دەيىن باسقارعان.
Abai.kz
