نارتاي بەكەجانوۆ اتىنداعى قىزىلوردا وبلىستىق مۋزىكالىق-دراما تەاترىندا كونستيتۋتسيا كۇنىنە ارنالعان القا-قوتان جيىن ءوتتى.  وعان وبلىس اكىمى قۋانىشبەك ىسقاقوۆ كەلىپ قاتىسىپ، قۇتتىقتاۋ ءسوز سويلەدى. 

"كونستيتۋتسيانىڭ وزەكتى ەرەجەلەرىنە سۇيەنە وتىرىپ، قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىشۇلى نازارباەۆتىڭ سىندارلى ساياساتىمەن ەل تاعدىرى ءۇشىن ومىرلىك ماڭىزى بار جاڭارۋلار جۇرگىزىلدى.

بۇگىنگى كۇنى مەملەكەت باسشىسى قاسىم-جومارت كەمەلۇلى توقاەۆتىڭ باستاماسىمەن تاۋەلسىز ەلىمىز جاڭاشا قادامعا جول اشىپ كەلەدى.

اتا زاڭنىڭ اياسىندا حالىقتىڭ ءال-اۋقاتىن ارتتىرۋعا قارقىندى جۇمىستار قولعا الىندى. تۇرمىسى تومەن، الەۋمەتتىك جاعىنان از قامتىلعان ازاماتتار مەن وتباسىلار ءۇشىن اتاۋلى الەۋمەتتىك كومەكتەر بەرىلىپ، تۇرعىن ۇيلەرمەن قامتاماسىز ەتىلۋدە. جوعارى جانە كاسىبي ورتا ءبىلىم الام دەگەن جاستارىمىز ءۇشىن جول اشىلىپ، گرانتتاردىڭ ءتۇرى كوبەيۋدە. ۇستازداردىڭ ەڭبەكاقىسى كەزەڭ-كەزەڭىمەن ءتورت جىل ىشىندە ەكى ەسە وسەدى.

ءبىر سوزبەن ايتقاندا، كونستيتۋتسيا تاۋەلسىزدىگىمىزدىڭ كەپىلى رەتىندە بىرلىگىمىزدى بەكەمدەپ، ەكونوميكامىزدى نىعايتۋدا، الەۋمەتتىڭ الەۋەتىن ارتتىرۋدا بەرىك تۇتقاعا اينالدى", - دەدى ايماق باسشىسى.

ال اتالمىش ءىس-شارا مەرەكەلىك كونتسەرتپەن جالعاستى.

Abai.kz