مەملەكەت باسشىسى اسقار ءماميندى قابىلدادى
مەملەكەت باسشىسى قاسىم-جومارت توقاەۆ پرەمەر-مينيستر اسقار ءماميندى قابىلدادى.
قازاقستان پرەزيدەنتى قاسىم-جومارت توقاەۆ 2 قىركۇيەكتەگى قازاقستان حالقىنا جولداۋىن جۇزەگە اسىرۋ بويىنشا پرەمەر-مينيستر اسقار ءماميننىڭ جالپىۇلتتىق ءىس-قيمىل جوسپارىن ازىرلەۋ تۋرالى اقپاراتىن تىڭدادى.
مەملەكەت باسشىسى ەلىمىز ساياسي جانە الەۋمەتتىك-ەكونوميكالىق رەفورمالاردىڭ جاڭا كەزەڭىنە اياق باسقانىن اتاپ ءوتتى. ونىڭ ايتۋىنشا، اتالعان ۋادەلەردى ورىنداۋ ورتالىق پەن وڭىرلەردە، بىرقاتار زاڭ جوبالارى مەن باسقا دا نورماتيۆتىك-قۇقىقتىق اكتىلەردى ازىرلەۋدى قوسا العاندا ماڭىزدى ءارى ۇيلەسىمدى جۇمىستى تالاپ ەتەدى.
«جولداۋدىڭ ۋاقىتىلى جانە ساپالى جۇزەگە اسىرىلۋى عانا ازاماتتاردىڭ ءومىر ءسۇرۋ دەڭگەيىن ارتتىرىپ، ەكونوميكانىڭ قۇرىلىمدىق جاڭعىرۋىن قامتاماسىز ەتەدى. جولداۋدا قويىلعان مىندەتتەر بەلگىلەنگەن مەرزىمدە مۇلتىكسىز ورىندالۋى ءتيىس. ۇكىمەت جالپىۇلتتىق ءىس-قيمىل جوسپارىن ازىرلەۋ جونىندەگى جۇمىستى باستاعانى دۇرىس بولدى. ارقانى كەڭگە سالاتىن ۋاقىت جوق. بارلىق مينيسترلىكتەر مەن ۆەدومستۆولاردىڭ، اكىمدىكتەردىڭ باسشىلارى رەفورمالاردى ءتيىمدى جانە ۋاقتىلى جۇزەگە اسىرۋعا وزدەرى جاۋاپتى بولادى»، – دەدى قاسىم-جومارت توقاەۆ.
Abai.kz
