زەينەتاقى قورى ۇلتتىق باسقارۋشى حولدينگىنە ەگىس ناۋقانىنا استىق ساتىپ الۋعا 8,3 ميلليارد تەڭگە (21 ميلليون دوللاردان استام) بولگەن. بۇل تۋرالى 3 قىركۇيەكتە ۇكىمەتتە وتكەن ءباسپاسوز جيىنىندا "قازاگرو" قۇرامىنداعى "ازىق-تۇلىك كەلىسىمشارت كورپوراتسياسى" ۇلتتىق كومپانياسىنىڭ توراعاسى رينات اقبەردين حابارلادى.
- بجزق 200 مىڭ توننا استىق ساتىپ الۋعا قارجى بولگەن. بۇل قارجى جۇمسالىپ، استىق ساتىلدى، قازىر وسى اقشانى استىق ساتىپ الۋعا تاعى پايدالانامىز. "قازاگرو" بۇعان 10 پايىزعا جۋىق (اقشا) تولەيدى دەپ ويلايمىن، - دەگەن قازاقستان اۋىل شارۋاشىلىعى ءمينيسترى ساپارحان وماروۆ.
"قازاگرو" بۇعان دەيىن دە، 2018 جىلعى قاراشادا بجزق قارجىسىن پايدالانعان. ول كەزدە زەينەتاقى قورى ۇلتتىق باسقارۋشى حولدينگىنە بولگەن 450 ميلليارد تەڭگە (1,2 ميلليارد دوللاردان كوپ) اقشاعا وبليگاتسيا ساتىپ الىنعان. زەينەتاقى قورىنىڭ قارجىسى 10 پايىزدىق مولشەرلەمەمەن 15 جىلعا قارىزعا بەرىلگەن. ۇلتتىق بانك "بۇل ينۆەستيتسيا زەينەتاقى سالىمشىلارىنا جىل سايىن ەداۋىر ينۆەستيتسيالىق تابىس اكەلەدى" دەپ مالىمدەگەن.
بيىل شىلدەدە قازاقستان پرەزيدەنتى قاسىم-جومارت توقاەۆ "قازاگرو" جوبالارىنىڭ اۋقىمدى بولىگى (40 پايىزعا جۋىعى) جۇمىس ىستەمەيتىندىگىن سىناپ، 2018 جىلدىڭ قورىتىندىسى بويىنشا "قازاگرو" كومپانياسىنىڭ شىعىنى 120 ميلليارد تەڭگەدەن (308 ميلليون دوللار) اسىپ كەتتى دەپ مالىمدەگەن.
2006 جىلى قۇرىلعان "قازاگرو" حولدينگى - قارجى مينيسترلىگىنىڭ مەملەكەتتىك مۇلىك پەن جەكەشەلەندىرۋ كوميتەتىنە قارايتىن، تولىقتاي مەملەكەتكە تيەسىلى كومپانيا. 13 جىلدىڭ ىشىندە حولدينگ بىرنەشە رەت داۋعا قالعان. ءار جىلدارى ۇلتتىق كومپانيانىڭ جوعارى لاۋازىمدى قىزمەتكەرلەرى جەمقورلىق، اقشا جىمقىرۋ ايىبىمەن سوتتالدى.
قازاقستان زاڭى بويىنشا، جۇمىس ىستەيتىن ازاماتتار اي سايىن تابىسىنىڭ 10 پايىزىن بجزق-عا اۋدارىپ وتىرۋعا مىندەتتى. 2019 جىلعى تامىزداعى ەسەپ بويىنشا، زەينەتاقى قورىنىڭ اكتيۆتەرى 10 تريلليون تەڭگەنى قۇراعان. قور جۇمىسىن سىناپ جۇرگەن كەي ساراپشىلار قازاقستاندىقتاردىڭ زەينەتاقى سالىمدارى دەفولتقا شاق قالعان ەميتەنتتەردىڭ وبليگاتسيالارىن ساتىپ الۋعا جانە بيۋدجەت تاپشىلىعىن قارجىلاندىرۋعا جۇمسالىپ، ءتيىمسىز پايدالانىلىپ كەلەدى دەيدى. بجزق اكتيۆتەرىن باسقاراتىن ۇلتتىق بانك مۇنداي سىنمەن كەلىسپەيدى.
Abai.kz
