«Nur Otan» پارتياسى، «Qazaqstan» رترك جانە «ايتىس اقىندارى مەن جىرشى، تەرمەشىلەردىڭ حالىقارالىق وداعى» رەسپۋبليكالىق قوعامدىق بىرلەستىگى ءوزارا ىنتىماقتاستىق تۋرالى مەموراندۋمعا قول قويدى. ۇشجاقتى كەلىسىمگە سايكەس، جىل سوڭىنا دەيىن «Nur Otan» پارتياسىنىڭ قولداۋىمەن ەلىمىزدىڭ بىرنەشە ايماعىندا وتەتىن بارلىق ايتىستى «Qazaqstan» تەلەارناسىنا اقپاراتتىق سۇيەمەلدەۋگە، ياعني، ءسوز الامانىن تۇسىرۋگە جانە ەفيرگە شىعارۋعا قۇقىق بەرەدى.

پارتيا توراعاسىنىڭ ءبىرىنشى ورىنباسارى باۋىرجان بايبەك بۇعان دەيىن ءوزىنىڭ Instagram پاراقشاسىندا «Nur Otan» پارتياسىنىڭ دوكتريناسىندا قازاق ءتىلىن، مادەنيەتى مەن سالت-ءداستۇرىن دامىتۋ قوعامدىق بىرلەستىكتىڭ ستراتەگيالىق باسىم باعىتتارىنىڭ ءبىرى ەكەنى تۋرالى ايتقان-دى. وسى ورايدا، «Nur Otan» دارىندى شىعارماشىل جاستاردى قولداي وتىرىپ، ءتول ونەرىمىز بەن ۇلتتىق سپورت تۇرلەرىنە ۇدايى قامقورلىق جاساپ كەلەدى.

«تاۋەلسىزدىكتىڭ العاشقى ساتىنەن-اق ەلباسى ۇلتىمىزدىڭ ۇلى مۇراسىن، وزىق داستۇرلەرى مەن مادەني قازىنانسىن تۇگەندەۋگە، ولاردى زامانعا ساي تۇلەتىپ، جاڭعىرتۋعا ەرەكشە دەن قويدى. حالىق ونەرىنىڭ وركەندەۋىنە جاعداي جاساپ، دارىندى جاندارعا جول اشتى. ەلباسىنىڭ تىكەلەي باستاماسىمەن ىسكە اسىرىلعان «مادەني مۇرا» جوباسىندا، «بولاشاققا باعدار: رۋحاني جاڭعىرۋ»، «ۇلى دالانىڭ جەتى قىرى» باعدارلامالىق ماقالالارىندا دا ۇلتتىق رۋحاني مۇرامىزدى، قۇندى جادىگەرلەرىمىزدى، سپورتتىق ويىندارىمىز بەن ونەر سايىستارىن تۇگەندەپ، دامىتۋعا ەرەكشە ءمان بەرىلگەن. ەجەلدەن «باس كەسپەك بولسا دا، ءتىل كەسپەك جوق» دەپ، حان الدىندا دات ايتىپ، ەركىن ويعا ەرىك بەرگەن، بارشاعا بىردەي تەڭدىك بەرگەن ەلمىز. سوندىقتان ۇلتىمىزدىڭ وسىنداي وزىق ونەرىن، ىزگى داستۇرلەرىن جالعاستىرۋ ءبىزدى كەمەلدەندىرە تۇسەدى. وسىعان وراي، پارتيا توراعاسىنىڭ باستاماسىمەن قايتا جاڭعىرۋعا كىرىسىپ، ەكىنشى تىنىسى اشىلىپ وتىرعان ساياسي ۇيىمىمىز ايتىسقا ايرىقشا نازار اۋدارىپ وتىر» - دەپ جازدى باۋىرجان بايبەك.

سونىمەن، 12-13 قىركۇيەكتە اتىراۋ قالاسىندا فاريزا وڭعارسىنوۆانى ەسكە الۋعا ارنالعان «جىر جۇلدىزى – فاريزا» اتتى رەسپۋبليكالىق ايتىس وتەدى. ايتىس دەسە ارقاسى قوزاتىن كوپشىلىك الدىندا اسپانبەك شۇعاتاەۆ، ەركەبۇلان قاينازاروۆ سياقتى باسقا دا بەلگىلى ايتىسكەرلەر ونەر كورسەتەدى.

18-19 قىركۇيەكتە قاراعاندىدا ساكەن سەيفۋلليننىڭ 125 جىلدىعىنا ارنالعان حالىقارالىق ايتىس بولادى. بۇل الامانعا جەرگىلىكتى ايتىسكەرلەردەن بولەك قىرعىزستان، قىتاي جانە موڭعوليا ەلدەرىنەن كەلگەن سۋىرىپ سالما ءسوز مايتالماندارى قاتىسادى.

30 قىركۇيەكتە الماتىدا «وتان وتباسىنان باستالادى» اتتى وتباسىلىق ايتىس، ال 19 قازاندا نۇر-سۇلتان قالاسىندا «بەرەكە بىرلىگىڭدە، ەلىم» دەگەن اتپەن تاعى ءبىر الامان وتپەك.

بيىل وتەتىن ءسوز بايگەلەرىن ورال قالاسىندا 7-8 جەلتوقساندا وتەتىن «التىن دومبىرا» رەسپۋبليكالىق فەستيۆالى تۇيىندەيدى.

Abai.kz