تاراز قالاسىنداعى "دوستىق" دەيتىن الاڭعا نۇرسۇلتان نازارباەۆتىڭ ەسىمى بەرىلدى. بۇل تۋرالى "Tengrinews.kz" سايتى حابارلادى. 

وسىنداي قاۋلى "ادىلەت" نورماتيۆتىك قۇقىقتىق اكتىلەرىنىڭ اقپاراتتىق-قۇقىقتىق جۇيەسىنىڭ پورتالىندا جاريالاندى.

ماتىندە ءتيىستى اۋماق حالقىنىڭ پىكىرىن ەسكەرە وتىرىپ جانە 2019 جىلعى 24 مامىرداعى قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ قورىتىندىسى نەگىزىندە جامبىل وبلىسىنىڭ اكىمدىگى قاۋلى ەتىپ جانە جامبىل وبلىستىق ءماسليحاتى تاراز قالاسىنىڭ "دوستىق" الاڭىن "نۇرسۇلتان نازارباەۆ" الاڭى دەپ قايتا اتاۋ شەشىمىن قابىلداعانى ايتىلادى.

"وسى نورماتيۆتىك قۇقىقتىق اكتى ادىلەت ورگاندارىندا مەملەكەتتىك تىركەلگەن كۇننەن باستاپ كۇشىنە ەنەدى جانە ونىڭ العاشقى رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى", - دەلىنگەن قۇجاتتا.

Abai.kz