قر پرەمەر-ءمينيسترىنىڭ ورىنباسارى بەردىبەك ساپارباەۆ مىندەتتى الەۋمەتتىك مەديتسينالىق ساقتاندىرۋدى ەنگىزۋ مەرزىمى وزگەرتىلمەيتىنىن جانە جىل سوڭىنا دەيىن بارلىق وڭىرلەر بۇعان دايىن بولۋى تىيستىگىن تاپسىردى. بۇل تۋرالى ول قاراعاندى وبلىسىندا وتكەن كەڭەس بارىسىندا ايتتى.

وبلىس اكىمدىگىنىڭ ءباسپاسوز قىزمەتىنەن ءمالىم ەتكەندەي، قاراعاندىدا ۆيتسە-پرەمەر بىرقاتار مەديتسينالىق نىسانداردى ارالاپ، دەنساۋلىق ساقتاۋ ءمينيسترى ەلجان ءبىرتانوۆتىڭ، ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ، وبلىستار جانە نۇر-سۇلتان، الماتى، شىمكەنت قالالارىنىڭ اكىمدەرى ورىنباسارلارىنىڭ قاتىسۋىمەن كەڭەس وتكىزدى.

تالقىعا سالىنعان نەگىزگى تاقىرىپ ءوزىن-ءوزى جۇمىسپەن قامتىعان حالىقتىڭ مارتەبەسىن وزەكتەندىرۋ، ءتۇسىندىرۋ جۇمىستارىن جۇرگىزۋ جانە مىندەتتى الەۋمەتتىك مەديتسينالىق ساقتاندىرۋدى ەنگىزۋ شەڭبەرىندە ساقتاندىرۋ اۋدارىمدارىنىڭ ۋاقتىلى جۇزەگە اسىرىلۋىن قامتاماسىز ەتۋ ماسەلەلەرى بولدى.

«ەڭ باستىسى – حالىقتىڭ مارتەبەسىن وزەكتەندىرۋ. بىزدە جاقسى تاجىريبە بار. الايدا، كەمشىلىكتەردى دە جاسىرۋعا بولمايدى. جىل سوڭىنا دەيىن مارتەبەسى ءالى انىقتالماعان بارلىق ادامداردى قامتۋ كەرەك. ءاربىر قازاقستاندىق بۇل جۇيەنىڭ قالاي جۇمىس ىستەيتىنىن، اسىرەسە اۋىلدىق جەرلەردە مەديتسينالىق كومەكتى قالاي الا الاتىنىن ءبىلۋى ءتيىس. تولەمدەردىڭ ۋاقتىلى جاسالاتىنىنا قاتىستى توقتالار بولساق، بۇل ماسەلەنى دە شەشۋ قاجەت. سالىق ورگاندارى سالىقتى جانە مىندەتتى الەۋمەتتىك تولەمدەردى، ونىڭ ىشىندە ءمامس تولەۋدى باقىلاۋدى جانە جۇمىستى كۇشەيتۋى ءتيىس. 2020 جىلدىڭ 1 قاڭتارىنان باستاپ ءمامس ىسكە قوسۋ بويىنشا ەلباسى مەن پرەزيدەنتتىڭ تاپسىرمالارى بار. مەرزىمدەر اۋىستىرىلمايدى. بارلىق وڭىرلەر جىل سوڭىنا دەيىن دايىن بولۋى ءتيىس»، - دەدى بەردىبەك ساپارباەۆ.

پرەمەر ورىنباسارى اتاپ وتكەندەي، مەديتسينالىق ساقتاندىرۋدى ەنگىزۋگە دايىندىق جوعارى. قاراعاندى وبلىسىندا ءمامس-ءتى اپروباتسيالاۋدىڭ العاشقى ايى اياقتالدى. ول دەنساۋلىق ساقتاۋ جۇيەسى كەلەسى جىلدان باستاپ مەديتسينالىق ساقتاندىرۋدى بۇكىل ەل بويىنشا ەنگىزۋگە دايىن ەكەنىن كورسەتتى. سونىمەن قاتار ءمامس جۇيەسىنە قولداۋ رەتىندە دەنساۋلىق ساقتاۋ جۇيەسىنىڭ ارداگەرلەرى، جوعارى ساناتتى دارىگەر، مەديتسينا عىلىمدارىنىڭ دوكتورى، پروفەسسور اباي بايگەنجين جانە بۇرىنعى دەنساۋلىق ساقتاۋ ءمينيسترى، مەديتسينا عىلىمدارىنىڭ دوكتورى جاقسىلىق دوسقاليەۆ ءوز پىكىرلەرىن ءبىلدىردى. «الەمدەگى بىردە-ءبىر مەملەكەت، ءتىپتى ەڭ باي مەملەكەت ءوز ازاماتتارىنىڭ دەنساۋلىعى ءۇشىن قارجىلىق جاۋاپكەرشىلىك اۋىرتپالىعىن كوتەرە المايدى. ءبىزدىڭ سانامىزعا كەڭەس زامانىنان بەرى مەملەكەت مەديتسينالىق قىزمەتتەردى تولەۋگە، قىمبات وتالاردى تەگىن جۇرگىزۋگە، ءدارى-دارمەكتەردى تەگىن بەرۋگە ءتيىس دەگەن پىكىر بەرىك ورناپ قالعان. ءمامس ادامداردى ءوز دەنساۋلىعىنا جاۋاپكەرشىلىكپەن قاراۋعا ۇيرەتەدى. ازاماتتار وزدەرىنىڭ دەنساۋلىعىنا جاۋاپتى ەكەنىن ءتۇسىنۋى ءتيىس. ءمامس ەنگىزۋ دەنساۋلىق ساقتاۋ سالاسىن رەسۋرستىق قامتاماسىز ەتۋدى ايتارلىقتاي ارتتىرۋعا، مەديتسينالىق مەكەمەلەر مەن قىزمەتكەرلەردىڭ ەكونوميكالىق قىزىعۋشىلىعىن ارتتىرۋعا مۇمكىندىك بەرەدى، دەنساۋلىق ساقتاۋدى بارىنشا يكەمدى جانە ءتيىمدى قارجىلاندىرۋعا جول اشادى»، - دەپ ەسەپتەيدى اباي بايگەنجين. كەڭەس قورىتىندىسى بويىنشا بەردىبەك ساپارباەۆ مەديتسينالىق ساقتاندىرۋ جۇيەسىن ەنگىزۋ، حالىقتىڭ مارتەبەسىن وزەكتەندىرۋ جانە حالىقتى اقپاراتتاندىرۋ بويىنشا جۇمىستى جالعاستىرۋدى تاپسىردى.

«ميراس» كلينيكاسىنىڭ جۇمىسىمەن تانىسۋ بارىسىندا ۆيتسە-پرەمەر تسيفرلاندىرۋ جۇيەسىنىڭ ەنگىزىلۋىمەن، مەديتسينالىق قىزمەتتەردىڭ ساپاسىمەن، سونداي-اق كلينيكا قىزمەتكەرلەرىن قارجىلىق قامتاماسىز ەتۋ دەڭگەيىمەن تانىستى. «ميراس» كلينيكاسى وسى جىلدىڭ قاڭتارىندا ءمجا اياسىندا اشىلعان بولاتىن. قازىر مەكەمەگە 20 100 ادام تىركەلگەن، ونىڭ 7 900 – بالالار. وعان تاۋلىگىنە 250 پاتسيەنت قاتىسادى. ولاردى 32 دارىگەر قابىلدايدى. مەكەمە بارلىق قاجەتتى زاماناۋي جابدىقتارمەن، ونىڭ ىشىندە گەمودياليزگە ارنالعان كرەسلولارمەن جابدىقتالعان. بەردىبەك ساپارباەۆ سونداي-اق «Life In» وڭالتۋ ورتالىعىندا بولدى. مۇندا مۇمكىندىگى شەكتەۋلى بالالار مەن حيرۋرگيالىق وتالار جاسالعان ناۋقاستار امبۋلاتورلىق-قالپىنا كەلتىرۋ ەمىن الادى. ورتالىقتا 80-نەن استام قىزمەت ءتۇرى كورسەتىلەدى جانە 30 مامان كەڭەس بەرەدى، ونىڭ ىشىندە ورتوپەدتەر، تراۆماتولوگتار، نەۆرولوگتار، نەيروحيرۋرگ جانە پسيحولوگتار. سونداي-اق مۇندا كانيس-تەراپيا باعدارلاماسى بار. جاقىن ارادا كىشكەنتاي پاتسيەنتتەردى يپپوتەراپيا ارقىلى ەمدەۋ ءۇشىن پوني ساتىپ الۋدى جوسپارلاپ وتىر. ەستەرىڭىزگە سالا كەتەيىك، قاراعاندى وبلىسى پيلوتتىق رەجيمدە مىندەتتى الەۋمەتتىك مەديتسينالىق ساقتاندىرۋدى ەنگىزگەن العاشقى ءوڭىر بولىپ تابىلادى. بۇل جۇيە وسى جىلدىڭ 1 قىركۇيەگىندە ىسكە قوسىلدى، ال ەلىمىزدىڭ باسقا وڭىرلەرىندە ونى 2020 جىلدىڭ 1 قاڭتارىندا عانا ەنگىزەتىن بولادى. بۇگىنگى تاڭدا قاراعاندى وبلىسىندا تۇرعىندارىنىڭ 81% ءمامس جۇيەسىندەگى مارتەبەسى انىقتالدى.

Abai.kz