بۇل تۋرالى 15 قازاندا رەسمي باسىلىمدار جازدى. بۇرىنعى پرەزيدەنتتىڭ ءباسپاسوز حاتشىسى ايدوس ۇكىباي كەڭەس جيىنىندا نازارباەۆ تۇركى الەمىنىڭ وردەنىمەن ماراپاتتالعانىن حابارلادى.

ال نازارباەۆ سامميتتە سويلەگەن كەزدە كەڭەستىڭ اتىن «تۇركى مەملەكەتتەرىنىڭ ۇيىمى» دەپ وزگەرتۋدى ۇسىندى.

قازاقستاندىق اقپارات اگەنتتىكتەرىنىڭ جازۋىنشا، باكۋدەگى جيىندا نازارباەۆقا «تۇركىتىلدەس ەلدەردىڭ كەڭەسىنىڭ ءومىر بويعى قۇرمەتتى توراعاسى» اتاعى تاپسىرىلۋى ءتيىس. نازارباەۆقا بۇل اتاقتى بەرۋدى مامىردا تۇركيا ۇسىنعان.

تۇركىتىلدەس ەلدەردىڭ ىنتىماقتاستىق كەڭەسى 2009 جىلى قازاندا قۇرىلعان. ۇيىمعا ازەربايجان، قازاقستان، قىرعىزستان جانە تۇركيا مۇشە. بيىل قىركۇيەكتە وزبەكستان ۇيىمعا مۇشە بولۋعا ءوتىنىش بەرگەن. بىلتىر قىرعىزستاندا وتكەن سامميتتە ۇيىمعا باقىلاۋشى رەتىندە ۆەنگريا قوسىلعان. سول جيىندا توراعالىق قىرعىزستاننان ازەربايجانعا وتكەن.

قازاقستاندى 30 جىلداي باسقارعان نۇرسۇلتان نازارباەۆ بيىل ناۋرىزدا پرەزيدەنت وكىلەتىن توقتاتاتىنىن مالىمدەگەن. بىراق «نۇر وتان» پارتياسىنىڭ ليدەرى جانە قاۋىپسىزدىك كەڭەسىنىڭ توراعاسى رەتىندە بيلىكتىڭ ءبىر بولىگىن ءوز قولىندا ۇستاپ وتىر.

نازارباەۆتىڭ زاڭمەن بەكىتىلگەن «ەلباسى» ستاتۋسى بار. بۇل ستاتۋسقا ساي، نازارباەۆ پەن ونىڭ وتباسى قانداي دا ءبىر قىلمىستىق يا اكىمشىلىك جاۋاپقا تارتىلمايدى.

ناۋرىزدا پرەزيدەنتىكتەن كەتكەن نازارباەۆقا «قۇرمەتتى سەناتور» جانە ەۋرازيا ەكونوميكالىق وداعىنىڭ قۇرمەتتى توراعاسى اتاعى بەرىلگەن.

Abai.kz