تۇركى كەڭەسى 2009 جىلى قۇرىلعان، وعان ءازىربايجان، قازاقستان، قىرعىزستان جانە تۇركيا مۇشە بولىپ كىرگەن. وزبەكستان قىركۇيەك ايىندا ۇيىمعا كىرۋ تۋرالى ءوتىنىش ءبىلدىردى. 2018 جىلى قىركۇيەكتە قىرعىزستاندا وتكەن سامميتتە ۆەنگريا ۇيىمعا باقىلاۋشى-مەملەكەت رەتىندە قابىلداندى.

15 قازاندا قازاقستاننىڭ بۇرىنعى پرەزيدەنتى نۇرسۇلتان نازارباەۆ تۇركى كەڭەسىنىڭ ومىرلىك قۇرمەتتى توراعاسى دەپ جاريالاندى.

وزبەكستان پرەزيدەنتى شاۆكات ميرزياەۆ كەڭەستىڭ جەتىنشى سامميتىندە بىرلەسكەن تەحنوپاركتەر، يننوۆاتسيالىق ستارتاپ-كومپانيالار مەن ۆەنچۋرلى قورلار، سونىمەن بىرگە بىرلەسكەن ينۆەستيتسيالىق قور قۇرىپ، تۇركىتىلدەس ەلدەردىڭ ساۋدا ءۇيىن اشۋدى ۇسىندى.

بۇعان قوسا ول تۇركى كەڭەسى اياسىندا جاس كاسىپكەرلەر فورۋمىن ۇيىمداستىرىپ، ونىڭ العاشقى جينالىسىن وزبەكستاندا وتكىزۋ تۋرالى باستاما كوتەردى. بۇل تۋرالى وزبەكستان پرەزيدەنتىنىڭ ءباسپاسوز قىزمەتى حابارلادى.

شاۆكات ميرزياەۆ ەۋروپا، قىتاي جانە وڭتۇستىك ازيا نارىقتارىنا شىعاتىن كولىك-كوممۋنيكاتسيا جوبالارىن قولعا الۋ كەرەكتىگىن ايتتى. سونىمەن بىرگە ول ۇيىمعا مۇشە ەلدەرگە "تۇركى ادەبيەتىنىڭ جاۋھازدارى" كىتاپتار توپتاماسىن باسىپ شىعارۋدى ۇسىندى.

Abai.kz