19-قازان كۇنى تالدىقورعان اتشابارىندا وربۇلاق شايقاسىنىڭ تاريحي قويىلىمى ساحنالاندى. بۇل - ەلباسىنىڭ «رۋحاني جاڭعىرۋ» باعدارلاماسى مەن التىن وردانىڭ 750 جىلدىعىنا ارنالىپ ۇيىمداستىرىلدى. بۇل قويىلىمدى تاماشالاۋعا وبلىس اكىمى اماندىق باتالوۆ ارنايى كەلدى. 

وربۇلاق شايقاسى - قازاق حالقىنىڭ جوڭعار شاپقىنشىلىعىنا قارسى ازاتتىق سوعىسىنداعى العاشقى بەتبۇرىستى وقيعالاردىڭ ءبىرى. بۇل شايقاس 1643 جىلدىڭ جازىندا قازاق حانى جاڭگىر حان مەن جوڭعار قولىن باسقارعان باتىر قونتايشى اراسىندا ءوتتى.

اشىق الاڭدا وتكەن تاريحي قويىلىمدى ساحنالاۋعا 1500 گە جۋىق ادام تارتىلعان. قويىلىمدا جاۋىنگەرلەردىڭ ۇرىس تاكتيكالارى مەن ايلاكەرلىك ادىستەرى كورىنىس تاپقان. سونىمەن قاتار، اكتەرلاردىڭ شىنايى وبرازى مەن كاسكادەرلىق جۇمىستاردىڭ شەبەرلىگى قويىلىمنىڭ مازمۇنىن اشا تۇسەدى.

ال، وبلىس اكىمى اماندىق باتالوۆتىڭ ايتۋىنشا، مۇنداي جوبالار بابالارىمىزدىڭ ەرلىگى مەن باتىرلىعىن كورسەتۋمەن قاتار، جاستاردى ەلجاندىلىققا تاربيەلەيدى.

اماندىق باتالوۆ، الماتى وبلىسىنىڭ اكىمى:

-وربۇلاق شايقاسىنىڭ تاريحي قويىلىمى ءبىزدىڭ وبلىسىمىزدا «رۋحاني جاڭعىرۋ» باعدارلاماسى اياسىندا وسىمەن ەكىنشى مارتە وتكىزىلىپ وتىر. بۇل – بابالارىمىزدىڭ ەرلىگى مەن باتىرلىعىن كورسەتۋمەن قاتار، جاستاردى ەلجاندىلىققا تاربيەلەۋگە باعىتتالعان تەڭدەسسىز جوبا. ۇلى دالا ۇلى تۇلعالاردى دۇنيەگە اكەلدى، ولاردىڭ ەسىمدەرى مەن ەرلىكتەرىن كەيىنگى ۇرپاق ءبىلىپ ءجۇرۋى شارتى. ويتكەنى وتكەندى بىلمەي، بولاشاقتى باعدارلاۋ مۇمكىن ەمەس. سىزدەر بورودينو شايقاسى جايلى دا جاقسى بىلەسىزدەر، ماسكەۋدە جىل سايىن ونى تاريحي جاڭعىرتۋ داستۇرگە اينالعان. ءبىز تاريحي قويىلىم كورسەتۋ ارقىلى داڭقتى وربۇلاق شايقاسىن دا ۇرپاقتار جادىندا ورنىقتىرۋدى قالايمىز، - دەدى.

ودان بولەك، «تالدىقورعان» يپپودرومىنا جينالعان كوپشىلىك ىستىق باۋىرساق پەن قىمىزدان ءدام تاتىپ، قولونەر شەبەرلەرىنىڭ كورمەسىن تاماشالادى. كورمە بارىسىندا، كيىزدەن، تەرىدەن، كۇمىستەن جاسالعان بۇيىمدار ساتىلىمعا قويىلعان.

جانە، بىرنەشە ۇلتتىق سپورت ويىندارى ەل نازارىنا ۇسىنىلدى. كوپشىلىك قاۋىم قازاقشا كۇرەس پەن كوكپار ويىندارىن تاماشالىپ، وربۇلاق شايقاسى كەزەڭىندەگى ساۋىت-سايمان، قارۋ-جاراق اسىنعان باتىرلارمەن سۋرەتكە ءتۇستى.
ال، قازاقشا كۇرەستە قىزىلوردا وبلىسىنان كەلگەن پالۋان ەرعالي ەلامان ۇزدىك شىعىپ، جاڭا «لادا گرانتا» اۆتوكولىگىنە يە بولدى. سونىمەن قاتار، زاماناۋي ونەر سۇيەر قاۋىم ءۇشىن ەتنوستيلدەگى كيىم ۇلگىلەرى كورسەتىلدى. ال، كىشكەنتاي كورەرمەندەر ءۇشىن انيماتورلار مەن بالالار الاڭدارى جۇمىس ىستەدى.

ايتا كەتەيىك، الماتى وبلىستىق ىشكى ساياسات باسقارماسىنىڭ باسشىسى رۋستام الپىسباەۆتىڭ ايتۋىنشا، بۇل شارالاردى وتكىزۋ ءۇشىن وبلىستىق ىشكى ساياسات باسقارماسى مەن توو "رۋحاني جاڭعىرۋ" مەكەمەلەرىنىڭ اراسىندا 98 ميلليونعا كەلىسىم شارت جاسالىپتى. ال، قويىلىمدى ساحنالاۋعا 61 ميلليون تەڭگە جۇمسالعان.

بۇل تاريحي قويىلىم جەتىسۋ جەرىندە ەكىنشى رەت ساحنالانىپ وتىر.

Abai.kz