"ەرلان بالتابايدى اۋەل باستان نەگىزسىز قامادى. ونىڭ ۇستىنەن قوزعالعان قىلمىستىق ءىس تۇتاستاي ءادىل سوت پارودياسىنا ۇقسايدى. ونىڭ پرەزيدەنت جارلىعىمەن بوساپ شىعۋىن جىلى قابىلدادىق. بيلىكتى پرەزيدەنت جارلىعى نەگىزىندە ونى بوساتۋعا شاقىرامىز. سونىمەن بىرگە، باستاپقىدا شىعارىلعان نەگىزسىز ساياسي استارى بار سوت ۇكىمىنىڭ كۇشىن جويۋعا شاقىرامىز" دەدى "حالىقارالىق كاسىپوداقتار كونفەدەراتسياسىنىڭ" باس حاتشىسى شاران بارروۋ.
16 قازاندا شىمكەنت سوتى باستاپقىدا "سەنىپ تاپسىرعان مۇلىكتى يەمدەنۋ" بابى بويىنشا جەتى جىلعا سوتتالىپ، كەيىن پرەزيدەنت قاسىم-جومارت توقاەۆتىڭ راقىمشىلىعىمەن بوساپ شىققان كاسىپوداق بەلسەندىسى ەرلان بالتابايدى 5 اي 8 كۇنگە قاماۋ تۋرالى قاۋلى شىعارعان. سوت ۇكىمىن وقىعان سۋديا پرەزيدەنت راقىمشىلىعىنان سوڭ بالتابايدىڭ تۇرمە جازاسى 1 ملن 595 مىڭ تەڭگە (4150 دوللار) ايىپپۇلمەن الماستىرىلعانىن، بىراق بالتابايدىڭ ونى تولەۋدەن باس تارتقانىن العا تارتقان ەدى. ال بالتاباي بۇعان دەيىنگى سوتتاردا ء"وزىنىڭ كىناسىزدىگىن دالەلدەۋگە تىرىسقانىن، بىراق وعان مۇرسات بەرىلمەگەنىن" ايتتى.
17 شىلدە كۇنى شىمكەنتتەگى ەڭبەكشى اۋداندىق سوتى "لايىقتى ەڭبەك" كاسىپوداعى مەن وتىن-ەنەرگەتيكا كەشەنىنىڭ سالالىق كاسىپوداق توراعاسى ەرلان بالتابايدى قىلمىستىق كودەكستىڭ «سەنىپ تاپسىرعان مۇلىكتى يەمدەنۋ» بابى بويىنشا كىنالى دەپ تاۋىپ، 7 جىلعا سوتتاعان. سوتتالۋشى وزىنە تاعىلعان ايىپتى مويىندامايتىنىن، ءىستىڭ ساياسي استارى بار ەكەنىن ايتقان. ال ونىڭ ءىسىن قاراعان سۋديا "بالتابايدىڭ كىناسى تولىق دالەلدەندى" دەگەن.
سوت ۇكىمى شىققان سوڭ قازاقستاندىق قۇقىق قورعاۋشىلار جانە بىرقاتار حالىقارالىق ۇيىمدار قازاقستان بيلىگىن ۇكىمنىڭ كۇشىن جويىپ، بەلسەندىنى بوساتۋعا شاقىرعان. قازاقستاننىڭ ادام قۇقىقتارى جونىندەگى بيۋروسى، "حالىقارالىق قۇقىقتىق باستاما" جانە "ليبەرتي" قورى 31 شىلدەدە تاراتقان مالىمدەمەسىندە بالتابايعا شىعارىلعان ۇكىم "ەڭبەك سالاسىنداعى بىرلەسۋ ەركىندىگى تۋرالى حالىقارالىق ستاندارتتار مەن قازاقستاندىق زاڭ نورماسى ورەسكەل بۇزىلعانىن كورسەتتى" دەپ مالىمدەگەن. قۇقىق قورعاۋشىلار "بيلىك تاۋەلسىز كاسىپوداقتار قوزعالىسىن قورقىتۋ جانە قۇرتۋ ناۋقانىن" جالعاستىرىپ وتىر دەگەن.
9 تامىزدا پرەزيدەنت قاسىم-جومارت توقاەۆ ەرلان بالتابايعا راقىمشىلىق جازعان. بىراق ول كەزدە بالتابايدىڭ جازاسى ايىپپۇلمەن الماستىرىلعانى جايلى ايتالماعان. بىراق قىركۇيەكتە بالتاباي تۇرمەدەن شىققانىمەن كاسىپوداق جۇمىسىنا قايتا توراعالىق ەتۋگە كەدەرگى بارىن ايتىپ، راقىمشىلىقتان باس تارتاتىنىن مالىمدەگەن. ول پرەزيدەنت توقاەۆقا حات جازعانىن، ەندى سوت ارقىلى زاڭسىز سوتتالعانىن دالەلدەۋگە تىرىساتىنىن ايتقان.
Abai.kz
