ءبىزدىڭ باستى كەمشىلىگىمىز – وزەكتى دە نازىك ءدىني ماسەلەلەردىڭ شالعاي ەلدى-مەكەندەردىڭ تۇرعىندارىنا، حالىقتىڭ ۇيىمداسپاعان توپتارىنا جەتپەۋى. بۇل تۋرالى بۇگىن ەلوردادا وتكەن ءىىى رەسپۋبليكالىق يمامدار فورۋمىندا ءسوز سويلەگەن اقپارات جانە قوعامدىق دامۋ ءمينيسترى داۋرەن اباەۆ مالىمدەدى. مينيستر ءدىن سالاسىنداعى تۇيىتكىلدى 5 ماسەلەنىڭ ءمانىسىن ءتۇسىندىرىپ قانا قويماي، ونىڭ شەشىمىن ۇسىندى.

ء"داستۇرلى ءدىندى قايتارۋ جۇمىستارىن كۇشەيتۋ قاجەت. ءتۇسىندىرۋ جۇمىستارىنداعى ءبىزدىڭ باستى كەمشىلىگىمىز – ءدىن سالاسىنىڭ وتە وزەكتى دە نازىك ماسەلەلەرىنىڭ شالعاي ەلدى-مەكەندەردىڭ تۇرعىندارىنا، حالىقتىڭ ۇيىمداسپاعان توپتارىنا جەتپەۋى. وسى ماسەلەگە ەرەكشە ءمان بەرۋىمىز قاجەت. وسى تۇستا بارلىق وڭىرلەردەگى يمامداردى حالىققا ناسيحات جاساۋ كەزىندە قوعامداعى وتكىر ماسەلەلەرگە توقتالىپ، كەلەڭسىز جاعدايلاردىڭ الدىن الۋعا باعىتتالعان ۋاعىزدار جۇرگىزۋگە شاقىرامىن", - دەدى داۋرەن اباەۆ.

مينيستر "رۋحاني قۇندىلىقتار – قوعام بىرلىگىنىڭ نەگىزى" اتتى رۋحانيات وكىلدەرى باس قوسقان القالى جيىندا 5 نەگىزگى ماسەلەگە ءجىتى توقتالىپ، ولاردى ناقتى قالاي شەشۋ جولدارىن ءتۇسىندىرىپ بەردى.

اباەۆ ەلباسىنىڭ "رۋحاني جاڭعىرۋ" باعدارلاماسىنىڭ وزەگى سانالاتىن پراگماتيكالىق كوزقاراسقا بۇقارانى تاربيەلەۋگە يمامداردىڭ ءوز ۇلەستەرىن قوسۋىن سۇرادى. ونىڭ ايتۋىنشا، ۋاعىز ايتۋمەن قاتار حالىقتى ىسىراپشىلدىق پەن ورىنسىز ءسان-سالتاناتتان تىيىلۋعا، جاستارىمىزدىڭ نەكەنى ساقتاۋعا، ازاماتتاردى سالاماتتى ءومىر سالتىن ۇستاۋعا شاقىرعان ءجون.

وسى رەتتە اۋىلدارداعى مەشىت يمامدارىنا ماتەريالدىق جاردەم بەرۋ ماسەلەسى قاراستىرىلىپ جاتقانىن حابارلادى. كۇردەلى تۇيتكىلدى شەشۋگە ءبىرشاما ۋاقىت كەتەدى. دەسە دە، بۇل سۇراقتىڭ وڭتايلى شەشىلۋىنە بار كۇش-جىگەرىن سالاتىنىن ايتتى.

"ەكىنشىدەن، مەشىتتەردىڭ قىزمەتىن رەتتەۋدى جاڭداندىرۋ قاجەت. ايماقتاردا مەشىتتەر كوممۋنالدىق-شارۋاشىلىق ماسەلەلەرى تولىق شەشىلگەندە عانا پايدالانۋعا بەرىلۋى كەرەك دەپ سانايمىز. مەشىتتى اشقان جەرگىلىكتى مەتسەناتتار مەن دەمەۋشىلەر باستاپقى ۋاقىتتا ءدىني عيماراتتىڭ شىعىندارىن ءوز قامقورلىعىنا الۋعا شاقىرۋلارىڭىزدى سۇرايمىن. ءدىنىمىز بويىنشا ساۋاپتى ءىس جاساۋ تەك قانا مەشىت سالۋمەن شەكتەلمەيدى. ارينە، قاجەتتىلىك بار جەردە مەشىت سالۋ كەرەك. الايدا، مەشىت جەتكىلىكتى بولسا، قايىرىمدى ازاماتتار مەن مەتسەناتتاردى مەكتەپ، اۋرۋحانا، جول، كوپىر سياقتى حالىق كوپ جىلدار بويى يگىلىگىن كورەتىن، ساۋابى وراساڭ زور يگى ىستەرگە كوپتەپ ۇندەۋدى ۇسىنامىن", - دەدى ول.

سونىمەن قاتار، ءدىني باسقارما قىزمەتكەرلەرىنىڭ ءبىلىمى مەن بىلىكتىلىگىن ارتتىرۋ جونىندە دە ءسوز قوزعادى.

بۇگىندە مەملەكەت يمامدارعا قولداۋ كورسەتۋ ماقساتىندا جىل سايىن ءدىني باسقارمانىڭ قىزمەتشىلەرىن وقىتىپ كەلەدى. بۇل جۇمىس جالعاسىن تاپپاق. مەشىت يمامدارىنىڭ تاپشىلىعىن شەشۋ ماقساتىندا نۇر-مۇباراك ۋنيۆەرسيتىندە يسلامتانۋ ماماندىعىنا گرانتتاردىڭ كوپتەپ بولىنۋىنە كومەك كورسەتىلەتىن بولادى.

"كەلەسى ءبىر ماڭىزدى ماسەلە بار. حالىقتىڭ جانازادان شىعارۋ سياقتى ءدىني راسىمدەردىڭ توڭىرەگىندە كەيبىر مولدالاردىڭ جۇمىسىنا كوڭىلى تولمايدى. سوندىقتان ءدىني باسقارما يمامداردىڭ جاڭا وبرازىن قالىپتاستىرۋ كەرەك دەپ ەسەپتەيمىن. حالىق يمامداردى قايىرىمدىلىق شارالارىنا مۇرىندىق بولاتىن، قايعىسى مەن قۋانىشىن بولىسەتىن قايىرىمدى جاندار سيپاتىندا تانىعان ءجون. سەبەبى، ءىستىڭ سوزگە قاراعاندا اسەرى – كۇشتىرەك", - دەپ شەگەلەپ ايتتى اباەۆ.

بۇدان بولەك، داۋرەن اباەۆ ءوز سوزىندە تۇرىپ، جۇرتشىلىققا بەرگەن ۋادەسىن ورىنداعانىن ايتتى.

"كەزدەسۋلەرىمىزدىڭ بىرىندە وزدەرىڭىزگە ءدىن تاقىرىبىندا تەلەۆيزيالىق باعدارلاما اشۋعا ۋادە بەرگەن ەدىك. ءبىزدىڭ مينيسترلىك تاراپىنان سول ۋادەنى ورىنداپ، قازىر "قازاقستان" ۇلتتىق ارانسى مەن "حابار" تەلەارنالارىنان "يمان وزەگى" سىندى باعدارلامالار اشىلدى. ەلباسى مەن مەملەكەت باسشىسى قاسىم-جومارت كەمەلۇلى ءدىن ماسەلەسىنە ايرىقشا نازار اۋدارۋدا. سوندىقتان دا بۇل جولدا بىرلەسىپ، تاباندىلىقپەن جۇمىس ىستەيتىنىمىزگە سەنەمىن. بارشاڭىزعا اللانىڭ مەيىرىمى مەن اماندىعى بولسىن", - دەپ ءوز ءسوزىن تۇيىندەدى.

ءدىن سالاسىنداعى ەڭ كوكەيكەستى تۇيتكىلدەردى تارقاتىپ ايتقان ۇكىمەت وكىلى ءدىني باسقارمانىڭ الەۋمەتتىك جەلى مەن باق بەتتەرىندەگى اعارتۋشىلىق جۇمىستارىن كۇشەيتۋ كەرەكتىگىن دە اتاپ ءوتتى.

جاعىمدى جاڭالىقتاردىڭ ءبىرى – جۋىردا جەكە ازاماتتاردىڭ وتىنىشىنە اشىق ءارى جەدەل تۇردە جاۋاپ قاتۋ ماقساتىندا ۆيرتۋالدى قابىلداۋ بولمەسى اشىلادى. بۇل ازاماتتارعا تەرىس مالىمەتتەردى ەمەس، قازاقستان ءمۇسىلماندارى ءدىني باسقارماسىمەن تەكسەرىلگەن دۇرىس ءارى شىنايى اقپارات الۋعا مۇمكىندىك بەرەدى. بۇل باستامانى جۇزەگە اسىرۋعا اباەۆ ءوزى باسقارىپ وتىرعان مينيسترلىك بەلسەندى تۇردە اتسالىساتىنىن جەتكىزدى.