بۇل تۋرالى ازاتتىققا 21 قازاندا ولاردىڭ قورعاۋشىسى ءلاززات احاتوۆا حابارلادى. قورعاۋشىنىڭ سوزىنشە، ەكى جىگىتكە بۇلتارتپاۋ شاراسىن بەلگىلەيتىن سوت وتىرىسى دۇيسەنبى، 21 قازاندا ءوتۋى ءتيىس بولعان. الايدا بۇل سوت وتىرىسى اياق استىنان وزگەرىپ 20 قازاندا مەملەكەتتىك قورعاۋشىنىڭ قاتىسۋىمەن عانا ءوتىپ كەتكەن.

- سوتتىڭ جەكسەنبى كۇنى تۇستە ءوتىپ كەتكەنىن ەستىپ، تاڭعالدىق. سوت توراعاسى نياز حاسەنوۆپەن كەزدەسىپ، ءوز ءۋاجىمىزدى جەتكىزدىك. سوتتى وتكىزىپ، قاۋلى قابىلداعان دا سول كىسى ەكەن. ول كىسى بۇلتارتپاۋ شاراسى ادام قاماۋعا الىنعان ساعاتتان باستاپ 48 ساعات ىشىندە شەشىلۋى كەرەگىن، 18-ءى كۇنى قاماۋعا الىنعان ءالىمۇلى مەن مۇساحانۇلىنىڭ ۋاقىتى كەشە كەشكى 18.00-دە اياقتالىپ جاتقاندىقتان، مەملەكەتتىك ادۆوكاتتىڭ قاتىسۋىمەن سوتتى وتكىزگەنىن ايتتى. بىزگە، ياعني ادۆوكاتتارىنا "ەسكەرتتىك" دەدى. بىراق ماعان ادۆوكات رەتىندە ەشكىم ەسكەرتكەن جوق. سوندىقتان وبلىستىق سوتقا اپپەلياتسيالىق شاعىم ءتۇسىردىم، - دەدى ادۆوكات ءلاززات احاتوۆا ازاتتىققا.

قورعاۋشىنىڭ سوزىنشە، شەكارانى كەسىپ ءوتۋ اسا اۋىر قىلمىس ساناتىنا جاتپايتىندىقتان "ەكى ايعا قاماۋ - اۋىر جازا".

- سۋديانىڭ تەرگەۋ اياقتالعانعا دەيىن قولحاتپەن بوساتۋىنا، ۇيقاماقتا بولۋى تۋرالى قاۋلى شىعارۋعا دا قۇقىعى بار ەدى، - دەيدى ادۆوكات. ءلاززات احاتوۆا ەرتەڭ تاڭرەتەڭ قورعاۋىنداعى ازاماتپەن كەزدەسەتىنىن ايتقان.

ازاتتىق ءتىلشىسى وسكەمەندەگى تەرگەۋ يزولياتورىنا حابارلاسقانىمەن، ونداعى كەزەكتى قىزمەتكەر "مەكەمەگە جەتكىزىلگەن ادامدار تۋرالى قاندايدا ءبىر اقپاراتتى تەك تۋىستارىنا جانە تەك مەكەمە رۇقساتىمەن عانا بەرە الاتىنىن" جەتكىزدى.

30 جاستاعى قاستەر مۇساحانۇلى مەن 25 جاستاعى مۇراگەر ءالىمۇلى ءدوربىلجىڭ ايماعىنان جولعا شىعىپ، 1 قازاندا قىتاي شەكاراسىنان وتكەندەرىن ايتقان. وزدەرىنىڭ ايتۋىنا قاراعاندا، قازاق-قىتاي شەكاراسى ارالىعىنداعى بەيتاراپ اۋماقتا بەس كۇندەي ءجۇرىپ، قازاننىڭ 6-سى كۇنى شىعىس قازاقسان وبلىسىنىڭ زايسان، شىلىكتى، ماڭىراق اۋىلدارىنىڭ تۇسىنان قازاقستانعا وتكەن. كەيىن جولاي تاكسي جالداپ، 10 قازاندا قازاندا الماتىعا "كەلگەن". 14 قازاندا الماتىداعى ادام قۇقىعىن قورعاۋ بيۋروسىندا وتكەن ءباسپاسوز ءماسليحاتىندا قاستەر مۇساحانۇلى شىڭجاڭداعى لاگەردە قاماۋدا وتىرىپ شىققانىن، ال مۇراگەر ءالىمۇلى سول جاقتا قىسىم كورگەنىن ايتقان. ءباسپاسوز ءماسليحاتىنان كەيىن ولاردى شەكارا قىزمەتىنىڭ وكىلدەرى الىپ كەتىپ، 15 قازاندا تەرگەۋ امالدارى ءۇشىن شىعىس قازاقستانعا جەتكىزىلگەن.

ۇقك شەكارا قىزمەتى قاستەر مۇساحانۇلى مەن مۇراگەر ءالىمۇلىنىڭ ۇستىنەن قىلمىستىق كودەكستىڭ 392-بابى 1 بولىگى، ياعني "قازاقستان شەكاراسىن زاڭسىز كەسىپ ءوتۋ" بابى بويىنشا تەرگەي ءجۇرىپ جاتقانىن حابارلاعان. ۇقك-ءنىڭ مالىمەتىنشە، قاستەر مۇساحانۇلى بۇعان دەيىن 2006 جىلدىڭ 21 ماۋسىمىندا شەكارانىڭ قازاقستان جاعىنا ءوتىپ كەتىپ كەيىن قىتايعا قايتارىلعان. شەكارا قىزمەتى سول كەزدە ونىڭ جىلقى ۇرلاپ، قىلمىستىق جاۋاپكەرشىلىكتەن قاشىپ شەكارا بۇزعانىن ايتادى.

Abai.kz