قر اقپارات جانە قوعامدىق دامۋ ءمينيسترى داۋرەن اباەۆ الماتىدا بىرقاتار تاعايىنداۋ جاسادى. اتاپ ايتقاندا، «قازاق گازەتتەرى» جشس باس ديرەكتورى قىزمەتىنە ءشامشىدين پاتتەەۆتى، ال «Egemen Qazaqstan» گازەتىنىڭ الماتى قالاسىنداعى رەداكتسياسىنىڭ باسشىسى لاۋازىمىنا جۇسىپبەك قورعاسبەكتى تاعايىندادى.

بۇل تۋرالى مينيستر ءوزىنىڭ الەۋمەتتىك جەلىدەگى پاراقشاسىندا جازدى.

«بۇگىن قازاقتىلدى باسىلىمدار ءۇشىن ماڭىزدى بىرقاتار تاعايىنداۋلار جاسادىم. الدىمەن، قۇرامىنا «جاس وركەن» جشس بىرىكتىرۋ ارقىلى قايتا قۇرىلعان «قازاق گازەتتەرى» جشس باس ديرەكتورى ەتىپ ءشامشىدين پاتتەەۆتى قايتا تاعايىندادىم. ءشامشىدين اشەنقوجاۇلى قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى، «قۇرمەت» وردەنىنىڭ يەگەرى، ءباسپاسوز سالاسىندا ەلىمىزگە بەلگىلى كاسىبي مەنەدجەر.سەرىكتەستىك ءباسپاسوز سالاسىن، ونىڭ ىشىندە، بالالار ءباسپاسوزىن دامىتۋدا ۇلكەن ەڭبەك اتقارىپ كەلەدى»، - دەپ جازدى اقپارات جانە قوعامدىق دامۋ ءمينيسترى داۋرەن اباەۆ.

سونداي-اق، مينيستر الداعى ۋاقىتتا دا جاسالعان قۇرىلىمدىق وزگەرىستەر وڭ ناتيجە بەرەتىنىنە، جاڭا تاعايىندالعان ازاماتتار رەداكتسيانىڭ تىنىسىن كەڭەيتىپ،  وقىرمانداردى ناتيجەسىمەن وقىرماندارىن تىڭ دۇنيە، قىزىقتى اقپاراتتارمەن سۋسىنداتا بەرەتىنىنە سەنەتىنىن جەتكىزدى.

«سونىمەن بىرگە، عاسىرلىق تاريحى بار، قازاق ءباسپاسوزىنىڭ قارا شاڭىراعى سانالاتىن «Egemen Qazaqstan» گازەتىنىڭ الماتى قالاسىنداعى رەداكتسياسىنىڭ باسشىسى لاۋازىمىنا جۇسىپبەك قورعاسبەكتى تاعايىندادىم. جۇسىپبەك نۇراقىنۇلى ەلىمىزگە بەلگىلى جۋرناليست، ەڭبەك جولىن «لەنينشىل جاس» گازەتىنەن باستاپ، «قازاق ادەبيەتى»، «جاس الاش» باسىلىمدارىندا ەڭبەك ەتكەن. 2008 جىلدان باستاپ «جاس وركەن» جشس-ءنىڭ باس ديرەكتورى قىزمەتىن ابىرويمەن اتقارىپ كەلدى. سەرىكتەستىكتىڭ قۇرامىنداعى «ۇلان»، «درۋجنىە رەبياتا» گازەتتەرى، «اق جەلكەن»، «بالدىرعان» جۋرنالدارى ەلىمىزدەگى بارلىق بالالاردىڭ سۇيىكتى باسىلىمدارىنا اينالدى. بۇل ۇجىمنىڭ تاباندى ەڭبەگىنىڭ جەمىسى دەپ بىلەمىن»، - دەدى مينيستر.

Abai.kz