Senbi, 6 Mausım 2020
COVID-19 QAZAQSTANDA. Jwqtırğandar — 12312. Jazılğandar — 6903. Qaytıs bolğandar — 52
Bw ne mazaq? 1118 4 pikir 27 Aqpan, 2020 sağat 14:05

LRT endi CTS boldı...

Äñgimesi köp Astananıñ älgi äydik bolğan LRT-si endi CTS bolıp özgerdi. Atauın özgertti. Logotipin jañarttı. Söytip rebrending jasadı. Bwl turalı kompaniya basşısı Bekmırza Igenberdinov mälimdegen eken.

CTS. Tolıq atauı - City Transportation Systems. Qazaqşa qotarması - qalalıq kölik jüyesi.

Jañağı Igenberdinovtıñ aytuınşa, kompaniya atauın özgertip, jañaşalau qala basşılığınıñ şeşimi eken. Söytip, alqa-qotan otırıp aqıldasa kelip, özgelerdiñ täjirbielerin eskerip, eñ jaqsısı osı eken, degende tapqanı - CTS bolıptı. Al kompaniya Halıqaralıq qoğamdıq kölikter odağınıñ müşesi eken. Sondıqtan da jaña atau ağılşın tilinde tañdalıptı-mıs.

Rebrendingtiñ qwnı qanşa? Nemese kompaniya atauın auıstıruğa qanşa qarajat jwmsaldı?

Bekmırza Igenberdinovtiñ aytuınşa, kompaniya atauın, logotipin auıstıruğa byudjettiñ bir tiın qarjısı jwmsalmağan.

"Birinşiden, biz özin-özi asırap otırğan kompaniyamız. Byudjetten bir tiın da almaymız. Al rebrending mäselesi birte-birte boladı. Ol endi bizdiñ şığınımız jäne ol asa qımbatqa tüspeydi. Al logotipti äzirleuge bar bolğanı 100 mıñ teñge jwmsaldı", depti.

Astana LRT öz atauın älgi daulı oqiğadan keyin özgertti me? Igenberdinov rebrending jasauğa LRT dauınıñ qatısı joq degendi aytıptı.

Bekmırza Igenberdinov tizginin wstap otırğan kompaniya jalpı Nwr-Swltandağı qoğamdıq kölikter jüyesine basşılıq jasaydı eken. Al LRT - kompaniya qızmetiniñ bir salası ğana-mıs.

© Twrar Qazanğapov

Esteriñizge sala keteyik, osığan deyin LRT qwrılısınan qarjı jımqıruğa qatıstı tergeu ayaqtalğan. Esep-qisaptarı tügendelgen soñ, byudjetke 5,7 milliard teñge şığın kelgeni anıqtalğan. Äuelde jımısqı jospardı qwruşılar 24 milliardtı qoldı qılmaq bolğan.

Atalğan is boyınşa 10 adam jauapqa tartılğan. Sonıñ işinde 3 adamğa Halıqaralıq izdeu jariyalanğan. Atap aytqanda, Astana äkiminiñ bwrınğı orınbasarı Qanat Swltanbekovke, Astana LRT-nıñ bwrınğı basşısı Talğat Ardanğa jäne jauaptı qızmetker Abdulhamitovke izdeu jariyalanğan. Sonday-aq, qalalıq mäslihattıñ hatşısı Janat Nwrpeyisov twtqındalğan.

Al 2019 jıldıñ şildesinde prezident Qasım-Jomart Toqaev LRT jobasın sınağan. Al qazan ayında tergeu jwmıstarın küşeytu turalı tapsırma bergen.

Abai.kz

4 pikir