Senbi, 6 Mausım 2020
COVID-19 QAZAQSTANDA. Jwqtırğandar — 12312. Jazılğandar — 6903. Qaytıs bolğandar — 52
46 - söz 1986 15 pikir 3 Naurız, 2020 sağat 10:39

Ketkenge keyimeyik, kelgendi kemsitpeyik!

Sayasattanuşı Daniyar Äşimbaevtıñ "Dalanews.kz" saytında “Oralmandar? Olar memleket esebinen kün körgisi keledi” (2 naurız, 2020 jıl) degen pikiri jarıq köripti.

Ketip jatqandar köp, ärine. Bwdan bılay da olardıñ qarqını basılmauı mümkin. Biraq, men olardı Qazaqstanda künköristiñ qiındığınan köşuge mäjbür bolıp jatır dep oylamaymın. Äşimbaev: “Oralmandar? Olar memleket esebinen kün körgisi keledi”

Negizi, bir elden ekinşi elge qolında bar, qaltası qalıñ adamdar köşe aladı. Qazaqstannan bosqın bolıp ketipti degendi, Qwdayğa şükir, estigen joqpız. Ekinşiden, olar da wrpağınıñ bolaşağın oylaydı, öz wltınıñ öşip qalmauın qalaydı... Sondıqtan nege kettiñ dep olardı, nege "ketirdiñ" dep, Qazaqstandı kinälauğa kelmeydi. Qayta, ketkenderge "jolı bolsın!" aytqan jön.

Sosın, sayasattanuşı Äşimbaev mırzanıñ "Olar osında köşip kelip, memleket esebinen kün körgisi keledi”, degen pikirin tüsinbey otırmın.

Ükimet 2020 jılı qandastardı qabıldauğa arnalğan aymaqtıq kvota üşin nebarı 1378 adamğa ğana qarajat böldi. Men on jıldan beri qandastar mäselesimen tikeley aynalısıp kele jatqan adammın. Olardıñ jağdayın öte jaqsı bilem. Qandastarımız özin-özi jwmıspen qamtuda bükil qazaqstandıqqtarğa ülgi bolarlıq jağdayda. Aqşa, üy swrap kelgen qandasımdı jolıqtırğan emespin. Olardı qinap kelgen bir-aq mäsele bar. Ol - qwjat räsimdeudegi qiınşılıq. Qwdayğa şükir, ol mäsele de öz şeşimin tauıp jatır.

Daniyar Äşimbaev mırza: "Ükimette Roman Sklyardan (prem'erdiñ orınbasarı) özge wlt ökilderi joq. Vice-ministrlerdiñ deñgeyinde özge wlt ökilderin sausaqpen sanap alasız. Äkimder arasında da qazaq emester joq. Audan äkimderi arasında işinara ğana özge wlttar. Wlttıq kompaniyalar deñgeyinde de osı körinis", dep keyipti.

Däl osı jağday şetten oralğan qandastarımızdıñ da basında bar. Qayta, Roman Sklyar prem'erdiñ orınbasarı eken ğoy. Onday lauazım qandastarımızdıñ oyı twrmaq, tüsine de kirgen emes. Qandastarımız lauazım, payda izdep kelgen joq. Öz Otanında ömir süru üşin kelip jatır. Köşip kelgenderdiñ işinde bilikti azamattar joq emes, bar. Köp. Biraq, mine otız jıl boldı, Ükimet özi bilip olardı lauazımdı qızmetke qoyu jağın oylastırğan joq...

Jalpı, men kelip jatqandardı kemsituge tipten qarsımın! Qazaqstan - qazaqtıñ qara şañırağı, älemdegi jalğız Otanı! Oğan tarihi sebeptermen bölinip qalıp, şette jürgen isi qazaqtıñ bäri keluge qwqıqtı. Olardıñ bilim jäne mädeniet deñgeyi är türli boluı mümkin, oğan olar jazıqtı emes. Eñ bastısı, şetten köşip kelgen qandastarımız Qazaqstanda twraqtı ömir süredi. Osındağı jwrt ne körse, sonı basınan keşiruge dayın! Otanına degen adaldığı men senimi berik!

Bwl - tonnalap altın berip, satıp ala almaytın qwndılıq! Bir buın ökilderi ala-qwla ömir sürgenimen, kelesi buın teñesip ketedi. Basqadan aqşa ayauğa bolatın şığar. Qazaq köşinen qarajat ayamau kerek! Sondıqtan, ketkenge keyimeyik, kelgendi kemsitpeyik, ağayın!

Auıt Mwqibek,

Wlttıq qoğamdıq senim keñesiniñ müşesi.

Abai.kz

15 pikir