Düysenbi, 25 Mamır 2020
COVID-19 QAZAQSTANDA. Jwqtırğandar — 8531. Jazılğandar — 4352. Qaytıs bolğandar — 35
Jön-aq 2089 12 pikir 16 Naurız, 2020 sağat 10:58

Bir koncertten keyingi oy...

(nemese qazaqqa bäri de toy...)

Bwl äñgimeni bastamauğa da boluşı edi. Alayda, «Sen timeseñ men timen badırañ köz...» – dep ündemey qaluğa dätim jetpedi. «Aytpasa sözdiñ atası öledi!» – degendey, köñilimdi küpti etken jaylardı özderiñizben bölisip, talqığa saludı jön dep sanadım.

Sonımen, äyelder merekesine oray jarıma qwrmet körseteyin dep 8 naurız küni özim wnatatın änşi äri kompozitor Roza Älqojanıñ koncertine attanğan edik. Birden ayta keteyin, koncert köñilimizden şıqtı. Bir äulettiñ müşeleri öner körsetkenimen, üş sağatqa sozılğan kocert mazmwndılığımen, äsemdigimen körkemdik deñgeyimen esimizde qaldı. Meni osı öner merekesine kelgen jwrtşılıqtıñ, dälirek aytqanda keybir körermenderdiñ qılığı qapalandırğan.  Nege deysizder ğoy?! Aytayın...

Almatınıñ köşelerindegi keptelister men kölik qoyatın twraq mäselesin biletindikten birjarım sağat bwrın üyden şığuğa tura keldi. Obalı ne kerek, Respublika sarayına tez-aq jettik. Saray ğimaratınıñ aynalasındağı qaptağan kölikterdi körgende köñilimizge alañ kirgeni ras. Alayda, jer astı avtotwrağına tüskenimizde eki deñgeyli twraqtıñ tömengi qabatı müldem bos twrğanın kördik. Kölikpen kelgen körermender köşelerde keptelis jasağanşa, nege twraqqa qoymaydı eken degen saual aldımen oyğa kelgen. Su tegin. Öziñe ıñğaylı äri köligiñ üşin alañdamaysıñ. Osını bilmeydi me, joq älde jer astı twrağına tusuge erine me eken, äyteuir iin tiresken avtomobil'der attap qadam jasauğa mümkindik berer emes.  Osı jerde twrğan üş birdey patrul'dik policiya brigadası bwl jayğa nazar audarğan da joq. Sirä, tärtip pen rettilikti qadağalau üşin emes, bireuler birdeñe dey qalsa bas salıp äketuge tapsırma alğan boluı kerek... Al, koncert bitkennen keyingi körinis müldem twrpayı. Şıqqan adamdardı alıp ketuge kelgen kölikter Respublika sarayı men Dostıq köşesin jauıp tastağanday äserde qalasıñ. Ärkim öz jağdayın ğana oylap, bilgenderin jasauda. Mädeniet degen wğım müldem wmıt qalğanday, janımız jabırqap qaytqanı ras. 

Qazaqtıñ toyına ortaq tağı bir kemşilik ne dep oylaysızdar? Dwrıs aytasız, şaqırğan auqıtında kelmeu! Toyğa ğoy, meyli, keşikse özderi bilsin. Alayda bizdiñ qazekeñ koncertke de toyğa barğanday baratının bayqadım. Koncert uaqıtımen bastalğanımen, wzaq uaqıt boyı keşigip kelgender sabılısıp, köñilimizdi alañdatumen boldı. Qızmetker qızdar olardı jetelep äkelip, orındarın körsetip, önerdi tamaşalap otırğandardı orındıqtarınan twrğızıp,  äbden äbigerge salğan. Koncert körgendey bolmaydı ekensiñ. Sonda jauapsız keybir adamdardıñ kesiri köpşilikke nege tiyui kerek degen zañdı swraq tuındaydı. Bwrındarı, qoñırau soğılğannan keyin kelgenderdi körermender zalına jibermeu tärtibi boluşı edi ğoy. Sol dästürdi aldağı uaqıtta da qatañ saqtau kerek siyaqtı.

Äyelder merekesi bolğandıqtan qalada twratın jamağat analarına qwrmet körsetip, koncertke aparıp jatqanı asa qwptarlıq jağday. Qwşaq-qwşaq gül äkelip, süyikti änşilerine wsınğanı qanday jarasımdı. Roza Älqojanıñ janküyerleri köp ekenin de osı jolı anıq añğardıq. Degenmen, gül tapsıramın dep sahnağa şığıp, äñgime aytıp twrıp alatındar jaylı ne deuge boladı. Bir-eki keyuana bataların berip jattı, oğan da hoş delik. Alayda, än salıp jürgen ärtistiñ janına jaqındap, selfi jasauğa wmtılğandar diñkeletip jibergenin nesine jasıramız. Tipti, saray qızmetkeriniñ «qoy» degenine eşkim qwlaq asqan da joq. Körermenniñ köñilin aulağan änşi amalsızdan solardıñ ığına jığılıp, suretke tüsip jattı. Zal tolı jwrtşılıq solardıñ qılığın qızıqtap otırdı da qoydı. Tağı da mädeniet jaylı oylanıp, janımız jabırqap qalğan!

Nemeresin qazaqtay jaqsı köretin wlt älemde joq şığar, sirä. Jılı-jwmsaqtıñ bärin solardıñ auzına tosıp, qonaqqa barsaq tastamay ertip jüretinimiz sondıqtan. Osı twrğıdan kelgende nemereni koncertke nege aparmasqa?! Biraq, kişkene säbilerdiñ 10 –15 minuttan artıq bir jerde tınış otırğanın körgenderiñiz bar ma?! Azdan keyin: «Şöldedim!», «Däret alamın!» dep şıqpay ma olar. Osıdan keyin-aq zalda qayşılasqan jüris bastalıp jüre beredi. Koncert jayına qalıp, solardıñ qılığın tamaşalap otırğanıñdı bayqamay qalasıñ. Bir jağınan olarğa kinä artqım da kelmeydi. Alayda, mädeni şarağa kelgen, süyikti änşilerin «tiri dauısta» tıñdağısı kelgen köpşiliktiñ qanday jazığı bar?!

Toy degennen şığadı ğoy. Bizde toy ortaya bere: «Tilegimizdi ayttıq, sıylığımızdı berdik. Endi qayta bersek te boladı...» – degen tüsiniktiñ bar ekeni jasırın emes. Sol ädetimizdi mwnda da jasaytın bolıppız.  Sebebi, älginde aytqanday, üş sağatqa sozılğan koncerttiñ ekinşi sağatı aua bere qaytatındardıñ qarası molaya bastadı. Orındıqtardıñ tasırı, ayaqtardıñ dürsili, köz aldıñda kölbeñdegen adamdar köñilimizdi alañdata bergen. Al, soñına qaray körermender şaranıñ ayaqtaluın kütpesten esikke lap qoyğan. Jwrtşılıq orındarınan twrıp ketkennen keyin biz de amalsız köterildik.

Osınıñ bärin aqılım asqandıqtan emes, aşınğanımnan aytuğa tura keldi.  Jası ülken jamağat, zamandastarım men keyingi tolqın ini-qarındastarımnıñ is-äreketi köñilimdi jüdetip tastağanın nesine jasırayın. Koncert degen toy emes, Respublika sarayı toyhana emes, önerdiñ qasietti ordası emes pe edi?! Adamdı mädenietke, izgilikke şaqıratın altınmen aptap, kümispen küptegen saltanattı sarayda jasaytınımız älgi bolsa, jayşılıqta qandaymız degen swraq mazalay beredi.  Osı turalı siz ne oylaysız, ağayın?!

Quat Qayranbaev

Abai.kz

12 pikir