Senbi, 21 Qırküyek 2019
Bizdiñ şeneunik 3504 0 pikir 18 Mamır, 2016 sağat 13:00

QASIMOVTIÑ «QAZAQ TİLİNE» TÜKİRGENİ BAR MA?

Deputattıñ qazaqşa swrağına orısşa jauap bergen İşki ister ministri Q.Qasımov ornınan alınuı kerek

 

16 mamır küni  Parlamentke  kelgen  QR İşki İster ministri  Qalmwhanbet Qasımov   özine Qazaqstannıñ memlekettik tilinde swraq qoyğan Mäjilis deputatı Genadiy Şipovskihtiñ saualına  Reseydiñ memlekettik tilinde jauap berdi.

Ötkende ğana, osıdan tura  üş ay bwrın 16 aqpanda  QR Prezidenti Nwrswltan Nazarbaev  Almatıdağı jiında    swraq qoyılğan   tilde jauap bermegender qızmetterinen quılsın dep bwyrıq bergen bolatın.

Prezidenttiñ sol  tapsırmasına baylanıstı tüsinik bergen sol kezdegi Prezidenttiñ baspasöz 
hatşısı (büginde Aqparat jäne qommunikaciya ministri) Däuren Abaev: «Öziniñ sözinde Prezident şeneunikter memlekettik qızmet körsete otırıp, azamattardıñ tildik saualın eskerui tiis ekenin qadap ayttı.

«Tilder turalı» zañda «memlekettik jäne memlekettik emes wyımdardıñ azamattardıñ ötinişterine jauaptarı jäne basqa qwjattar memlekettik tilde nemese ötiniş etilgen tilde qaytarıladı», dep jazılğan.

Şeneunikter keyde zañnıñ bir böligin ğana eskeretin jağdayları bolıp twradı. El Prezidenti, mine, naq osınday zañdı jartıkeş tüsinetin memlekettik qızmetkerlerge qarata aytıp otır. Mısal retinde ol  orıs tilindegi ötinişterdi keltirdi, alayda osı qağida bilik ökilderi qazaqtildi azamattarğa jauap qaytara almay qalatın jağdaylarğa da qatıstı.

Sondıqtan da osı taqırıp töñiregindegi alañdauşılıqqa negiz joq. Memlekettik tildi damıtu –  memlekettik sayasattıñ basımdıqtı bağıttarınıñ biri jäne onı kez kelgen kemsitu Qazaqstannıñ wlttıq müddelerine qayşı keledi»-dep naqtı jauap berdi.

Elbası tapsırmasına baylanıstı erteñine-aq   Prezident äkimşiligi bükil memlekettik organdarğa tekseris jürgizip, tärtipke keltirip qoyğan bolatın.

Konstituciyamızda Qazaqstannıñ memlekettik tili -qazaq tili dep tayğa tañba basqanday, soqırğa tayaq wstatqanday jazılıp twr.

Sonımen birge “Qazaqstan Respublikasındağı tilder turalı» QR Zañınıñ 4 babına säykes — Qazaqstan Respublikasınıñ memlekettik tili – qazaq tili.
Memlekettik til – memlekettiñ bükil aumağında qoğamdıq qatınastardıñ barlıq salasında qoldanılatın memlekettik basqaru, zañ şığaru, sot isin jürgizu jäne is qağazdarın jürgizu tili. Ükimet, özge de memlekettik, jergilikti ökildi jäne atqaruşı organdar
memlekettik tildi barınşa damıtuğa  mindetti.

  “Qazaqstan Respublikasındağı tilder turalı» QR Zañınıñ 11 babı boyınşa “Memlekettik jäne memlekettik emes wyımdardıñ azamattardıñ ötinişteri men basqa da qwjattarğa qaytaratın jauaptarı memlekettik tilde nemese ötiniş jasalğan tilde beriledi”.

Endeşe,

 1.Parlament qabırğasında  Mäjilis deputatınıñ qazaqşa swrağına  orısşa jauap bergen;

2.Qazaqstan Respublikası Konstituciyasınıñ 7 babı men Qazaqstan Respublikası “Tilder turalı Zañınıñ” 4,11 baptarın bwzğan,

3.QR Prezidenti tapsırmasın orındamağan;

4.Memlekettik sayasattıñ basım bağıttarınıñ biri – memlekettik tildi kemsitip,  Qazaqstannıñ wlttıq müddelerine qayşı äreket jasağan  

İşki ister ministri Q.Qasımov orınan alınuı kerek.

Joq, bizdiñ zañdarımız ben Elbasınıñ erekşe  tapsırmaları Resey tilinde söylegenderge jürmey me?

Qazıbek ISA

Maqalanıñ tüspnwsqası: qazaquni.kz

Abai.kz 

0 pikir