Särsenbi, 17 Şilde 2019
4816 0 pikir 16 Qañtar, 2017 sağat 14:24

SAYASI TOPTAR ARASINDA AŞIQ AYQAS BASTALA MA?

Ötken aptada QR Prezident Äkimşiligi jetekşisiniñ orınbasarı qızmetinen bosatılğan Bağlan Maylıbaevtıñ twtqındalğanı turalı bügin resmi aqparat şıqtı.

Wlttıq qauipsizdik komitetiniñ derekterine süyensek, Bağılan Maylıbaev Memlekettiñ mañızdı äm qwpiya qwjattarın zañsız jariya etip jiberipti. Ata Zañda bwl – Otanğa opasızdıq, satqındıq degen ayıp.

Bağlan Maylıbaev qızmetinen bosatılğanda – orıs tildi bwqaralıq aqparat qwraldarı türli boljamdar jasadı. Biraq ol boljamdardıñ biri de tura ondıqqa tigen joq.  Jalpı, qoğamdıq ortada özi turalı jağımsız pikir qalıptastırğan Maylıbaevtıñ tağdırın endi qwzırlı organdar şeşetin boldı. Bwl jolğı qwrbandıqqa qwlaqqa siñisti bolğan «pälenşe soma jımqırğan» degen ayıp emes, "Memlekettiñ qwpiyasın jariyalau" degen nän ayıp tağılıp otır.

Bağlan Maylıbaevtıñ otandıq telearnalar basşılığına böten eldiñ azamattarın tağayındağanı belgili.

Bwdan bölek, Bağlan Maylıbaev este qalarlıq ne tındırdı?

Maylıbaevtıñ twtqındaluına qatıstı sarapşılar men ziyalı qauım ne aytadı?

Aydos Sarım, sayasattanuşı:

- Bağlan Maylıbaevtıñ twtqındaluı kezdeysoq jağday emes. Ötken jwmada wstalğan eki azamatpen de men jaqsı tanıspın. Wlttıq qauipsizdik komitetiniñ özi küni keşe ğana ülken lauazımdı qızmette bolğan azamattarğa «Otanğa opasızdıq jasau» degen ayıp tağıp otırsa, beker emes bolğanı.

Maylıbaevtıñ Prezident Äkimşiliginde atqarğan şaruası asa bir joğarı dep aytuğa kelmeydi. Sebebi, wyımdastıru jwmıstarı men basqaru mehanizmderin dwrıs jürgize almağanın, ötken jılğı  jer mitingilerinen-aq köruge boladı. Aqparattıq nasihattı wyımdastıra almağanı tağı ras. Onıñ üstine, Maylıbaevtıñ twsında, otandıq /barlıq desek te boladı/ telaarnalardıñ basşılığına nemese orınbasarlığına Resey, ya bolmasa böten eldiñ azamattarı tağayındaldı.

Wlttıq qauipsizdik komiteti qızmetkerleri onıñ üyin tintu kezinde bwltartpas dälelder tauıptı. Memlekettik qwpiya qwjattardı jariyalau degeniñiz – Otanğa opasızdıq jasau degenmen para-par. Mwnıñ özi qoğamnıñ teris pikirin tudırıp otır. Men telearnalarğa özge eldiñ azamattarın basşı etip tağayındağan Bağlan Maylıbaevqa birneşe märte sın aytqan edim. Al endi Maylıbaevtıñ ornına Marat Täjin sekildi azamattıñ kelui, Aqordadağı kadrlıq dağdarıstıñ jäne sayasi reformanıñ bastaluın sezdirse kerek.


Maraltay Rayımbekwlı, aqın:

- Bwl turalı ne aytuğa boladı? Ol endi sol sayasi alañda jürgen jigit. Men tanitın Maylıbaev memleketşil azamat. Elbasınıñ sayasatın qoldaytın. Tipti janın salıp qorğaytın azamat. Men tanitın Maylıbaev osınday azamat. Bwdan artıq ne ayta alamın?!

Bağlan Asaubaywlı 2003-jıldıñ qırküyek ayınan 2004-jıldıñ jeltoqsan ayına deyin «Zañ» akcionerlik kompaniyasınıñ prezidenti bolğanı edi. Sondıqtan biz Maylıbaevtıñ qasında qızmette bolğan Amanhan Älimwlına habarlastıq.

- «Renjimeñderşi, Maylıbaevtıñ wstalğanı turalı resmi aqparat şıqsın. Anau-mınau dep ayta beruge de bolmaydı. Bwl birinşiden etikağa da jat. Sondıqtan, men pikir bermey-aq, qoyayın», - dedi Amanhan ağa.

Maylıbaevtıñ twtqındaluına qatıstı sayasatker Berik Äbdiğali mırzağa da habarlasqan edik. «Menen basqalarınan swrañdarşı. Men onımen birge jwmıs istegen joqpın» dedi.

Al Mwrat Äbenov mırza «Men bwl turalı pikir ayta almaymın» dep qısqa qayırdı.

Esteriñizge sala keteyik, osığan deyin Wlttıq qauipsizdik komiteti «Memlekettik qwpiyanı äşkereledi» degen ayıppen Nartay Dütbaev pen tağı eki şeneunik – Nwrlan Hasen men Erlan Nwrtaevtı twtqındağan bolatın. Odan tintu kezinde zattay ayğaqtar tabılıp, 2 ayğa qamalğan edi. Endi däl osı bap boyınşa Bağlan Maylıbaev twtqındalıp, 2 ayğa qamaldı. Bwl neni bildiredi?

Sayasi toptar arasında aşıq ayqas bastalğanı ma? Bwl turalı sayasatkerler men sayasattanuşılardıñ pikirlerin  «Abai.kz» aqparattıq portalında jariyalaytın bolamız.

Nwrgeldi Äbdiğaniwlı

Abai.kz

0 pikir