Beysenbi, 13 Jeltoqsan 2018
46 - söz 2611 3 pikir 13 Qaraşa, 2018 sağat 12:22

Qazaq edim degenşe...

Demalıs künderi taksimen jüretinim bar. Internet swmdıq damıdı ğoy. Şaqırğan taksiiñniñ mäşine nömirin ğana emes, jürgizuşisiniñ de esimin bilip otırasıñ. Bügin de "indrayverge" tapsırıs jibergenmin. "Bes minutta keledi" degen jauap keldi. Tez kiinip tısqa şıqtım. Taksige kire "Assalaumağaleyküm!" deu meniñ ädetim. Rölde qazaq ekenin mana habarlamadan körgenmin. Ekinşi ädetim, jürgizuşiniñ qaydan kelgenin swraymın. Bärimiz de Astanağa äyteuir bir jaqtan keldik qoy. Taksişiler köbine oñtüstikten bolıp şığadı. Oğan da et üyrengen. Bwl jolı jauap basqaşa boldı.
-Reseyden keldim!-dedi orta jastan asqan jigit ağası köligin otaldırıp jatıp, -Tambov degen jerdi biletin şığarsız?
-Qazaqtar onda qaydan jür?-dedim tañğalısımdı jasıra almay, -Orınbor, Ombı deseñiz oyğa qonadı...
Resey qazağı ünsiz qaldı. Sosın auır kürsinip qoyıp, äñgimesin bastağan.
...Aqmola onıñ ata-babalarınıñ kindik qanı tamğan jer. Osı öñirde ülken ataları Span bolıs degen kisi ömir süripti.Ruı-Arğın. Bolıs közi qaraqtı, oqığan kisi bolsa kerek. Jiırmasınşı ğasırdıñ basındağı qazaq ziyalılarınıñ birazı onıñ üyinen däm tatıp, äñgime-dürkin qwrıp ketedi eken. Säken Seyfullinmen jaqın aralas-qwralas bolğanğa wqsaydı. Ataman Annenkovtıñ azap vagonınan qaşıp şıqqan Säken biraz uaqıt osı Span bolıstıñ qıstauında jasırınğan degen derek bar. Qoş, sonımen Qazan töñkerisinen soñ Span bolıs eşqayda qaşpay, Aqmolada twra beredi. Malın kedey-kepşikke taratıp berip, jaña ökimetke jaqqan sıñaylı. Wjımdastırudan da, kämpeskeden de aman şıqqan. Bälkim, eski dos Säkenniñ kömegi tigen bolar...Ol jağı äli belgisiz. Otız jetiniñ zwlmatı jetkende Span bolıstıñ da basına qara bwlt üyirile bastaydı. Aldımen Säken twtqındaldı degen habar jetedi. Köp keşikpey tuısqandarımen keşki şäy işip otırğan Span bolıstıñ üyine NKVD-nıñ qwzğındarı sau ete tüsedi.
-Meniñ äkem, yağni, Spannıñ balası-Hakim ol kezde on altıdağı bozbala eken!-dedi jürgizuşi sırtqa, küzgi Astanağa qarap qoyıp, - "Qwzğındar" äketip bara jatqan atamnıñ artınan jügirgen eken, atam onı tanımağan keyip tanıtıp, "öz äke-şeşeñe bar " dep iterip tastağan körinedi. Äkemdi sol jerde twrğan tuıstar özderimen alıp ketken. Atamız sol ketkennen oralmadı...Atıldı.
...Taksişi tağı ünsiz qaldı. Sırtqa köz tastağanmın. Jañbırdıñ soñı qarğa aynala bastaptı. Jolda keptelis. Bola bersin! Mına kisiniñ äñgimesi qızıqtırıp baradı.
-Äkem bir jılday tuısqannıñ üyinde jasırınıp jüredi. Körşi-qolañ, ağayın-tuıs degender tınış jatpaydı. "Span bolıstıñ wlı pälenniñ üyinde jasırınıp jür" degendey arızdı tiisti jerge jazıp jiberedi. Söytip Spannıñ wlı Magadannan bir-aq şığadı. Qarşaday balanı on jılğa sottap, auır jwmısqa jegedi. Azaptaydı. Ne üşin? Onıñ kinäsi ne? Bar bolğanı bolıstıñ balası bolğanı üşin ğana ma? 

Arman Sqabılwlınıñ facebook paraqşasınan

Abai.kz

3 pikir