Beysenbi, 27 Mausım 2019
667 17 pikir 14 Naurız, 2019 sağat 10:32

Memleket basşısı jwmıs saparımen Birikken Arab Ämirlikterine bardı

Nwrswltan Nazarbaev jwmıs saparı ayasında Abu-Dabidiñ taq mwrageri, Birikken Arab Ämirlikteriniñ Qarulı Küşteri Joğarğı Bas qolbasşısınıñ orınbasarı şeyh Mwhammed ben Zaid Äl Nahayanmen kezdesti, dep jazadı Aqordanıñ resmi saytı.

Qazaqstan Prezidenti dästürli qonaqjaylıq körsetkeni üşin taq mwragerine rizaşılıq bildirip, Düniejüzilik Arnayı Olimpiada oyındarı Tayau Şığıs elderiniñ işinde Birikken Arab Ämirlikterinde alğaş ret ötip otırğanına toqtaldı.

– Bwl mañızdı sport şarası mümkindigi şekteuli sportşılarğa özderiniñ mıqtı ruhı men jeñiske degen erik-jigerin tanıtuğa jol aşadı. Jarısqa Qazaqstan komandası da qatısadı. Elderiñizdiñ basşılığı Qazaqstan ötkizetin halıqaralıq is-şaralardıñ bärine ünemi qatısıp keledi. Sondıqtan, sizderge dostıq qoldau körsetu maqsatımen osı oyındardıñ saltanattı aşılu räsimine qatısuğa keldim, – dedi Memleket basşısı.

Nwrswltan Nazarbaev ötken jıl eki el arasındağı özara tiimdi ıntımaqtastıqtı nığaytu üşin jemisti bolğanın atap ötti.

– Bizdiñ jii kezdesulerimiz ben bauırlastıqqa jäne senimge negizdelgen tığız qarım-qatınastarımız barlıq salalardı jan-jaqtı damıtuğa tıñ serpin berude. Bıltır biz özara sapar jasap, mañızdı uağdalastıqtarğa qol jetkizdik. Solardıñ iske asırılu barısı tolıq köñilden şığadı, – dedi Qazaqstan Prezidenti.

Mwhammed ben Zaid Äl Nahayan Birikken Arab Ämirlikterine şaqıruın qabıl alğanı üşin Nwrswltan Nazarbaevqa alğıs aytıp, konfessiyaaralıq kelisim men älemde dialog ornatu isindegi Qazaqstannıñ röline erekşe toqtaldı.

– Biıl biz elimizdiñ negizin qalağan twlğanıñ 100 jıldığın saltanattı türde atap öttik. Siz şeyh Zaidti 25 jıldan astam uaqıttan beri bilesiz. Ol Sizdi öte qwrmetteytin jäne älemdik deñgeydegi basşı retinde tanitın. Biz sizderdi ülgi twtıp, 2019 jıldı – toleranttılıq jılı dep jariyaladıq. Sonıñ ayasında Ämirlikter köpwlttı, mädenietaralıq jäne  dinaralıq ortalıqqa aynaludı közdeydi. Osığan baylanıstı biılğı aqpan ayında Rim Papası Francisktiñ Birikken Arab Ämirlikterine tarihi saparı boldı, – dedi şeyh Mwhammed ben Zaid Äl Nahayan.

Kezdesu barısında taraptar halıqaralıq kün tärtibindegi özekti problemalardı, turizm, cifrlandıru, ğarış, kölik, logistika jäne auıl şaruaşılığı salalarındağı ıqpaldastıqtı talqıladı. Sonday-aq özara ekonomikalıq ıntımaqtastıqtı jandandıru, investiciya tartu jäne Qazaqstan tauarların Birikken Arab Ämirlikteriniñ narığına şığaru maqsatımen Ükimetaralıq komissiyanıñ jäne İskerlik keñestiñ äleuetin arttıru mäseleleri qaraldı.

Abai.kz

17 pikir