Düysenbi, 21 Qırküyek 2020
COVID-19 QAZAQSTANDA. Jwqtırğandar — 107307. Jazılğandar — 101941. Qaytıs bolğandar — 1671
3325 16 pikir 18 Säuir, 2019 sağat 14:29

«100 jaña esim» jobasınıñ jeñimpazı bolu – ülken jauapkerşilik!

Nwrhat Jakiev - elimizdegi eñ aytulı "100 jaña esim" jobasınıñ qatısuşısı. Ol büginde ğılım salasında köptegen izdenister jasap jür. Biz de onıñ aldağı josparları men "100 jaña esim" jobası turalı söylesken edik...

-Nwrhat mırza, Siz elimizdegi eñ üzdik "100 jaña esimge" endiñiz. Jalpı, osı joba turalı oyıñızdı bilsek... 

- Qayırlı kün,"100 jaña esim" jobası turalı 2017 jılı äriptesim, biomedicinamen aynalısatın Zarina Sautbaeva arqılı bildim. Keyin köşedegi plakattardan, teledidardan osı jobanıñ basqa qatısuşıları turalı bile bastadım. Rasında da, jasap jatqan isteri de, ömirbayandarı da qızıqtı da mañızdı. "Är qazağım jalğızım" degendey, qazirgi zamanğı naqışta aytsaq "Är qazaqstandıq dara twlğam" ekenin aşatın jaqsı joba.
«Ruxani jañğıru» jobası ayasındağı "100 jaña esim" konkursı atı aytıp twrğanday, öz isimen önege-ülgi bolatınday twlğalar iriktelinip, olar ruxani motivaciya bere alatınday bolu kerek. Bos söz emes - naqtı ispen. Mümkin jastar mamandıq tañdauda ülgi twtar twlğasın tabar, mümkin qalıptasqan maman öz salasında jeter belester äli köp ekenin tüsinu üşin şığar.

Jalpı ideya - aramızda jürgen azamattardıñ isin körsetu, olar öz salasında jasağan isterin däripteu: ğılım bolsın, medicina bolsın, sport bolsın, öner bolsın, jurnalistika t.b. barlıq sala elimizdi ruhani mazmwnmen bayıtıp twr. Rasında da elimizde ülgi twtar twlğalar köp, är slada, olardıñ jwmısı közge körine bermegenimen, qoğamğa tigizer paydası wşan teñiz.

Men özim ğılım salasında osı tizimge endim. Abay atamız aytqanday, «Onday bolmaq qayda dep, aytpa ğılım süyseñiz» dep jastardıñ ğılımğa qızığuşılığın arttırıp, ğalım boludı armandasa dep tileymin, qabileti bar jastar köp, tek ğalım bolu prestijin köteruimiz kerek, ol artınan elimizge paydası mıñ eselep qaytadı.

-Siz bwl jobağa qalay tañdaldıñız?

- Joba eki satıdan twratın dauıs beru jüyesi arqılı ötti. 2018 qazan - qaraşa aylarında äleumettik jelilerde qızu talqığa tüstik. Äriptester, qoğamdıq belsendiler, jerlesterdiñ qoldauınıñ arqasında nätijesinde 29 jeñimpaz bolıp irikteldik. Bäri ädil ötti, qarapayım auıldan şıqqan men jeñimpazdar qatarınan tabılğanıma quanıştımın. Elbasımen de kezdestik, öz isimiz turalı BAQ ökilderine bayandadıq, jastarmen kezdesu şaralarına qatısudamız. Bwl joba ömirimde bolıp jatqan jaña serpilis deuge boladı.

- "100 jaña esimge" enu sizdiñ ğılımi jwmıstarıñızğa qanday serpin berdi?

- Serpin jan-jaqtı boldı. Eñ bastısı - öz oyımdı jinaqtauğa mümkindik berdi. Tüsindiruge tırısayın. Ğılımi-zertteu jwmıstarı ädette sol ğılım salasında jürgen ğalımdar nazarına bağıttalğandıqtan kürdeli terminderdi emin-erkin qoldana beremiz. Zertteudiñ mañızdılığı aytpasa da tüsinikti degen wstanım basım boluşı edi. Endi, 100 jaña esim jobası ayasında qalıñ jwrtşılıqqa öz ğılımi zertteuiñdi tüsinikti tilmen sipattauğa tırısasıñ. Bwrın män berilmegen mäselelerge tereñirek oylana bastaysıñ. Osı sözimdi 10 sınıp oquşısı, ne telekörermen, ne oqırman birden tüsinse eken dep qalaysıñ.

- Aldağı josparlarıñız qanday?

- Negizgi jospar – bastağan isterimdi jalğastıru, jetildiru, nätijege qol jetkizu. Osı jolda közge körinbeytin köp şarualar bar.

Eñ bastısı, ğılım – joğarı bäsekelestik orta, öne boyı izdenudi talap etedi. Sondıqtan komp'yuterlik model'deude äri qaray bilimimdi jetildiru, jaña ädister men jaña bağdarlamalar meñgeru alğaşqı prioritette bolmaq.
Sebebi ğılımi maqalalar jazu üşin salamızdağı jañalıqtardı bilu kerek, olardı qoldana alu kerek.

Joğarıda aytılğanday, josparlarıma qosımşa äleumettik jükteme qosıp aldım, «100 jaña esim» jobasınıñ jeñimpazı, QR Twñğış Prezident qorı premiyasınıñ laureatı bolu – ülken jauapkerşilik, el senimin aqtauım kerek. BAQ ökilderimen, oquşılarmen, studenttermen kezdesu şaraları köptep josparlanuda, olardı abıroymen ötkizuim kerek dep esepteymin. Jastardı ğılımmen aynalısuğa, ğalım boluğa wmtıluğa şaqıruım kerek, Eldiñ adami kapitalı, wlttıñ intellektualdıq potencialı bilimdi-bilikti mamandardan qwralatındığın nasihattauım kerek, bilim-ğılımdı bilik basınan qoldau kerektigi turalı közqarastarımdı şeşim qabıldauşı twlğalarğa jetkizuim kerek.

Naqtı öz salam turalı aytsaq, zertteu granttarı konkursına qatısıp, Zertteu jwmıstarımdı jaña satığa şığarıp, şeteldik äriptestermen baylanıstı jalğastırıp, akademiyalıq-qoldanbalı salada jwmısımdı jalğastıru josparımda.

-Uaqıt bölip, swhbattasqanıñızğa rahmet!

-Sizderge de ülken rahmet!

Abai.kz

16 pikir