Düysenbi, 14 Qazan 2019
«Soqır» Femida 10063 12 pikir 5 Mausım, 2019 sağat 22:22

Jurnalisti soqqığa jıqqan policeyler emes pe, Twrğımbaev mırza?

QR İşki ister ministri

Erlan Twrğımbaevqa 

AŞIQ HAT

Qwrmetti, QR İşki ister ministri Erlan Zamanbekwlı!

Bügin elimizdegi köp balalı analar mäselesin köterip jürgen belgili qoğam belsendisi, jurnalist Säule Äbildahanqızın Almatı qalası Naurızbay audandıq işki ister böliminiñ aldında belgisiz bireuler soqqığa jıqqan.

Oqiğa ornında barğan tilşimizdiñ habarlauınşa, belsendini Naurızbay audandıq işki ister böliminiñ qızmetkerleri erteñgi sağat 10-dar şamasında üyinen äketip, atalğan audannıñ işki ister bölimine jetkizgen. Ol jerde Satqınbekova esimdi azamatşanıñ arızı boyınşa Säule Äbildahanqızın üş sağat boyı tergep, QR Zañdarına säykes üyine bosatqan.

Almatı qalalıq 7 auruhanağa jedel järdem köligimen jetkizilgen jäbirlenuşi Säule Äbildahan aytuına qarağanda İİB qızmetkerleri onı alğaşqı kirgen esikten emes, basqa jol arqılı sırtqa şığarğan. Sol jerde müldem tanımaytın birneşe äyel  "biz seni qoldauğa keldik" dep jaqın kelip, jurnalisti jabılıp soqqığa jıqqan. Eñ soraqısı sol Sizdiñ ministrligiñizge tikeley bağınıştı betine betperde taqqan policeyler belsendini qorğaudıñ ornına telefondarına bolğan jayttı tüsirip twrğan.

Qwrmetti, Erlan Zamanbekwlı!

Birinşiden, Sizdiñ policeyler nelikten däl İİB aldında belsendini soqqığa jıqqızıp qoyıp qarap twradı? Qoğamnıñ, azamattardıñ qauipsizdigin saqtau solardıñ mindeti emes pe?

Ekinşiden, qoğamdıq belsendini soqqığa jıqqandar azamattıq kiim kiip alğan işki ister ministrliginiñ qızmetkerleri emes pe? Jäbirlenuşiniñ aytuınşa, onı tepkiniñ astına alğan äyelder "uatsap" äleumettik jelisindegi köp balalı analardıñ toptarın jabudı talap etken. Eger olar şınayı köp balalı ata-analar bolsa, belsendini nege äleumettik jelidegi toptarğa bola soqqığa jığadı?

Üşinşiden, Säule Äbildahanqızın üyinen äketken qızmetkerlerdiñ "äyelder töbelesin" telefonğa tüsirip twrğanın qalay tüsinuge boladı. Bilik tarapınan bwyrıq kelip, sol tapsırmağa esep beru üşin be?

Törtinşiden, İşki ister böliminiñ aynalası tolğan kamera! Oqiğanıñ naq qanday sipatta bolğanın endigi anıqtap, halıqqa tolıqqandı aqparat taratatın uaqıt bolğan joq pa?

Besinşiden, üyinen policeyler äketkende sau şıqqan qoğamdıq belsendiniñ auruhanağa tüsetindey jağdayğa jetkizu saylau aldında Sizdiñ ministrligiñizge sın emes pe? Basqa emes, işki ister bölimi qızmetkerleriniñ köz aldında zañsızdıq bolıp jatsa, basqa jerde ne bolmaydı?

Altınşıdan, Qwday oñdap, Säule Äbildahanqızı qazir auruhanadan şıqtı. Därigerler "miı şayqalğan" degen diagnoz qoyğan. Bwl jayğa tikeley Sizdiñ qwziretiñizdegi qızmetkerler kinäli emes dey alasız ba?

Jetinşiden, qazir äleumettik jelilerde "Säule Äbildahanqızına bwl qastandıq policeyler tarapınan jasaluı mümkin" degen boljamdar aytıluda. Osı jaytqa ministr retinde mälimdeme jasauıñızdı swraymız.

Sizderge kömek bolu üşin mına suretti qosa jariyalaudı jön sanadıq. Belsendiniñ aytuı boyınşa, policeylermen birge jürgen qara kiimdi, bet perde taqqan azamat oqiğanı tolıq telefonına tüsirip alğan (bwl suret belsendini üyinen äketer aldında tüsirilgen).

Qoş! Äzirge osı!

Tüyin

Soñı künderi qoğamdıq belsendi Säule Äbildahanqızına bilik tarapınan qısım köbeygen. Birneşe äkimşilik jäne qılmıstıq is qozğalatının aytıp, ürkitip-qorqıtu şaraları jasalğan. El aldında abıroyı bar azamatşanı osılay jäbirleuge kimniñ tarapınan tapsırma tüsti?

Bwl swraqqa alda tağı jauap izdeytin bolamız!

Qanat Birlikwlı

Abai.kz

 

12 pikir