Александр Лукашенко 23 қыркүйек күні аяқ астынан ұлықтау рәсімін ұйымдастырып, алтыншы мәрте Беларусь президенті қызметіне кіріскен болатын. Бірақ оны өз халқы да, алыс-жуық бірқатар шетел де мойындамай отыр. 

Франция президенті Эммануэль Макрон Le Journal du Dimanche газетіне берген сұхбатында Лукашенконың биліктен кетуі керек екенін мәлімдеді.

"Бұл биліктің, демократияның логикасын қабылдай алмайтын және күшпен ұстайтын авторитарлық үкіметтің дағдарысы", - деді Макрон.

Лукашенконың ұлықтау рәсімі өте сала Германия, Литва, Словакия және Чехия оны Белорусь президенті ретінде мойындамайтындарын мәлімдеді. Сондай-ақ, Еуроодақ та осындай мәлімдеме жасады.

Ал Беларусь оппозициясының ортақ кандидаты Светлана Тихановская видео үндеу жасап, “Лукашенко зейнетке шықты, мен – Белорусьтің заңды әрі халық сайлаған президентімін!” - деп мәлімдеді.

Осыдан кейін, 27 қыркүйек күні Минскінің орталығында ондаған мың адам дәстүрге айналып үлгерген қарсылық акциясына шықты. Александр Лукашенконың биліктен кетуін талап еткен шерушілер акцияны сайлауға оппозиция атынан түскен Светлана Тихановскаяның "халықтық инаугурациясы" деп атады. Олар президент сайлауында Лукашенко емес, Тихановская жеңді деп санайды.

Естеріңізге сала кетейік, Беларусьте президент сайлауы 9 тамызда өткен. Ресми есеп бойынша, Александр Лукашенко 80,1, ал оның басты қарсыласы Светлана Тихановская 10,1 пайыз дауыс алған.

Алайда беларусь халқы сайлаудың бұл қорытындыларымен келіспейді. Сайлау өткен 9 тамыздан бастап күні бүгінге дейін Минскі бастаған ірі-ірі қалаларда наразылық акциялары жалғасуда.

Еуро одақ Беларусьтегі сайлаудың қорытындыларын, Александр Лукашенконың жеңісін мойындаған жоқ. Тіпті, Еуропарламент депутаттары арнайы резолюция қабылдаған. Ол бойынша Александр Лукашенко 5 қарашадан бастап президент деп саналмайды. Сондай-ақ, ЕО Александр Лукашенкоға қарсы санкциялар пакетін әзірлейтінін мәлімдеген.

Айта кетейік, Александр Лукашенко Беларусьті 26 жылдан бері басқарып келеді. Бұл жолғы сайлау Лукашенконың алтыншы сайлауы болған.

Abai.kz