Халықаралық валюта қоры Ресей өмір сүру деңгейі бойынша әлемдік рейтингте төмен қарай жылжи береді деп санайды. 2020 жылдың соңында Ресей Федерациясы жан басына шаққандағы ЖІӨ көлемі бойынша әлемде 68-ші орын алады.

Ресей экономикасы орта есеппен бір адамға шаққанда 9,97 мың долларды құрады. Бұл өткен жылмен салыстырғанда 1,6 мың немесе 14%-ға аз. Халықтың орташа табысының көрсеткіші болып саналатын, доллармен қайта есептелген жан басына шаққандағы ЖІӨ Ресейде 2016-17 жылдардағы деңгейіне түсті.

2025 жылға қарай Ресей жан басына шаққандағы ЖІӨ бойынша әлемдік рейтингте тағы екі позициясын жоғалтады және 12,97 мың доллар көрсеткішімен 70-ші орынға қайта түседі, деп болжайды ХВҚ. Нәтижесінде Ресейдің өмір деңгейі іс жүзінде Түркіменстанмен (12,85 мың доллар) теңеседі. Қазір Ресей Түркіменстаннан 20%-ға алда тұр. Бірақ бұл алшақтық алдағы 5 жылда толығымен жойылатын болады, деп хабарлады қор.

ХВҚ-ның есептеулері бойынша Қазақстан да Ресейді басып оза алады. Қазақстан жан басына шаққандағы ЖІӨ биыл 8,78 мың доллар көлемінде (74-ші орын). Ал 2025 жылға қарай 13,09 мыңдық көрсеткішпен 69-ші орынға көтерілуі мүмкін.

Қытай Ресейді 2020 жылы басып озды. ХВҚ-ның бағалауы бойынша, олардың жан басына шаққандағы ЖІӨ 10,84 мың доллардан 2025 жылы 16,28 мыңға дейін өседі.

Қазір ХВҚ-ның есептеулері бойынша, Ресей өмір сүру деңгейі бойынша дамыған елдерден 4,5 есе артта қалды. Жан басына шаққанда ЖІӨ дамыған елдерде - 46,35 мың долларға жетті. 2025 жылға қарай бұл көрсеткіш 58,65 мың долларға дейін өседі, ал айырмашылық 5 есеге жуықтайды.

Керімсал Жұбатқанов,

Abai.kz