"Зиуар Мирманбетова бір жыл бұрын Өзбекстан полициясы мен арнайы қызметінің қатысуымен Қазақстан аумағында ұсталған болатын. Жалпы, Ташкенттің сұрауы бойынша шетелде қарақалпақ диаспорасының 5 өкілі тұтқындалды. Солардың бірі Тілеубике Юлдашева әлі Ақтөбедегі тергеу изоляторында отыр", - деп жазды Ақылбек Мұратбай.

Оның сөзінше, қарақалпақтарды қудалау 2022 жылдың шілде айында Қарақалпақстандағы бейбіт шеруге оқ атудан кейін басталған.

"Онда ондаған (кейбір деректер бойынша жүздеген) адам қаза тапты. Бірқанша журналистер, заңгерлер, блогерлер мен азаматтық белсенділер ұзақ мерзімге түрмеге қамалды", - дейді қарақалпақ диаспорасының өкілі.

Бұл оқиғаларды тексеру үшін президент Мирзиёев мемлекеттік комиссия құрды. Алайда ол ұйым жұмыс істеп бастағалы бергі 15 ай ішінде ешбір есеп жарияламаған.

16 қыркүйек күні түнде Алматыдағы тергеу изоляторынан тағы бір белсенді – Раиса Құдайбергенова босатылған.

Раиса Құдайбергенова – қамаудан босатылған үшінші белсенді. Одан бұрын Қазақстанның оңтүстік астанасындағы тергеу изоляторынан Қошқарбай Төремұратов пен Жангелді Жақсымбетов босатылған болатын.

Фото:ашық дереккөзден

Abai.kz